Read Angami Naga Johan 6 Bible Online

Johan 6 - Angami Naga bible

Johan 6

¹Süsie Jisu tuo Galil Dzükezha, Tiberia Dzükezha[10] ü reiyakezhatsa vota.

²Mu mia krodi puo puo siemedzi tuo, puoe kechükenyüko gei zasi chükeshüko uko bu nguwaketa la.

³Jisu puo siedziko ze kijüthou puo gei kho balie.

⁵Jisue themia krodi puo puo ki vorkezhü ngulie, süla puo Filip ki, “Uko themia hako pete vachülieketuo la kirapuonu kecüca khrülie vituo ga?” ishü.

⁶Puoe hau puo dojüshüketuo la kepu zo, puo thuo zowe kedipuo chütuo shicü si phre ba.

⁷Sitse Filip puo ki, “Mia puo bu keduonuoyo puopuo cütuo ürei uko la niekhrüda denari krie kenie ma rei za vo tsolie lho” sita.

⁸Puo siedzimia puo Andria, Simon Pitor siezeue sie,

⁹“Haki thepfunuomia yopuo barli niekhrüda pengou mu khuo kenie se tuo, derei süko se themia hadepuo la kedipuo chülietuo mu?” sita.

¹⁰Sitse Jisu sie, “Themiako bu ke baliecie” sishü. Thechü süki nha rei ba phi, süla themiako[11] ke balie, mu süko mia nyie pengou mese.

¹¹Süsie Jisu niekhrüda süko chüpielie di Ukepenuopfü tsheshü, di khapie ke bakelieko tsü phreshü, süsütuoi khuonie gei rei sishü, mu uko pete cü kenyü de cülie.

¹²Uko cü pevü phrelieta tse puoe puo siedziko ki, “Puo rei pekawa molieketuo la kepeshako pete pa laliecie” sita.

¹³Süla uko barli niekhrüda pengou cü di cü peshakelieko pfhüpie merha kerekenie tshulie.

¹⁴Jisue zasi chükeshü hau ngu di themiako sie, “Themia hau kijü nu vortuoüketuo siedzekesiuta zo” sita.

¹⁵Süla Jisue themiako vor puo kemvü chü di puo tepie puo bu uko kedi chütuoü baketa si di tuo rürei kijüthou gei vota.

¹⁶Süsie thevatieta tse, puo siedziko tuo la dzükezha nu kelie,

¹⁷sidi rou puo nu lelie di thuse dzükezhau cie Kapernaumtsa volie. Süki teizeita, derei Jisu uko ki vor moluo.

¹⁸Süki teikhrie khriedi puo vor di dzü hepie kemerie chüta.

¹⁹Uko rou thu maildo se dia[12] mesenu volie tse Jisu dzümhonu tuo rouu penuo vorzhücü ngulie di uko michie phita.

²⁰Derei Jisu uko ki “Michie hiecie, a zolie” sishü.

²¹Sitse uko puo bu rouu nu ler uko zetuo nyüta, süsie mezemo uko votuoükezhü thechüu tsolie.

²²Süsie nhie themia krodiu dzükezha khie kekreitsa baketakoe rou puo rübei süki keba ngu. Mu ukoe Jisu puo siedziko ze rounu lecü ngu mo, derei puo siedziko thuo uko rübei tuoketa ngu.

²³Siro Tiberiatsatie nu rou kekreiko rei vor dzükezha khie Niepuu niekhrüdako se Ukepenuopfü tsheshü di cükecü chüu tsolie.

²⁴Süki krodiu Jisu mu puo siedziko tuo moketa ngulie, süla uko rouko nu le balie di puo pfhü Kapernaum nu vota.

²⁵Themia vor dzükezha khie kekreitsa nu puo ngulie tse sie puo ki, “Kepethau, no kedikechükipuo hanu vorta ga?” sishü.

²⁶Jisu uko ki, “A nieko ki pu toushütuo, nieko zasiko kengu la monyü niekhrüda cü pevüketuo la a pfhükezha zo.

²⁷Kaüjütaketuo kecüca pfhü hieü, kechachie rheilieketuo cau pfhüliecie, süu Themia Nuou thuo pie nieko tsütuo, kekreilamonyü puoe pesogei mohor vüwaketa la” sita.

²⁸Süla uko sie puo ki, “Ukepenuopfü mhathoko chülieketuo la hie bu kedipuo chülie morosuo ga?” sita.

²⁹Sitse Jisu sie, “Ukepenuopfü mhatho-u sü, nie bu puoe ketsekeshüu pelekelieu zo” sishü.

³⁰Süla uko sie puo ki, “Hie bu ngu di pelelieketuo la no zasi kikecüpuo chüshütuo ga? No kedipuo chüshüya ga?

³¹Hie puonuoko rayha nu Manna cü, süu dze thupiekezhü, ‘Puo uko bu cüketuo la teigei nu niekhrüda khashü’ isi ze” sishü.

³²Sitse Jisu uko ki, “A nieko ki ketho-u puya, thiedzü teigei nu khapie nie ketsü niekhrüdau Mosa monyü a Puou thuo teigei nu niekhrüda ketho-u khapie nie tsüshü.

³³Kekreilamonyü teigei nu vor di kerhei khapie kijüu tsüyakezhau sü Ukepenuopfü niekhrüdau zocü la” sita.

³⁴Süla uko puo ki, “Kepethau, niekhrüda hau pie hie tsücie” sishü.

³⁵Jisu sie uko ki, “A sü kerhei niekhrüdau zo. Themia kehoupuorei a ki kevormia merütalie lho, mu kehoupuorei a pelekezhamia terhüta lho zo.

