Read Angami Naga Johan 8 Bible Online

Johan 8 - Angami Naga bible

Johan 8

¹Sirei Jisu we tuo Oliv kijüthou gei vota.

²Sitse puo khiserüna rüsuoki nu la vor. Siru themia peteko vor puo houpfü balie mu puo ke balie di uko petha sede lata.

³Süki thezhokepethako mu Farisiko thenumiapfü puo pieü chükezhü nu telie di ze vor, sidi puo bu uko donu thalie.

⁴Sidi uko sie Jisu ki, “Kepethau, thenu hapfü ha pieü chüzhü di teliewe.

⁵Mu Mosa zho-u nu ketsiepie thenu hikecümia vakhriwanu di pupiezhü. Ru no kedipuo pu ta?” sita.

⁶Uko puo tekelie kele nu puo kedo di die hau kepu zo. Sitse Jisu nuketsu di kijünu puo dziekinuo pie mha thu bata.

⁷Sirei uko puo ketso tha zota tse, puo tosie uko ki, “Nieko donu phouma moto zokecüu bu ketsie pie puo va kerietho chücie” sishü.

⁸Sidi puo nuketsu kijü mha thu la bata.[17]

⁹Siro uko süu sishü tse, phichütho-u rie di mia puo sie puopuo di peteko tuo phreta. Sidi Jisu mu thenupfü rübei ketha zota.

¹⁰Sitse Jisu tosie puo ki, “Thenupfü, uko kirapuo vota ga? Miapuorei n pejo mote me?” sita.

¹¹Thenupfü sie puo ki, “Ulie, kezhau, miapuorei si molie” sita. Sitse Jisu sie puo ki, “A rei n pejolie lho. Tuo votalie, phouma la sa hie” sishüwata.

¹²Süsie Jisu Farisiko ki mha pu la di sie, “A kijü kezieu zo, kehoupuorei a siemedzikezhau kezei nu tuo monyü kezieu nu tuolietuo” sita.

¹³Sitse Farisiko sie puo ki, “No n thuo n zhapu chüya, süla n zhapu dieko ketho mo” sita.

¹⁴Sitse Jisu sie, “A a thuo a zhapu chü zorei a kepuu ketho zo, kekreilamonyü a a thuo kirapuonu vor shi mu kirapuo votieya shicü si ba, derei nieko we a kirapuonu vor shi morei kirapuo votieya shicü si mo.

¹⁵Nieko we themia rhi[18] nunu mia nyie pepiya, a we mia puo nyie rei pepiya mo.

¹⁶Mhanuü a mia nyie pepi zorei, a mia nyie pepikecü puotou zo, süu nu a rübei monyü a ketsekeshü a Puou ze tuokecü la.

¹⁷Sizomonyü nie zho-u nu rei mia kenie zhapu we ketho zokecü thupie tuo.

¹⁸A a thuo a zhapuya mu a ketsekeshü Puou rei a zhapu chüya” sita.

¹⁹Süla uko sie puo ki, “N Puou kirapuo ba ga?” idi ketso. Jisu sie “Nieko we a rei morei a Puou rei siya mo. Nieko a sikecü sie a Puou rei silietuoweü,” sita.

²⁰Puo rüsuokiu kinyi kibouu nunu die hako pupie mia petha, mu miapuorei puo te mo, kekreilamonyü puoteiu vor moluocü la.

²¹Süsie puo lasie uko ki, “A tuotatuo, mu nieko a pfhütuo, derei nieko kephouma nunu siatatuo. A kevora nieko vorlie lho” sita.

²²Süla Judako sie, “Puoe puo thuo puo dukhriwatuoüya me? Puoe sie ‘A kevora nieko vorlie lho’ ikeshü kedipuo pu ba shi!”

²³Sitse puo uko ki, “Nieko kerünuo nunu zo, a we peso geinu vor, nieko kijü haunumia zo, a we kijü haunumia mo zo.

²⁴Süla a nieko nie kephouma nunu siataketuo pushüwate, süla nieko ae süu zo ükecü pelelie kemosie nieko nie kephouma nunu siata zotuo” sita.

²⁵Sitse uko puo ki, “No supuo ga?” ita. Jisu uko ki, “A sietsenu süu nieko ki puwate.

²⁶A nieko dze puketuo mu pejoketuo ba phi; derei a ketsekeshüu ketho zo, mu a puo ki sikelieu se kijüu ki puyakezha zo” sita.

²⁷Ukoe puo uko ki Puou dze pie pu ketha cau silie mota.

²⁸Süla puo sie uko ki, “Themia Nuou pie kesieki, a süu zokecü, mu a a thuo a medo nunu mhapuorei chüya mo, derei Puou a pethakeshü tuoi a süko se puya ükecü nieko silietuo,

²⁹Siro a ketsekeshüu rei a ze tuo zo; puo a bu a rübeitaya mo; a puo nei puo medoko chü seiyakezha la” sita.

³⁰Jisu die hako pushü tse themia kekra puo pelelieta.

