Read Angami Naga Mhakechüko 10 Bible Online

Mhakechüko 10 - Angami Naga bible

Mhakechüko 10

¹Kaisaria nu Kornelia ücü puo Itali Rüpfhünuo ükezha nu krie mhokezha chü ba.

²Puo puo kepele nu pecü phi di puo kikru pete ze Ukepenuopfü khrü prei; mu puo mha pie mia tsü mia za phiya mu sidi Ukepenuopfü ki cha sei baya.

³Khunhie thehesie keba se mese ki puo ziemho ngu mecümecie, mu Ukepenuopfü dieliemia puo vor puo kie di, “Kornelia” sita.

⁴Sitse puo puo michiepfü puo meho terü di sie, “Niepuu, kedipuo ga?” sita. Puo sie, “N kechako mu n mhazako si kho Ukepenuopfü tso bate.

⁵Mu no tsie mia ketsepie Jopa nu shü di Simon Pitor üyakezhau kieliecie,

⁶puo vo chüzhü chüyakezha Simon ükecü dzükezha khie bayakezhau ki nu ba ho” sita.

⁷Teigeidielie puo rüchükeshüu tuota tse, puo puo kituomia kenie mu puo lie chü bayakezha chüpahi kepecü puo sa kielie,

⁸sidi mha pete uko ki pushükewa sie uko ketsepie Jopa nu shüshü.

⁹Süsienhie thehe mese ki uko rüve nadiu penuo vokezhü ki, Pitor kecha chütuoü di ki mho gei kho.

¹⁰Süki puo va merü di mha huo cü nyüta; sidi mia mha kese keba ki, puo ziemho mhiekecü nu vorta.

¹¹Puoe tei kokeshü ngu mu pfhe kezha puo, puoke diako khe di petepie kijü keshü ngu.

¹²Süu nu kijü nu khunuo phidiapfü, puolhekechü khunuoko mu pera neiü tuo di ngulie.

¹³Süki mha pfhe puo sie, “Sielie, Pitor; dukhrilie di cülie” sita.

¹⁴Derei Pitor sie, “Sisuomu, Niepuu; a mhakipuorei kenyükecü morei mesakemo vie cüya chie mocü la” sishü.

¹⁵Mha pfheu va kenieu puo ki, “Mha kehoupuorei Ukepenuopfüe chü kemesawaketau no süu kenyükecü vie isuo” sita.

¹⁶Va se sükemhie chüshü di mha süu se teigei la mhai khota.

¹⁷Sitse Pitor ziemho hau ca lelie mo di puo kemha chüpfü keba ki Korneliae ketsekeshüko vor tsolie. Ukoe Simon nu ketso vor care ki thata.

¹⁸Ukoe mia kieshü di Simon, Pitor ükezhau sünu ba momo shicü ketso.

¹⁹Süki Pitor ziemho-u ca kedipuo shicü le ba tse, Ruopfüu sie, “Harie, mia se n pfhü tuo ho.

²⁰Sielie di kelie, mu kenoudo mo zo di uko ze volie; a uko ketsekeshü la” sita.

²¹Süla Pitor ker süko ki, “Nieko mia puo pfhüketuou a we, nieko kedipuo la vorzhü ga?” idi ketso.

²²Uko sie, “Kornelia krie mhokezhau, miatho puo mu Ukepenuopfü khrü preiyakezhamia puo, mu Judamia seyie pete mhodzü thetshe kepfümia, kemesa teigeidieliemia puoe puo bu n kie ze puo ki vo di no kedipuo pushütie shi rünyünu shülie” si.

²³Süla Pitor uko kie ze kinu lelie di uko pesolie. Süsie nhie puo sie di uko ze vota, mu Jopa nunu kepelemia[39] huo puo ze vo.

²⁴Süsie nhie uko vo Kaisaria tsolie. Korneliae uko merü di puo kicükinumiako mu puo khriethokhriechüko kie ze vo ba.

²⁵Pitor vor tse Kornelia puo ze kese, ru puo mhodzü ki khoutoulie di puo rüsuota.

