Read Angami Naga Johan 7 Bible Online

Johan 7 - Angami Naga bible

Johan 7

¹Hau sie Jisu Galil nu rühou tuota. Puo Judia nu rühou tuo nyü mota,[15] kekreilamonyü sünu kekuo se keba Judakoe puo dukhriwa nyü baketa la.

²Süki Judako Pru Nyi[16] teiu rei penuota.

³Süla puo siezeko puo ki, “N siedziko bu rei no chüyakezha mhathoko ngulieketuo la no thechü hau nunu tuo Judia nu vocie.

⁴Miapuorei meyielie nyü ro rüshü di mhapuorei chüya mocü la. No mha hako chüya eru kijü peteu bu rei n siliecie” sishü.

⁵(Kekreilamonyü puo siezeko zorei puo pelelie mo zoluocü la.)

⁶Jisu uko ki, “A teiu vor moluo, derei nieko la puoteiu we tso sei baya zo.

⁷Kijüu zo we nieko mecülie lho, derei a mecüya, kekreilamonyü a süu mhatho kesuoko pu seiyakezha la.

⁸Nieko thenyiu nu voliecie. A we thenyi hau nu volie lho, kekreilamonyü a la puoteiu vor moluocü la” sita.

⁹Puo hau pushü di Galil nu bata.

¹⁰Puo siezeko thenyiu nu voketa sie nu Jisu rei la vo, derei puo mechü mhingu chü zo mo di rüshücü mhie di vo.

¹¹Süki Judako thenyiu nunu puo pfhü di sie, “Puo kirapuo tuota ga?” si tuota.

¹²Mu süki themia kro-u donu puo dze kepu bouübi tuota. Süki huomia sie, “Puo themia kevi puo zo” si mu kekreiko sie, “Mo, puo mia seketuo zo” si tuota.

¹³Derei Judako keprei la miapuorei mhoutsou zo di puo dze pu mota.

¹⁴Thenyiu metsuo ki Jisu rüsuokiu nu kho di mia petha sedeta.

¹⁵Sitse Judako uko ngo di sie, “Themia hau mhakipuorei pethapfülie mo ze, kikidi mhasi pie hilie ga?” sita.

¹⁶Sitse Jisu sie uko ki, “A se pethayakezhako a die mo, derei a ketsekeshüu die zo.

¹⁷Themia kehoupuorei Kepenuopfü medo chü nyüya ro, die hau Kepenuopfü ki nu vor mo, a thuo a ki nu pie par shi silietuo.

¹⁸Kehoupuorei puo thuo puo kinu mha puyakezhamia puo thuo puo za pfhüyakezha zo. Derei puo ketsekeshüu bu zayie chü nyüya ro süu ketho zo mu ketho kemo puorei puo nou ba mo zo.

¹⁹“Mosa thezho-u khashü nieko tsü mo me? Derei nieko miapuorei thezho-u chüü zeya mo. Siro nieko kiüdi a dukhriwa nyüya ga?”

²⁰Sitse themia kro-u sie, “No terhuokesuo puo zeya! supuonie n dukhriwa nyüya ga?” sita.

²¹Jisu uko ki, “A ungomhatho puo chüshü ru nieko pete nie ngo phreta.

²²Mosae zhükere zho khashü nieko tsü, (süu Mosa ki nu monyü nie puotsanuoko ki nu zo), süla nie sabat nhie rei mia zhü reya.

²³Sabat nhie mia zhü rekecü la Mosa zho-u varhuota mo üro, kiüdi a sabat nhie mia chü pevi lotsokeshü la nieko a gei nie nei moya ga?

²⁴Chazou kengu geinu mia capi chü monyü ketho capiu nunu mia capi chüliecie.”

²⁵Süla Jerusalem themiako huo sie, “Themia hauha mia puo dukhriwatuoü pfhüketuou mo me?

²⁶Mu lere, puo mechühou nu diepu tha zo, derei themiako puo ki mhapuorei pu la mo ze! Kekuo seyakezhako puo üse Khristau zo ücü si bata motie?