³¹Süsie Jisu puo pelelieketa Judako ki, “Nieko a die nu ba seilie ro, nieko a siedzimia kethota zo;

³²mu nieko ketho-u silietuo, sitse ketho-u thuo nie kha kerüüshüwatuo,” sishü.

³³Sitse uko puo ki, “Hieko Abraham yiemia zo, mu hie mhakipuorei mia die chü chie mo zoluo. No ‘Nieko kha kerüüshüwatuo’ idi kepuu puoca kedipuo ga?” si.

³⁴Jisu uko ki, “A nieko ki pu toushütuo, kehoupuorei kephouma chüyakezhau kephouma dieta zo.

³⁵Miadiemia kikru puo nu ba seilieya mo; nuothonuou we sünu ba seiya.

³⁶Süla mhanuü Nuou nie kha kerüüshüwata üro, nie phreishüwaketamia kethota zo.

³⁷Nieko Abraham yiemia zo ükecü a si ba; sirei nieko a dukhriwatuoü nie hie chü tuoya, a dieko baketuo nie kelhou nu thechü jücü la.

³⁸A a Puou kinu ngukelieko se puya, mu nieko rei nie Puou kinu sikelieko chü morosuo zo” sishü.

³⁹Sitse uko puo ki, “Abraham sü hie puou zo” sita. Sitse Jisu uko ki, “Nieko Abraham nuonuo ketho üliro, nieko Abraham mhathoko chütuo,

⁴⁰derei nieko a Ukepenuopfü kinu sikelie ketho-u pie pukeshü la nieko a dukhriwatuoü pfhü tuoya. Abraham mha sükemhie chü mo zo.

⁴¹Nieko we nie puonuo mhathoko chüya” sita. Sitse uko sie puo ki, “Hie tekhruonuo mo, hie hie puo puo ba, mu süu Ukepenuopfü zo” sita.

⁴²Jisu sie uko ki, Ukepenuopfü nieko Puou liro nieko a khrietuo; a Ukepenuopfü kinu par mu vor zokecü la. A a thuo a medo nunu vor mo, derei puo thuo a ketsekeshü zo.

⁴³Nieko kiüdi a kepuu silie mo ga? Süu nieko a die rünyü kemvü la zo.

⁴⁴Nieko kerüzhü nuonuoko zo, mu nieko puo menguko chü nyüya. Sietsenu zorei puoe mia kedukhrimia zo, mu puo mhakipuorei ketho-u nu thaya mo, kekreilamonyü ketho-u puorei puo nou tuo mo. Puo ketijü pu rei süu puo zho zo, puo ketijümia mu kecürüko krüu zocü la.

⁴⁵Derei a ketho-u kepu la nieko a peleya mo.

⁴⁶Nieko supuonie kephouma pu a dalie vi ga? A ketho-u puya ro nieko kiüdi a pelelie mo ga?

⁴⁷Ukepenuopfü ki nu kevormia kehoupuorei Ukepenuopfü dieko rünyüya. Sirei nieko Ukepenuopfü ki nu vor kemo la süko rünyü mvüya.

⁴⁸Sitse Judako puo ki, “No Samariamia puo mu terhuokesuo zeyakezhamia puo ücü hie pu zhü mo me?” sita.

⁴⁹Jisu sie, “A terhuokesuo zeya mo, derei a a Puou rhuya, sirei nieko a rhuya mo.

⁵⁰A a thuo a la thetshetherhu pfhüya mo, derei süu pfhüyakezhamia puo ba mu süu mia nyie pepiyakezhau zo.

⁵¹A nieko ki pu toushütuo; kehoupuorei a die zekelieu mhakipuorei siatalie lho.”

⁵²Sitse uko sie puo ki, “Hie tsiewe no terhuokesuo puo zeya ükecü si touliete! Abraham siate; mu siedzekesiko rei siate, sirei no pucü ‘A die zekelieu mhakipuorei siatalie lho’ ite.

⁵³No hie puo Abraham siaketau ki zhakuo me? siedzekesiko rei siate. No n thuo n üse supuo üya ga?” sita.

⁵⁴Jisu sie, “A a thuo a tshe zorei, thetshe süu we mhapuo mo. Mia puo a tshekezhau sü a Puo, nieko puo ki, ‘Puo úko Kepenuopfü zo,’ idi puyakezhau zo,

⁵⁵nieko thuo puo si mo zoürei. Derei a puo si ba; a puo si mo üta ro, a rei nieko mhie ketijümia puotatie! Derei a we puo si ba mu a puo die zeya.

⁵⁶Nieko puo Abraham a kevor teisozhau ngushüketuo le puo nei siei vor mu puo süu ngu di puo neilie” sishü.

⁵⁷Sitse Judako puo ki, “No tsie teicie hiepengou rei mo di no Abraham ngu le?”[19] sita.

⁵⁸Jisu sie uko ki, “A nieko ki pu toushütuo, Abraham mhodzü a tuo zo” sita.

⁵⁹Sitse uko ketsie chüpie puo vatuoüta, derei Jisu rüshü di rüsuokiu nunu prata.