³⁶Derei nieko a nguwata zorei pele moketa a nie ki pushüwate.

³⁷Puoue khapie a ketsü kheko a ki vor phretuo, mu kehoupuorei a ki kevormia a sümia khawalie lho;

³⁸Kekreilamonyü a teigei nu vorkecü a thuo a medo chütuoü di monyü a ketsekeshüu medo-u chüketuo la kevor zo.

³⁹Siro a ketsekeshüu medo-u sü, puoe khapie a ketsü peteko puorei pejüwa mo di thelanhie süko pete phoupie kerhei nu shülieketuou zo.

⁴⁰Kekreilamonyü kehoupuorei Themia Nuou meho di puo pelekeliemia kechachie kerhei ngulieketuo a Puou medota zocü la; mu a thelanhie uko phoupie kerhei nu shülietuo” sishü.

⁴¹Puo sie, “A teigei nu keker niekhrüdau zo” iketa dieu la Judamiako puo gei panyata.

⁴²Süla uko sie, “Themia hau, Josef nuou, hie puo puo mu puo zuo kesiu Jisu mo me? Siüro puo tsie kiüdi, ‘A teigei nu kerwe’ ikecü puya ga?”

⁴³Sitse Jisu uko ki, “Nieko panya zo tha hie.

⁴⁴A ketsekeshü Puou thuo ze vorshü kemosie miapuorei a ki vorlie kenjü; mu a thelanhie süu phoupie kerhei nu shülietuo.

⁴⁵Siro ‘Ukepenuopfü thuo uko pethalietuo’ isikecü siedzekesi leshüko nu tuo zo. Kehoupuorei Puou die rünyülie di süu zekeliemia a ki vorya.

⁴⁶Ukepenuopfü ki nu kevor-u rübei zo kemosie miapuorei Puou ngu mo; puoe Puou nguwate.

⁴⁷A nieko ki pu toushütuo; kehoupuorei pelekelieu kechachie kerhei bate:

⁴⁸A kerhei niekhrüdau zo.

⁴⁹Thiedzü nie puotsanuoko rayha nu ketuo ki Manna cü, derei uko siate.

⁵⁰Hau teigei nu keker niekhrüdau mu kehoupuorei süu kecümia siatalie lho.

⁵¹A teigei nu keker niekhrüdau zo. Kehoupuorei niekhrüda hau cü ro kechachie rhei tuotatuo, mu kijüu bu kerhei ngulieketuo la khakeshü niekhrüdau sü a chü zo” sishü.

⁵²Sitse Judako thuo keprüli di huoniehuo üse, “Themia hauha kikidi puo chü pie u bu cülie vita?” sita.

⁵³Süla Jisu sie uko ki, “A nieko ki pu toushütuo, nieko Themia Nuou chü cü mu puo zie krie kemosie, nieko nou kerhei jü zo.

⁵⁴Kehoupuorei a chü cü mu a zie kriekezhamia kechachie kerhei bate, mu thela nhie a süu phoupie kerhei nu shülietuo;

⁵⁵Kekreilamonyü a chüe mia ca ketho mu a zie rei mia bu krieyakezhapfü ketho zo.

⁵⁶Kehoupuorei a chü cü mu a zie kriekezhamia a nu baya mu a rei puo nu baya.

⁵⁷Rheituoyakezha Puou a ketsekeshü mhiei, mu Puou la a rei rheiketuo zo, kehoupuorei a chü cükezhamia a la rheilie zotuo.

⁵⁸Hau teigei nu keker niekhrüdau zo; nie puotsanuoko thiedzü cülie di siaketa mhie mo. Derei niekhrüda kecü hau kehoupuorei kechachie rheilietuo” sita.

⁵⁹Jisu Kapernaum nu kebaki sinagog nunu die hako pie mia pethashü.

⁶⁰Puo siedziko kekra die hau si di, “Die hau die kere puota zo, supuonie süu rünyülie vi ta?” ita.

⁶¹Derei puoe pethakelieko panya tuoketa Jisue silie di sie, “Die hau la nieko nou kekrüte me?

⁶²Mhanuü nieko Themia Nuou thiedzü puo bau nu la khoketa ngu ro ki ta?

⁶³Kerhei khashüyakezhau sü Ukepenuopfü Ruopfüu zo; u chüüphou we kemethuo zo. A nieko ki pukeshü dieko ruopfü mu kerhei zo.

⁶⁴Derei nieko huomia peleya mo” sita. Jisue sietsenu puo pele kemvüko suomia shi mu puo tepie mia dzienu shüketuou supuo shicü si tuota zocü la.

⁶⁵Sidi puo sie, “Hau la a nieko ki: Puou thuo mia bu vorlie kevi chüshü kemosie miapuorei a ki vorlieya mo ücü pushüwata zo,” sita.

⁶⁶Hau la puo siedziko kekra pesie lata mu puo ze tuo sa mota.

⁶⁷Süla Jisu puo siedzi kerekenieko ki, “Nieko rei lata nyüya me?” sita.

⁶⁸Sitse Simon Pitor puo ki, “Niepuu, hie bu supuo ki vo ta? No kechachie kerhei dieko seya.

⁶⁹Mu hie tsiewe noe Ukepenuopfü ki nu kevor Kemesau ükecü si mu pelete”[13] sita.

⁷⁰Sitse Jisu sie uko ki, “A nieko mia kerekenie kedalie mo üme? Sirei nieko mia puo satan zo,” sita.

⁷¹Puo Simon Iskariot nuou Judas,[14] kerekenieko donu mia puo, puo teshütuoü kebau dze kepu zo.