²⁷Kehouchürei we zowe themia hau kirapuonu vor shicü si ba; derei Khrista kevor ki, miapuorei puo kirapuonu vor shicü silie lho” sita.

²⁸Sitse Jisu rüsuokiu nu mia petha puo rhiechü di, “Nieko a supuo mu a kirapuonu vor shicü si ba. A a thuo a medo chü di vor mo derei a ketsekeshüu we ketho zo, mu nieko we puo si mo.

²⁹A puo si ba, kekreilamonyü a puo ki nu vor, mu puo a ketseshü” sita.

³⁰Sitse uko puo telietuo üsieta, derei miapuorei u dzie se puo gei shü mo, kekreilamonyü puoteiu vor moluo.

³¹Derei themia kro-u nu mia kekra puo pelelie di sie, “Khrista vor üro puo themia hau kirei ungomhathoko chükuoshütuo me mu?” sita.

³²Farisikoe themia kro-u puo dze sikecüko kepu ketha silieta, süla Farisiko mu zievo kezhako puo telienu di mia ketseshü.

³³Süla Jisu sie, “A puotei huoyo nieko ze sa ba di a ketsekeshüu ki votatuo.

³⁴Nieko a pfhütuo, derei nieko ngulie lho; mu nieko a kebara vorlie kenjü” sita.

³⁵Sitse Judako huoniehuo üse, “Themia hau kirapuo votatuo üdi u bu puo ngulie lho üta di mu? Puo vo Cüre tuoketa Grikmiako donu ba di Grikmiako pethatieya me?

³⁶Puo pucü, ‘Nieko a pfhütuo mu nieko a ngulie lho, mu A kebara nieko vorlie kenjü’ isikecü hau puoca kedipuota mu?” si bata.

³⁷Thenyi thela kemeyietho nhie Jisu siethalie di shie puo rhiechü di sie, “Kehoupuorei terhükezhau bu a ki vorliecie,

³⁸mu kehoupuorei a pelekezhau vor krieliecie. Ketholeshüe ‘Pelekezhau puo nounu kerheidzü rüko rüluo partuo’ idi kepu tuoi” sita.

³⁹Jisue puo pelekelieko bu ngulieketuo Ruopfü dze hau pushü, süki zo we Ruopfü khashü mo zoluocü la; kekreilamonyü Jisu zayie chülie mo zoluo.

⁴⁰Siro uko puo die hau pukeshü si tse, themia kro-u nu huomia, “Themia hau siedzekesiu kethota zo” sita.

⁴¹Kekreimiako sie, “Puo Khrista-u zo” sita. Derei kekreiko sie, “Khrista-u Galil kijü nunu par toulie vi me?

⁴²Khrista-e David yie geinu tsiu David kelhou rüna Bethlehem nunu partuo ükecü Ketholeshüe pushü moü me?” sita.

⁴³Sidi puo la themia kro-u bu kedierhelie mota.

⁴⁴Uko huomia puo telieta nyü sie, derei miapuorei puo gei u dzie khashü mota.

⁴⁵Rüsuoki nu thenamiako zievo kezhako mu Farisiko ki la vor tse uko sie, “Nieko kiüdi puo ze vor mota ga?” idi ketsota.

⁴⁶Sitse thenamiako sie, “Miapuorei themia hau tuoi diekepu si chie molie” sita.

⁴⁷Süla Farisiko sie uko ki, “Puo bu nieko rei sa sewata mo nhie?

⁴⁸Kezhako morei Farisiko huomia puo peleta ümha me?

⁴⁹Derei themia kro hau thezho-u sikemo la rüseu nu tuote” sita.

⁵⁰Sitse Farisiko donu mia puo tsiemhodzü Jisu ki kevor-u Nikodema sie uko ki,

⁵¹“U zho nu pedzüperie mia die si mo mu mia mhatho sikemo nu mia pejoya mo” sishü.

⁵²Sitse uko sie, “No rei Galil nunu vor me? Leshü pfhü phrü vo ro siedzekesimia puorei Galil nunu sierya mocü ngulietuo” sita.

⁵³Sidi uko tuo u thuo u kinu vo phreta.