Read Angami Naga Mhakechüko 13 Bible Online

Mhakechüko 13 - Angami Naga bible

Mhakechüko 13

¹Süki Antiok kehouu nu siedzekesimia mu kepethamia huo ba. Süko Barnaba, Simeon Niger üyakezha, mu Kurin nunu kevor Lukia, Manaen ücüu Herod kediu kiu nu tsüphrü puo mu Saul isi.

²Uko Niepuu rüsuo mu mevo keba ki, Kemesa Ruopfüe sie, “A la Barnaba mu Saul nie kelakreipie unie bu mhatho chüketuo la a unie kiekelieu nu shüliecie” sita.

³Süsie uko mevo mu cha ba di uko dzie yhapie unie geishü di unie ketseshüwa.

⁴Süsie Kemesa Ruopfü unie ketsekeshü tuoi unie Selukia nu ke, sünu nu rou ze di Kupra nu vota.

⁵Unie Salami nu vorlie tse, Judako sinagogko nu vo di Ukepenuopfü dieu pie mia petha. Mu unie kekhruohi la Johan Mark rei ze tuo.

⁶Sidi uko kijü rüchütsokemo pfüthe tsei se Pafos nu vorlie ru sünu Bar-Jisu ükecü Judamia ketijü siedzekesi themoumia puo ze keselie.

⁷Puoe sünu kezhau Sergia Paul ükecü mecie phikecü puo ze baya, mu puoe Ukepenuopfü dieu rünyü nyü di Barnaba mu Saul unie kiepie puo ki shü.

⁸Derei themouu Elimae (puo zau kelakeshü nu siya) kezhau kepele shükereikewa le bei di unie petsou.

⁹Derei Saul, puo üse Paul rei üketau Kemesa Ruopfü bu puo tshupfü di themou süu meho terü,

¹⁰di sie, “No terhuokesuo nuou, kemiatho pete ngumvüu, kecürü neiü mu kerüzhü kheko se n tshukepfüu, no Niepuu cha kemezhüko chü kerüpfhikecü khawalie lho le?

¹¹Mu rünyüshücie, tsie Niepuu dzie n petsouya; mu no dopuo n mhi cie di niaki kezie ngu mo batatuo” sishü. Sishü mumetha mha puo tsur puo mhi zepfülie di zeibouita, sitse puo huomia bu puo dzie teshülienu di phi mu phi tuota.

¹²Sitse kezhau mha sükosü chüketa ngu di Niepuu die pethakeshü la puo ngo di pelelie.

¹³Paul mu puo zeko Pafos nu rou nunu tuoshü di Pamfilia kijü Perga nu vorlie, Johan Mark thechü süu nu unie khawa di la Jerusalem nu vota.

¹⁴Derei unie Perga nunu tuo zo vo Pisidia kijü nu keba Antiok tsolie. Mu sabat nhie sinagog nu vo balie.

¹⁵Siro thezho leshüu mu siedzekesiko leshüda nunu phrükeshü sie, Sinagog nu kehou keseyakezha dielie puo ketseshü di sie, “Hie kezenie, nnie mia nou chü peluoketuo die huo ba liro pushücie” sita.

¹⁶Sitse Paul siethalie di puo dzieziepie di sie: “Nie Israelmiako[43], mu Ukepenuopfü keprei themia kekreiko, rünyüshücie.

¹⁷Themia Israel hako Kepenuopfüe thiedzü u puonuoko kedalie mu Ijiptmia kijü nu ketuo ki uko chü pezha phishü, mu puo dzieziepie sünu nu uko ze parlie.

¹⁸Sidi puo cie hiedia mese rayha nunu uko theke vor.

¹⁹Puo Kananmia kijü nu seyie thenie penyüshü di puo uko bu kijü süu;

²⁰teicie kriedia di hiepengou mese welie. Süsie Samuel siedzekesiu lhou sier kemochie puoe capimia bu uko mhokezha chü vor.

²¹Süusie uko kedimia puo chata; sitse Ukepenuopfü Benjamin yie geinu Kish nuou Saul pie uko tsü di puo bu cie hiedia kedi chü.

²²Puoe süu chükewa sie, David bu uko kediu chü lalie. Sidi puoe süu zhapu chü di sie, “A Jese nuou David, themia a nou kele touu nguliete, puo a medo kheko chüshüketuou zo” si.

²³Sidi themia hau yie geinu Ukepenuopfü pupiekezhü kelakelieu Jisu bu lhou Israelko ki vor;

²⁴puo kevor mhodzü, Johan-e Israelmia pete bu thenou kedikelie dzülupfülienu di petha.

²⁵Johan puo mhatho chü tseiwatuoükezhü ki puoe sie, ‘Nieko a üse supuo üya ga? A themiau mo. Mo zo, derei mia puo a sie vorzhie; a zowe puo phikoupha rei phreilie sü mo’ sita.

