Read Angami Naga Johan 5 Bible Online

Johan 5 - Angami Naga bible

Johan 5

¹Mha hako sie Judako nyi puo la Jisu Jerusalem nu kho.

²Jerusalem nu Tekuo Kharu kepenuo ki rüzieu khieki ki pengou sa chüpie ba, Ibri[8] die nu thechü süu za Bethesda[9] üya.

³Ki süko nu kechükenyümia, mhiciemia, phiyhomia, mu lasiamia kekra vo zhü di dzü mele kepar pfhe baya.

⁴kekreilamonyü puotei huo nu Niepuu dieliemia rüzie nu tsur di dzü keboushüya, mu dzü pou lala kesier ki süu nu lelie kerietho-u kechükenyü pete nunu shürholietaya.

⁵Süki cie serethetha mhachü tuoketamia puo rei zhü.

⁶Jisue puo kezhü ngu mu puo si cha phi zhüketa silie di sie puo ki, “No shürholie nyüya me?” sishü.

⁷Sitse mhachü kezhüu puo ki, “Kezhau, dzü pou lala kesier ki miapuorei a pie le rüzie nu shüketuo ba molie, mu a sünu letuoü kesieki kekreimia a mhodzü letatayalie” sita.

⁸Jisu sie puo ki, “Sielie, n zhükhra pielie di tuoshülie” ishü.

⁹Sitse themiau vilieta; mu puo puo zhükhra pielie di tuolieta. Sünhie Sabat zha.

¹⁰Süla Judako shürholieketau ki, “Thie sabat mu no n zhükhra chüpie di chatuoketuo hau thezho-u varhuote” sita.

¹¹Derei puo uko ki, “Mia puo a chü keshürhokeshüu a ki ‘N zhükhra chüpielie di tuolie’ idi pulie” sita.

¹²Sitse uko sie puo ki, “N ki, ‘Süu chüpielie di tuolie’ ikeshüu supuo ga?”

¹³Derei themiau süu supuo shi si mo, Jisu tuo themia krodiu donu leketa la.

¹⁴Süsie Jisu rüsuokiu nu themia süu ngulie tse puo ki, “Harie, tsiewe no shürholiete; mha kesuo n gei vor sakecü keprei la kephouma chü sa hietacie” sishü:

¹⁵Süsie themiau vo di Judako ki Jisue puo chü keshürhoshüketa pushü.

¹⁶Süla uko Jisu petsou vüta, kekreilamonyü puo sabat nhie mia chü pevikeshü la.

¹⁷Sitse Jisu sie uko ki, “A puo tsie ha rei mhachü ba zo mu a rei mhachüya” sita.

¹⁸Puo hau pukeshü la Judako puo dukhriwaketuo le kechü sata; puo sabat zho-u varhuokecü zomonyü Ukepenuopfüü puo Puo üdi puo thuo puoü Ukepenuopfü ze ketouketa la.

¹⁹Süla Jisu uko ki, “A nieko ki ketho-u puya; Nuou puo thuo zowe mhapuorei chülie kenjü; puoe puo Puou kedipuo chü ba ngu shiü süu rübei chüya; Puou kedipuo chüya shi, Nuou rei sükemhieko chüyacü la.

²⁰Puou Nuou khrieya mu puo thuo chüyakezhako pete thapie puo kieya, siro nie bu nie ngolieketuo la puo hako kirei mhatho zhakuocü thashü puo kietuo.

²¹Puou kesiamia chü perheilie di kerhei khapie süko ketsü tuoi, Nuou rei kerhei khapie puo medomia tsüya.

²²Sütuoi Puou miapuorei capi chüya mo, derei capi chüketuo kekuo pete pie Nuou tsüwate.

²³Sidi mia bu Puou rhuyakezha tuoi, Nuou rei rhulieketuo la. Kehoupuorei Nuou rhuya kemo-u puo ketsekeshü Puou rei rhuya mo.

²⁴A nieko ki ketho-u puya, themia kehoupuorei a dieko rünyülie di a ketsekeshüu pelekeliemia kechachie kerhei bate, mu sümia pejoketuo ba sa mote, derei kesia cie kerhei nu prate.

²⁵“A nieko ki ketho-u putuo, puotei puo vorzhie; mu süu tsieta zo, kesiako Ukepenuopfü Nuou pfhe silietuo, mu sikelieko kerhei ngulietuo.

²⁶Puoue kerhei puo nu ketuo tuoi, Nuou bu rei kerhei puo nu tuolieketuo khashüwate.

²⁷Mu puo Nuou bu mia capi chüketuo kekuo khashüwate, kekreilamonyü puoe Themia Nuou zocü la.

²⁸Hau la nieko ngota hie, kesiako pete puo pfhe silietuo.

²⁹Sidi partatuo, sidi mha kevi kechüko rhei kerhei nu votatuo, mu mha kesuo kechüko rhei la sie u pejoketuo nu voketuo tei vorzhücü la.

³⁰“A a thuo zowe mhapuorei chülie kenjü. A sikelie kemhie se mia capi chüya, mu a mia capi kechüu puotou zo, kekreilamonyü a a thuo a medo chütuoü monyü a ketsekeshüu neiu chütuoüya.

³¹Mhanuü a thuo a zhapu chüya ro, a zhapu die süu ketho mote.

³²Derei a zhapu chüyacümia puo ba, mu puo a dze kepu süu ketho zocü a si ba.

³³Nieko mia ketsepie Johan kishü, mu puoe ketho-u zhapu chüshü.

³⁴A themia ki nu zhapu se morosuo ükecüu mo, derei nieko kelalieketuo la a die hako kepu zo.

³⁵Puoe tu keba mu zie keba mituu zo, mu nieko rei dokipuo puo kezie nu nie nei ba nyü sie zo.

³⁶Derei a zhapu Johan zhapuu kirei zhakuokecü puo ba; Puou a bu chü tseishünu di khashü a ketsü mhathoko thuo Puou a ketsekeshü thashüya.

³⁷Siro a ketsekeshü Puou thuo a zhapu chüya. Nieko zowe mhakipuorei puo pfhe si mo, mu puo rhiu rei ngu mo,

³⁸Mu nie puo dieu pie nie nou shüse tuoya mo, kekreilamonyü niekoe puo thuo ketsekeshü peleya kemo la.

³⁹“Nieko ketholeshü pfhü phrüya, kekreilamonyü nie süko nu kechachie kerhei ba ücü leyakezha la, mu süko a dze pu ba kethowe.

⁴⁰Siürei nieko kerhei ngulieketuo la a ki vor nyüya mo.

⁴¹A themia ki nu thetshe pfü nyüya mo.

⁴²Derei nie nounu Ukepenuopfü khrieya mokecü a si ba.

⁴³A a Puou za se di vor zo, derei nieko a zelie mo, siürei mia puo puo thuo puo za se di vor liro nieko puo zelietuo.

⁴⁴Nieko huoniehuo ki thetshepfülieya, derei Ukepenuopfü zokecüu ki nu thetshe pfhüya mo liro, nie kikidi pelelie vituo ga?

⁴⁵Nieko aü Puou mhodzü kinu nieko pejotuoücü le hiecie; nie pejokezha puo ba, süusü nieko puo khre merü kevor Mosa zo.

⁴⁶Nie Mosa pele liro, nieko a pele rei zotieciü, kekreilamonyü puo a dze thushü zocü la.

⁴⁷Derei nieko puoe thukeshüko peleya mo liro, nie kikidi a dieko pelelietuo ga?” sita.