Read Angami Naga Johan 9 Bible Online

Johan 9 - Angami Naga bible

Johan 9

¹Siro puo tuo vozhü ru puo mhicie di penuokelie puo ngulie.

²Sitse puo siedziko puo ki, “Kepethau, themia hau puo mhicie zo di penuokelie, puo mo puo krü kephouma la ga?” sita.

³Jisu sie, “Puo kephouma morei puo krü kephouma la rei mo, sirei puo geinu Ukepenuopfü mhathoko pie mia pesipengushüketuo la puo mhicie di penuokelie zo.

⁴Teiso keba ki úko a ketsekeshüu mhathoko chü morosuo; miapuorei mhachülie kenjütaketuo teizeizhau vorzhie.

⁵A kijü nu kebachie a kijü kezieu zo” sita.

⁶Puo hau pukeshü sie, puo mhitsiepie kijü shü, di mhitsie sapie nyoba chülie di nyoba se themia süu mhinie kenheshü,

⁷Sidi puo ki, “No vo di Siloam zieu nunu khrüwalie” sita. (Siloam ca Ketsekeshü) süsie puo vo di khrüwa mu mha ngulie di la vorta.

⁸Süla puo zanuoko mu kekreimia puo hadzü khruocü ba di kenguko sie, “Themia hau thiedzü ba di khruocüyakecüu mo me?” ita.

⁹Huomia sie, “Puo süu zo” si kekreiko sie “Puo mo, derei puo riecü puote ha!” sita. Süla puo sie, “A süu zo” idi pu tha zota.

¹⁰Derei uko sie, “Siro no kikidi mha ngulieta ga?” idi ketso ba zota.

¹¹Puo sie, “Jisu ükecüu nyoba chülie di pie a mhinie nyhoshü di a ki, ‘No vo Siloam nu khrüwalie’ si, süla a vo di khrüwa ru a mha ngu parliete” sita.

¹²Sitse uko puo ki, “Süu kirapuo vota ga?” si. Puo sie, “A si mo” sishü.

¹³Süla uko tsie mhodzü puo mhiciekecüu ze Farisiko ki vo.

¹⁴Jisu nyoba chülie di puo mhi chü pevikeshü nhie sabat zha.

¹⁵Süsie Farisiko puo kimhie di mhangulie shicü dze ketso la. Puoe uko ki, “Puo nyoba pie a mhinie kenheshü. Süsie a vo khrüwa ru tsiewe mhanguliete” sishü.

¹⁶Sitse Farisiko huo sie, “Themia hau Kepenuopfü ki nu vor mo, puo sabat zho-u zeya kemo la” si. Derei kekreiko sie, “Kimhie di kephoumamia puo zasi hakemhieko chülietuo di mu?” sita. Sidi uko kediekreita.

¹⁷Süla uko mhicieu ketso la di, “No puo üse supuo üya ga? Puo n mhi chü pevishüwate” si. Sitse Puo sie, “Puo siedzekesimia puolie” ita.

¹⁸Sirei Judako themia süu tsiemhodzü puo mhicie di mhangulieta ücü puo krünie kie zoshü di ketso kemo ki pele mvüta.

¹⁹Sidi uko unie ketso di, “Hau nnie nuou puo mhicie di penuokelieu zo me? Siliro kimhie di puo mhangulieta ga?” sita.

²⁰Puo krünie sie, “Hau hienie nuou zo, mu puo puo mhicie di penuolie;

²¹derei puo kimhie di tsie mhanguliete shi morei supuo puo mhi chü pevishü shi hie si mo. Puo ketsoliecie; puo rei phichüte, mu puo thuo süu dze pushütuo” sita.

²²Puo krünie hau puketae Judako keprei la zo, kekreilamonyü ukoe kehoupuorei Jisu üse Khrista üdi phrakecümia Sinagog nunu u whuowatuo üdi pepi se baketa la.

²³Süla puo krünie sie, “Puo rei phichüte, puo ketsoliecie” isishü zo.

²⁴Süsie va kenieu va uko puo mhicie di penuokelieu kie lalie di sie puo ki, “Thetshe pie Ukepenuopfü tsüliecie! Puo kephoumamia puo zocü hie si ba” sita.

²⁵Sitse puo sie, “Puo kephoumamia mo mo shi a sü si mo. A mha puo si tou ba, süusü thiedzü a mhicie ru tsiewe a mhanguliete” ita.

²⁶Sitse uko puo ki, “Puo n gei kedipuo chüshü ga? Puo kimhie di n mhikecieu chü pevishü ga?” sishü.

²⁷Sitse puo sie, “A pushü zorei nieko rünyü mvüte. Nieko kiüdi süu rünyü la nyüya ga? Nieko rei sa puo siedzimia chüta nyüya me?” sita.

²⁸Süla uko puo kenga di sie, “No we themia süu siedzimia, derei hie we Mosa siedzimia.

²⁹Ukepenuopfü Mosa ki mha pukeshü hie si ba, derei themia hau la we puo kirapuonu vor shi hie si mo” sita.

³⁰Themiau la sie, “Mha süu, mha u ngo puote. Niekoe puo kirapuonu vor shicü si mo, sirei puo a mhinie chü pevishü.

³¹Ukepenuopfü kephoumamia pfhe rünyüya mo, derei kehoupuorei puo rüsuo mu puo medo-u chüyakezhamia pfhe rünyüyacü hie si ba.

³²Siro kijü chülie tsenu vor tsie ketso miapuorei puo mhicie di penuokeliemia mhi chü pevi lakeshü dze we si mo zoluo.

³³Themia hau Ukepenuopfü kinu vor zo kemosie puo mha hakemhie chülie kenjü zo” sita.

³⁴Sitse uko puo ki, “No kephouma nunu penuolie tou di hie pethatuo üya le?” ita. Sidi uko puo whuowa.

³⁵Jisue uko puo whuowataücü silie, mu puo ngulie tse puo ki, “No Themia Nuou pelete mo?” sidi ketso.

³⁶Themiau sie, “Kezhau, süu supuo ga? A bu puo pelelieketuo la a ki pucie” sita.

³⁷Sitse Jisu puo ki, “No puo ngu reiwate, mu tsie n ze kerüchü kethau puo zo” sishü.

³⁸Sitse puo sie, “Niepuu, a pelete” sita. Sidi puo tsu puo rüsuota.

³⁹Jisu sie, “A mia capi chütuoü kijü hau nu vor, sidi nguya kemoko bu ngulietuoü mu nguyakezhako bu u mhicietaketuo la” sita.

⁴⁰Puo khieki ketha Farisiko huo hau si di sie, “No hie üse hie mhicie ücü pu tha mo nhie?” ita.

⁴¹Jisu uko ki, “Nie mhicie ro nie kephouma jütatieciü, derei nie ‘Hie nguya’ isiya, süla nie kephouma ba zoluo” sishü.