Read Angami Naga Mhakechüko 11 Bible Online

Mhakechüko 11 - Angami Naga bible

Mhakechüko 11

¹Judia nu keba Apostelko mu kepelekoe[40] Judakemoko rei Ukepenuopfü dieu lielieketa silie.

²Süla Pitor-e Jerusalem nu vorlie tse zhüremiako puo ze kemeü di

³sie, “No kiüdi zhürekemoko ki vo uko ze mhacümhakrieta ga?” sita.

⁴Süla Pitor sie uko ki süu dze pu kemenuoshütuoü di sie,

⁵“A Jopa nadiu nu kecha chü keba ki, a sie si mozhü di ziemho puo ngu. Ru mha puo, pfhe kezha kemhiekecü puo, puoke diako pete khe di teigeinu kerünuo se tsur a khieki balieta.

⁶A süu meho menuoshü tse sünusü nhachü phidiapfü, mha tekecü nhachüko, mu puolhe kechü goutuoyakezha khunuoko mu teirako rei tuo ngu.

⁷A mhapfhe puorei a ki pu sakecü, ‘Pitor, sielie; dukhrilie di cülie.’ icü si.

⁸Derei a sie, ‘Suotuomu, Niepuu: Kekreilamonyü kenyükecü vie morei mesakemo puorei se a me nu shüya momu’ sishü.

⁹Sitse va kenieu rei teigeinu mhapfheu la sie, ‘Ukepenuopfü chü kemesawaketau, no rhu üdi pu hie’ si.

¹⁰Mha hau va se chüta, süsie süko pete shüse teigei khota.

¹¹Sütei touki Kaisaria nunu ketsekeshü mia seko vor a kebachüu tsolieta.

¹²Mu Ruopfüu a bu mhapuorei kenoudo mo zo di uko ze volienuta. Jopa nunu kepelemia sorou a ze kepeza di themiau kinu volie.

¹³Sitse puo hieko ki puo kimhie di teigeidielieu ngu shi mu süu puo ki mha pu di, ‘Mia ketsepie Jopa nu Simon Pitor ükecüu kishü di puo ze vorcie;

¹⁴puo n ki die pushütuo mu süu la no mu n kinuko pete kelalietuo’ siketa pushü.

¹⁵Mu a diepuvü tse hadzü u gei chüketa tuoi, Kemesa Ruopfüu uko gei tsurta.

¹⁶Süki Niepuu thiedzü pukeshü, ‘Johan dzü nunu mia dzülu khashü, derei nieko we Kemesa Ruopfü nunu dzülupfütuo ikeshü dieu rükralie.’

¹⁷Siro hadzü u Niepuu Jisu Khrista pelelie tse Kemesa Ruopfü methuo pie u ketsü touu pie uko rei tsü liro, a supuo di Ukepenuopfü khalietuo ga?” sita.

¹⁸Uko hau sikelie ki, uko kemekriezeita. Mu uko Ukepenuopfü tshe di sie, “Ukepenuopfü thuo Judakemoko bu rei kerhei nu volieketuo la thenou kedikelie pie uko tsüshüte” sita.

¹⁹Kepechü sier di Stefan dukhrikewa ki kepelemiako phruo kecürepie lukihaki keshü nu uko huomia Foinikia, Kupra mu Antiok nu vo di dieu pie Judako ki rübei pu.

²⁰Derei huomia Kupra mu Kurini nunu kevorko Antiok nu vo di Grik die puyakezha Judako ki rei Niepuu Jisu dze pushü.

²¹Niepuu dzie uko zetuo mu themia kekra pelelie di rürei Niepuu kitsa vorta.

²²Thedze hau Jerusalem kehou tsota, süla uko Barnaba ketsepie Antiok nu shü.

²³Puo vo di Niepuu ngukemezhieu ngu di puo nei phita; puo uko pete bu thenou pete se dietho di Niepuu kitsa chüsechü tha zolienu tarhoshü.

²⁴Puo themia kemezhü puo, Kemesa Ruopfü, mu kepele puo tshupfü di mia kekra ze Niepuu ki vorlie.

²⁵Süsie Barnaba-e Saul pfhü Tars nu vo,

²⁶sidi vo puo ngulie tse, puo ze Antiok nu vor di ciete puo sünu kehouu ze ba di mia kekra pethashü, mu Antiok nunu pethakelieko üse, “Khristamiako” idi kielie kerietho chü.

²⁷Süki Jerusalem nunu siedzekesimia kro puo Antiok nu vor.

²⁸Uko mia puo puo za Agaba ükecüu siethalie di Ruopfü kekuou nunu sie, kijü pete nu pekrie kemeriekecü puo vorketuo dze pu, mu süu Klaudia kedi teiki chü.

²⁹Siro pethakeliekoe Judia nu keba kepeleko[41] khruohiketuo la u thuo chülie keviu ketseshüketuo pepilie;

³⁰uko hau chülie di Barnaba mu Saul unie dzie nunu ketsepie phichüko tsüshü.