²⁶“A kezeko, nie Abraham geinu kevor yiemiako, mu Ukepenuopfü keprei themia kekreiko, kelakelie die hau ketsepie u tsüshüwe.

²⁷Kekreilamonyü Jerusalem nu kebako mu uko krütako puo silie mo, mu sabat metsei siedzekesiko die phrüya ürei uko puoca silie mo, sidi puo pejokewa geinu siedzekesimia die chü tseilie.

²⁸Puo sia kezhü ca puorei ngulie mo, derei ukoe Pilat bu puo dukhriwanu cha.

²⁹Puo dze thupiekezhü kheko chü tseikewa sie, ukoe krus geinu puo lhouse kerlie di pie vo mekou puo nu shüwata.

³⁰Derei Ukepenuopfüe kesia nunu puo chü perhei laliete;

³¹mu teisozha kekra puo ze Galil nunu Jerusalem nu kekhoko pengushü, themiako mhodzü sükoe tsie puo zhapumia chü ba.

³²Siro hie Ukepenuopfüe u puotsanuoko ki phrakeshü dieliekeviu se nieko ki vorya,

³³Jisu chü perheikelie geinu úko, süko nuonuoko, teiki nu chü tseiliete; süu Chieliko leshü kenieu nu rei, ‘No a nuo zo; A thie n penuoshü’ idi thupiezhü.

³⁴Mu kesia nunu puo chü perheikelieu liro puo bu cieürie lalie lhoü di zo; puoe hai di pupiezhü, ‘A David ki kemesa die phrakeshüko se n tsütuo’ si.

³⁵Süla puo chieli kekreipuo nu rei pukecü, ‘No n Kemesau pie puo bu cieürietalie lho zo’ si.

³⁶Kekreilamonyü David-e Ukepenuopfü medo ze di puo thuo puo teiki themiako lie chü tuo di sia; mu puo puotsanuoko ze di khruwa, sidi cieürieta;

³⁷derei Ukepenuopfü, kesia nunu puo chü perhei lakelieu, we cieürieta mo.

³⁸Süla a kezeko, nieko si touliecie, themia süu geinu, kephouma vakelie se nieko pesiya;

³⁹siro nie kehoupuorei Jisu pelekelie nunu Mosa zho-u nunu phreishülie kenjükecü kephouma pete phreishüwate.

⁴⁰Siro thiedzü siedzekesiko pupiekezhüko bu nieko gei vor molieketuo la nie kireiliecie:

⁴¹‘Harie, mia krekezhako! nieko ngo di katacie, kekreilamonyü a nie kelhou ki, huomia se nie ki pu zoshierei nie pelelie kelho mhatho chü ba zo’ ” si.

⁴²Süsie Paul mu Barnaba unie tuotazhü tse, mia unie bu hasieu Sabat nhie rei die hako pu lashünu unie ki chata.

⁴³Themiako sinagog kehou nunu tuoketa sie Judako kekra mu pecü se di Judamia zho zeketako kekra Paul mu Barnaba nie medzi vorta, sidi unie uko ze kerüchü mu uko chü kethepfu di uko bu Ukepenuopfü ngukemezhieu nunu lhou ba zolienushü.

⁴⁴Süsieu sabat nhie nadiu nunu themia pete khre Ukepenuopfü die rünyütuoü vor kengulie.

⁴⁵Derei Judakoe krodiu ngu tse uko rota, mu uko diepfhü dierhu pu di Paul diepuko rei petsoukecü puta.

⁴⁶Sirei Paul mu Barnaba unie diepu thepfukuo sa di, “Hie Ukepenuopfü dieu pie nieko ki pu rie morosuo; sirei nieko süu meliekegewa di nie thuo nie chüpie kechachie kerhei ngulie sü moüketa la, hie tsie Judakemoko ki votazhie.

⁴⁷Kekreilamonyü Niepuue hie bu silienuya, di sie, ‘A n bu Judakemoko la kezie puo chütuo üdi kela kreiliete, sidi n bu kijü vala ketso rei mia kelalieketuo la’ ” sishü.

⁴⁸Siro Judakemoko hau sikelie ki, uko nei phita di Niepuu tsheta; mu kechachie kerhei la kedalieketako kekra pelelie.

⁴⁹Sidi Niepuu dieu rüna sükhiesümhou pete nu keza vota.

⁵⁰Derei Judakoe thenu thetsei pecü di rüsuoyakezhako tsiu nadiu nu pehüko ketshüshü di süko bu Paul mu Barnaba unie pechüketuo pfükerhüshüta.

⁵¹Sitse unie unie phi geinu nyopheko kepfhüwa di tuo Ikonia nu vota.

⁵²Siürei pethakelieko zowe kenei mu Kemesa Ruopfü bu u tshupfü bata.