Read Angami Naga Johan 4 Bible Online

Johan 4 - Angami Naga bible

Johan 4

¹Siro Farisikoe “Jisue Johan ki rei mia bu puo siedzi chü pekrakuo mu dzülu pie mia tsü krakuoliekezhü dze silieketa” Jisue sikelie ki,

²sirei Jisu dzülu pie mia tsü monyü puo siedziko thuo zo,

³puo Judia khawa di tuo la Galil nu vota.

⁴Derei puo Samaria pfüthe vo morosuota.

⁵Süla puo tuose thiedzü Jakob-e khapie puo nuo Josef ketsü lietsau kepenuo ki Samaria nadi Saikar ükecüu nu vorlie.

⁶Jakob dzükhouu rei süki ba, mu Jisue rüve mezie tuoketa la dzükhouu khieki nu rülei ba. Süki khinhieluota.

⁷Sitse Samariamiapfü puo dzü ütuoü vor, mu Jisu süpfü ki, “A bu dzü kriecie” ita.

⁸(Puo siedziko kecüca khrüketuo la nadi nu vota.)

⁹Sitse Samariapfü puo ki, “No Judamia di kiüdi a Samariamiapfü ki dzü krietuoü chaya ga?” sita. (Judamia Samariamia ze keliethoya mocü la.)

¹⁰Sitse Jisu puo ki, “No Ukepenuopfü mha methuo khashüyakezha si, mu n ki, ‘Dzü pie a bu kriecie,’ ikethau supuo shicü si ücüwe, no puo ki chatuo, mu puo kerheidzü khapie n tsütieciü” sita.

¹¹Sitse thenupfü puo ki, “Kezhau no mekou puorei se tuo mo, siro dzükhouu rei sou. No kirapuonu kerheidzü süu ngulietuo ga?

¹²No dzükhou hau pie hie ketsü hie puotsa Jakob ki zhakuo me? puo rei puo nuonuoko rei mu puo riko rei thiedzü hau nunu krie vor ze!” sita.

¹³Sitse Jisu puo ki, “Kehoupuorei dzü hau kriekecüu terhü latatuo,

¹⁴derei kehoupuorei a khashükezha dzüu kriekeliemia mhakipuorei terhü latalie lho. A dzü khapie puo ketsüu thuo puo nounu dzüluo puo chü rüluo zo vo kechachie kerhei tsotuo” sita.

¹⁵Sitse thenupfü puo ki, “Kezhau a bu terhü sa molieketuo la mu tuo hathechie vor dzü ü molieketuo la no dzü süu khapie a tsücie” sishü.

¹⁶Jisu puo ki, “No vo di n nupfu kie ze vorlie” sita.

¹⁷Sitse thenupfü sie, “A nupfu jü” sita. Sitse Jisu puo ki, “No ‘A nupfu jü’; idi kepuu puotou zo.

¹⁸No mia pengou ki nyiwate, mu no tsie puo ze lhou kebau rei n nupfu ketho mo. No a ki ketho-u pushüwata zo” sita.

¹⁹Thenupfü sie puo ki, “Kezhau, no siedzekesimia puocü a leliete.

²⁰Thiedzü hie puotsanuoko kijüthou hau geinu Kepenuopfü rüsuo vor, derei niekoe themia bu rüsuoketuo chüu sü Jerusalem zo üdi puya” sita.

²¹Sitse Jisu sie puo ki, “Thenupfü, a peleliecie, kijüthou hau geinu morei Jerusalem nunu rei Puou rüsuo motaketuo tei puo vortuo.

²²Nieko we puo rüsuoyakezhau siya mo, hie we rüsuoyakezhau si di rüsuoya, kelakelie Judamia ki nu vor zocü la.

²³Derei puotei puo vorzhie mu süu tsierei vor bata zo, ketho chü di rüsuoyakezhako ruopfü mu ketho nunu Kepenuopfü rüsuoketuo tei puo vorzhie, kekreilamonyü Puou mia bu si di puo rüsuo nyüyakezha la.

²⁴Kepenuopfü sü ruopfü zo, mu puo rüsuoyakezhamia ruopfü mu ketho nu rüsuo morosuo” sishü.

²⁵Thenupfü sie puo ki, “Messiah (Khrista üyakezhau) vortuoü zhükecü a si ba. Mu puo vor ro puo hie ki mha peteko pushütuo” sita.

²⁶Jisu sie, “A n ze kerüchü kethau süu zo” sishü.