²⁶Derei Pitor puo phoulie di sie, “Sie thalie, a rei themia zo” ita.

²⁷Mu chatuo chakhrie puo ze kerüchü di kinu le, ru sünu themia kekra kengu ba ngulie,

²⁸sitse puo uko ki, “Nie thuo zorei Judamiae vo Judakemomia ze kepekro morei süko kitiekinu leya kemo si ba, derei Ukepenuopfü a bu miapuorei le perhu, morei thita hienucü tha a kie.

²⁹Süla a keliekeshü kize, a mhapuorei panya mo zo di vorte. Süla nieko kedipuo la a kelie shiü a ki pushütuo mo?” sita.

³⁰Sitse Kornelia sie, “Zha dia voketa ki tsie mese thehesie keba se ki a ki nunu kechachü ba ru, pfhenei kekra se di mia puo vor a mhodzünu thalie.

³¹Sitse puo sie, ‘Kornelia, n kecha rünyüliete mu no mha pie mia tsü mia zakecü si kho Ukepenuopfü tso bate.

³²Süla mia ketsepie Jopa nu shü di Simon, Pitor ükezhau kieze n ki vorliecie; puo vo dzükezha khie keba chüzhü chüyakezhau Simon so chü ba ho!’

³³Süla a kenourhei mia ketsepie n ki shü mu no vorcü vi sewe. Siro tsie hieko n ki nu Niepuu n ki pukecüko rünyütuoü vor Ukepenuopfü mhodzünu ba phrewe” sita.

³⁴Sitse Pitor tiehie sie: “A tsiewe Ukepenuopfü miapuo gei rei puo nei si kreiya mocü siliete,

³⁵derei seyie kehoupuonurei puo khrü prei di puo mhodzünu puotouu chükezhamia puo neiyakecü si touliete.

³⁶Puoe dielie ketsepie Israelko ki shü di, Jisu Khrista, peteko mho Niepuu zo, puo geinu vitho pie pethakeshü nie-e si batuo.

³⁷Nie dielie süusü Johan-e dzülukepfü dze pupie mia pethakecü sienu Galil nunu sede di Judia peteko nu pu vokecü si batuo:

³⁸Süusü Ukepenuopfüe Kemesa Ruopfü mu puo kekuo kha puo geishü di puo kenhekelieu Nazaret Jisu dze zo; puo lukihaki vo mha kevi chü mu terhuo kesuoko bu u keyhukezhie ze tuoketa khe chü keshürhoshü, Ukepenuopfü puo ze ketuo la.

³⁹Siro puo Judia mu Jerusalem kijü peteko nu mha chükeshü khe zhapuko sü hie zo. Ukoe sei geinu puo gou dukhriwa;

⁴⁰derei Ukepenuopfüe zha se nhie puo chü perhei lalie di puo bu vo,

⁴¹themia pete monyü Ukepenuopfüe zhapu la kedakelie hieko rübei mhingu chüshü, mu puoe kesiako donu nu rhei la sieketa sie rei hie puo ze mhacümhakrie zo.

⁴²Mu Ukepenuopfüe puo kedapie puo bu kerheiko mu kesiako nyie pepiketuou ükecü dze pu mia pethanute.

⁴³Sizomonyü puo pelekelie khe puo za nunu kephouma va lalieketuo siedzekesiko pete rei puo zhapu chü vor zo” sishü.

⁴⁴Siro Pitor diepu ketha nu Kemesa Ruopfüu die süko kesi khe gei vorta.

⁴⁵Süki Pitor ze kevor zhürekepfümia pelelieketakoe, Judakemoko gei rei Kemesa Ruopfü rushüketa la u ngota,

⁴⁶kekreilamonyü ukoe pfheneiü se mha pu di Ukepenuopfü tshe phikecü siketa la. Sitse Pitor sie,

⁴⁷“Themia hako rei we ngulieketa tuoi Kemesa Ruopfüu ngulieta liro uko dzülupfükecü kekha huo ba me?” sita.

⁴⁸Sidi puo uko bu Jisu Khrista za nunu dzülupfülienuwata. Sitse uko puo bu zha huoyo uko ze sa banu di chata.