Read Angami Naga Mhakechüko 12 Bible Online

Mhakechüko 12 - Angami Naga bible

Mhakechüko 12

¹Süteiki kediu Herod kehou nu huomia pechüta.

²Puo zhiecha pie Johan dzürieu Jakob dukhriwa.

³Puo hau chükeshü Judako u neikecü ngulie tse, puo Pitor rei telieketuo la mhachü vota. (Hau Khreiüse shükemo Niekhrüda nyi teiki.)

⁴Puo Pitor telie tse, puo khapie kedieki nu shüwa, sidi chüpahimia, kro dia bu ketherü puo pfhenushüwa, Ciekevonyiu tseiketa sienu puo ze themiako mhodzünu kevo le ba.

⁵Siro Pitor kedieki nu keba ki kehouue puo la Ukepenuopfü ki cha u rhiechü ba.

⁶Herod-e puo ze parketuo mhodzü zhü Pitor-e rükhoumia kenie donu thegiro kenie pie puo khepfü di zhü, siro rükhoumiako kikha mhodzünu kedieki pfhe tha.

⁷Sitse le mo keba nu Niepuu dieliemia puo mhai vor thalieta; mu kezie puo kibouu va ziekruoita. Süki teigeidielieu Pitor tsei kepfhüshü di puo kesoulie di puo ki, “Mhai sielie!” si. Sishü tse dziekha ronie Pitor geinu rülhouta.

⁸Süki teigeidielieu sie puo ki, “N chie phalie mu n phikou nyülie” sita. Süla puo sükemhie chülie. Sitse süu sie puo ki, “N pfhe chü dzielie di a siemedzilie” sishü.

⁹Pitor tuo pa di puo siemedzi vota; derei teigeidielieu chükeshüko ketho ücü le tuo mo, ziemho nu mha ngu zo nhiemu iketuo zo.

¹⁰Sidi unie keze rükhouko tha kerieu mu kenieu cie vo di chatse ze nadiu kevatsa thegi careu nu vorlie. Ru careu puo thuo puo khrüpie unie tsü di unie bu parta; süki teigeidielieu lekemo nu puo khawata.

¹¹Süzenu Pitor puo sie silie di sie, “Tsiewe Niepuu puo thuo Herod dzie nunu mu Judako mharhü pete nunu a kelashütuoü di puo dieliemia ketseshüketa a si touliete” sita.

¹²Puoe hau lekelie sie, Johan puo za kekreiu Marknuo zuopfü Maria kinu vo, sünu mia kekra keze di kechachü ba.

¹³Pitor chazou kikhau ketoukeshü ki, Rhoda ükecü mia thekepfü puoe mehotuoü di par.

¹⁴Puoe Pitor pfheü sishü tse puo neithorta mu kikhau khrüshü mo di ta la le di Pitor vor kikha ki thata ücü pushü.

¹⁵Sitse uko puo ki, “No nyate nhie ha!” sita. Derei puo süu ketho zo ücü pu beita. Uko sie; “Süu puo khrümvü puo zotuolie” isita.

¹⁶Süki Pitor kikhau ketou tha zota; mu uko kikhau khrüshü tse, puo ngulie di u ngota.

¹⁷Sitse puo dzieziepie uko bu melie hienu di, Niepuu kimhie di kedieki nunu puo ze parshü shicü dze uko ki pushü, sidi puo sie, “Hau pie Jakob mu kepelemiako[42] ki pushücie” ishü di puo tuo mharapuo vota.

¹⁸Teiso par tse, Pitor kedikipuo vote shicü silie mo di chüpahiko donu kebvükebou phi bata.

¹⁹Sitse Herod puo pfhü pejüketa ki, puo rükhouko ketsokegashü di uko dukhriwanuta. Sidi puo Judia nunu Kaisaria nu vo di sünu bata.

²⁰Süki Herod-e Tur mu Sidon themiako gei puo nei mo phi baya. Süla uko keze puo chü di vor; kediu kituo kezhau Blasta rüchülieketa sie, ukoe kediu kijü nunu kecükekrieko ngulieyakezha la, puo ki vitho chata.

²¹Siro zha chiekeshü puo nhie Herod puo kedi pfheneiko selie di kedibau gei balie, sidi themiako ki die pushü.

²²Sitse themiakoe temo shiekhoui di “Themia monyü terhuomia pfhete” isi bata.

²³Derei puo Ukepenuopfü tshe mokecü la Niepuu dieliemia puo thuo vapuonu Herod kepfhükhrüwa, sidi zochü bu puo cü khriwata.

²⁴Derei Ukepenuopfü dieu we kezazhü zo mu puo kezemia kra memielieta.

²⁵Süsie Barnaba mu Saul unie mhatho chü tseiwa di Johan Mark ükezhau zelie di, Jerusalem nunu la vorta.