²⁷Si keba nu puo siedziko la vor di puoe thenumiapfü puo ze kerüchü ketha ngu u ngota, derei uko miapuorei sie, “No kedipuo si nyüya ga?” morei “No kiüdi thenupfü ze kerüchü tha ga?” irei mo.

²⁸Süsie thenupfü puo lipfhü khawa di tuo nadiu nu vota. Sidi puo themiako ki,

²⁹“Vor di mia puo a chüwaketa dze pete pupie a kiekeshüu mehocie! Puo Khristau ta zo monyü?” sita.

³⁰Süla uko nadiu nunu tuo Jisu ki vor.

³¹Süki Jisu siedziko sie puo ki, “Kepethau no mha huo cüliecie” sishü.

³²Derei puo uko ki, “A nieko si kemo kecüca puo ba” sita.

³³Süla puo siedziko thuo huoniehuo ketso di, “Mia huonie kecüca se vor puo tsü mo nhie?” idi kepu thata.

³⁴Derei Jisu uko ki, “A kecücae mia puo a ketsekeshüu dieze chüketuo mu puo mhatho khapie a pelekeshüu chü tseiketuou zo.

³⁵Nieko rei, ‘Lieyie teiu vorketuo khrü dia baluo siya mo me’? Derei a nieko ki puya, nieko tosie lieko mehoshücie, süko mepie relie vizhüte.

³⁶Lie reyakezhau puo zhakhra ngulieya mu puosi pfhü kengupie kechachie kerhei nu shülieya; sidi tsia vakeshüu rei mu reyakezhau rei keze u nei phituo.

³⁷Kekreilamonyü ‘Mia puoe tsia vashü mu kekreiue reya’ idi kepu hau ketho zo.

³⁸A nieko ketsepie nie kemezhieshü kemo lie puo nu renushü ho. Kekreimia süu nu mhachüshü, mu nieko bu uko mhatho-u nu kele zo.”

³⁹Siro rüna süu nu Samariamia kekra, thenu süpfü sie, “Puo a chükewa dze pete a ki puwata zo” ikeshü puo zhapuu la Jisu pelelieta.

⁴⁰Süla Samariako puo ki vorlie tse, uko puo bu uko ze banu chata, mu Jisu zha kenie uko ze bata.

⁴¹Mu themia kekra puo die la pele salie.

⁴²Sitse uko sie thenupfü ki, “N kepu la zomonyü hie rei tsiewe pelete, kekreilamonyü hie thuo rünyüliete mu hie themia hau kijü kelakelieu ketho zo ükecü siliete” sita.

⁴³Sidi zha kenie tseita tse, puo sünu nu Galil nu vota.

⁴⁴(Kekreilamonyü siedzekesimia puo thuo puo rakhe nu zo we therhu jü ükecü Jisu puo thuo pushü zeru).

⁴⁵Sidi puo Galil nu vorlie tse, Galil nu themiako puo zelie, ukoe puo thenyi ki Jerusalem nu mha chükeshüko nguwatacü la; uko rei thenyi ki sünu kevo la.

⁴⁶Süsie puo tuo Galil nu keba Kana rünau, puoe dzü pie khubedzü chükeshü nu la vota. Sünu kediu khro kezhamia puo ba ru puo nuou mhachü di Kapernaum nu zhü.

⁴⁷Puoe Jisu Judia nunu Galil nu vorketa silie, sidi puo tuo zo Jisu ki vor di puo bu vo Kapernaum nu puo nuo siatatuoükezhüu chü keshürhoshünu chata.

⁴⁸Süla Jisu sie puo ki, “Nieko zasi mu ungomhathoko ngu zo kemosie a peleya mo” sita.

⁴⁹Sitse kezhau sie, “Kepethau, a nuo siaketa mhodzü kercie” sishü.

⁵⁰Jisu puo ki, “Volie, n nuou rheilie zotuo” sishü. Themia süu Jisu die pelelie di tuo vota.

⁵¹Sidi puo tuo vozhü ru puo kituoko vor puo selie di sie puo nuou shürholietaü pushü.

⁵²Süla puo uko ki kedikechükipuo puo nuou vi parte shicü ketso ru ukoe sie, “Süu ndu thehesie keba puo meseki ruki mote” sita.

⁵³Sitse puo puou Jisue sü mese touki, “N nuou rheilietuo” idi pukeshü dieu rükralie, süla puo mu puo kikruu rei pete pelelieta.

⁵⁴Hauha Jisue Judia nunu Galil nu vorkelie sie zasi chükeshü kenieu.