Read Angami Naga Mhakechüko 1 Bible Online

Mhakechüko 1 - Angami Naga bible

Mhakechüko 1

¹Harie Theofil, a a leshü kerieu nu Jisu mhatho therieko nunu chükeshü mu mia kepetha,

²puoe Kemesa Ruopfü geinu morokesuoko pie puo thuo kedakelie apostelko pethashüwa di puo ze teigei khoketa nhie ketso dze thushüwate.

³Puo kemezhiekewa sie puoe zha hiediako rheituoketa pele molie kenjükecü zasi tha toupie uko bu ngu di Ukepenuopfü kedi dze se uko ki pu.

⁴Siro puo uko ze keba ki,[1] uko bu puo ki nu phrakeshü ngukecü ketso Jerusalem nu pfhe balienu di pushü. Puo sie, “Hauha, nieko a ki nu silieketau zo;

⁵kekreilamonyü Johan we dzü nunu dzülu khashü mia tsü, derei hasie zha cha ba kemonu nieko we Kemesa Ruopfü nunu dzülupfütuo” idi pushü.

⁶Süla uko vor kengulieta tse, uko puo ki, “Niepuu, no Israel kedi kha lashüketuo teiute me?” idi ketso.

⁷Puo sie, “Puou thuo puo kekuo se chüpie keba teiko morei puo mese toukiko nieko silie lho.

⁸Derei Kemesa Ruopfü nieko gei vorkelie ki nieko kekuo ngulietuo; sitse nieko Jerusalem nu, Judia pete mu Samaria nu, tsiu kijü vala ketso rei a zhapumia chülietuo” sita.

⁹Puoe hau pushükewa sie, uko meho ketha nu puo ze sieta; mu kimhou puo shü vor uko mhingu nunu puo zepfülieta.

¹⁰Puo si khotakezhü ki uko mhidi mo di teigei meho tha ru, mia kenie pfhe kekra se di mhai vor uko khieki thata.

¹¹Unie sie, “Galilmiako, kiüdi nieko teigei meho tha zo ga? Nieko ki nu puo ze teigei sieketa Jisu hau, nieko puo teigei kekho ngukecü mhie di, puo la tsur zotuo” sishü.

¹²Süsie uko Oliv ükezha kijüthou geinu Jerusalem nu la vorta, süu Jerusalem kepenuoki ba, sabat nhie chatuo chie mese kipuo zo.

¹³Sidi uko nadiu nu lelie tse, uko kibou peso-u gei kholie, süko Pitor, Johan, Jakob mu Andria, Filip mu Thoma, Bartholoma mu Mathi, Alfia nuou Jakob, Simon puo Rhiekechüu, mu Jakob nuou[2] Juda.

¹⁴Hako pete u khapie kechachü temo bata, thenuko huo mu Jisu zuopfü Maria tsiu puo siezeko rei sa di.

¹⁵Süteiki Pitor-e kepeleko[3] donu siethalie (uko kro-u mia krie puo di mepfü mese ba) di sie,

¹⁶“Kezenuoko[4], ketholeshü dieu chü tsei morosuo, süu Kemesa Ruopfüe David tie nunu pedzüperie Judas, Jisu tekecüko chathakeshüu dze pupiezhü.

¹⁷kekreilamonyü puo phrüpie u kro-u nu salietuo mu lietho hau nu puo ya pethopie tuo” isi.

¹⁸(Themia hau kesuo kechü nunu krakelie pie lietsa puo khrülie ru, puo süu nunu thutsu puo kesewa[5], mu puo se puo rie pete rüla parta.

¹⁹Jerusalem nu lhou keba pete süu si, süla uko ramia die nu lie süu üse, Hakeldama üdi kieta, süu Thezie Lie üsiya.)

²⁰“Kekreilamonyü Chieliko leshü nu: ‘Puo kiu bu ratalie, sünu baketuo miapuorei ba motalie lho’; mu, ‘Kekreimia puo bu puo tha nu kemeho-u chütalie,’ sidi thupiezhü.

²¹Süla Niepuu Jisue u donu kho mu keketuo ki puotei pete nu u ze seiketuo mia puo,

²²Johan dzülu khakeshü nunu sede di puo ze teigei sieketa ketso kengumia puo bu u ze di puo rheilakesie zhapu chü morosuo” sita.

²³Süla uko mia kenie Josef Barsaba, Justa ü reiyakezhau, mu Mathia unie za chieshü.

²⁴Sidi uko cha di sie, “Niepuu, no kehoupuo nou rei siya. Süla no hanie supuo kedaliete shicü hie ki pucie,

²⁵Judas-e puo ba nu votatuoü rüreiketa lietho-u nu mu apostel kechü nu puo sou nu[6] balieketuo la” sishü.

²⁶Sidi ukoe sünie la dapeshü, ru Mathia za nu parlie, mu puo pie apostel kerepuoko salie.