Read Angami Naga Mhakechüko 14 Bible Online

Mhakechüko 14 - Angami Naga bible

Mhakechüko 14

¹Siro sükemhie di Ikonia nu rei Paul mu Barnaba unie Judamia Sinagog nu le diepukeshü ki Judamia mu Grikmia kekra rei pelelieta.

²Derei pele kemvü Judako Judakemoko pfükerhüshü di uko bu kepeleko petsou sierta.

³Süla unie telhe sünu bata, mu thepfu se di Niepuu dze pie pu, puoe unie geinu zasiko mu ungomhathoko chülie kevi khashü di puo mia ngukemezhie dieu ketho zoükecü zhapu chüshü.

⁴Derei rüna sünu themia kro kenie chüta; huomia Judako kitsa mu kekreiko apostelnie kitsa thata.

⁵Mu Judako mu Judakemoko, krütako ze di unie pese mu ketsie pie unie vaketuo rhülie,

⁶apostelnie süu silie tse ta Likaonia kijübou nu Lustra mu Derbe rünanie mu sonuoki keba rünako nu vota,

⁷di unie süko nunu dieliekeviu pu petha tuota.

⁸Lustra nu mia puo, penuolie tse nunu puo phi suota di mhakipuorei chatuo chiekemo kerünyiemia puo ba.

⁹Puoe Paul diepu rünyü ba. Paul-e puo mehotershü, mu puoe shürholieketuo kepele keba ngushü.

¹⁰Ru puoe melie puo rhiechü di, “Sielie di n phinie pie thaliecie!” sishü. Sitse themiau karhü sie di chatuota.

¹¹Krodiue Paul chükeshüu ngu tse Likaoniamia die nunu shie u rhiechü di, “Terhuomiako themia rhi chüpfü di ker u ze tuote” sita.

¹²Sidi uko Barnaba üse Jupiter üdi kie, mu Paul üse Mercuri üta, kekreilamonyü puo die pukuocü la.

¹³Siro Jupiter zievo-u rüsuokiu nadiu khie care sie ki ba[44], ru thudo mu nyiepou cüko se care ki vor; puo mu krodiue ruosuo chüpie unie tsütuoü di.

¹⁴Siro apostel Barnaba mu Paul süu si tse, unie pfhenei cierha di krodiu donu vo shiekhoui di sie,

¹⁵“Kezeko[45], nieko kiüdi hau chüta ga? Hie rei nie kemhie themia ze, mu hienie nie bu mha kemethuo hako nunu rüreise rheituoyakezha Ukepenuopfü, tei, kijü, dzükezha mu sünu ketuo pete chükeshüu ki volieketuo la dieliekeviu se kevor zo.

¹⁶Thiedzü puoe themia pete bu u thuo u medo-u chü tuota zo;

¹⁷derei puo teigeinu tei perüshü di puo si rüchülieketuo teiko rhie kekreishü di kecüca se nie ketshukelhuo chüshü tsiu thenou kenei pie nie tsü di mha kevi kechü nu puo thuo puo zhapu chü baya zo” sita.

¹⁸Puo die hako pu zorei krodiu ruosuo chüpie unie tsüketuo kha re se di khalie.

¹⁹Derei Antiok mu Ikonia nunu Judamia huo vor di themia kro-u hüpie uko kitsa shülie. Sidi uko ketsie pie Paul vata mu puo üse siata üdi puo merhashü casie prawa.

²⁰Derei kepelemiako puo houpfü tha ru puo sielie di tuo la nadiu nu leta. Süsie nhie puoe Barnaba ze Derbe nu vota.

²¹Paul mu Barnaba nie dieliekeviu pie Derbe nadiu nu pethashü di themia kekra bu pethakeliemia chülie, süsie unie la Lustra nu vor di tuo Ikonia mu Antiok nu vota.

²²Sünu nu unie kepelemiako chü kemeteishü mu kepele nu thepfuthalienu di sie, “We Ukepenuopfü kedi nu leketuo la kepechü kekra ze kese morosuo” idi pethashü.

²³Süsie unie-e kehou puopuo nu uko la phichümia keda phreshü di cha mu mevo di uko khapie ukoe puo pelekelie Niepuu dzie nu shüwata.

²⁴Süsie unie Pisidia pfüthe Pamfilia kijü nu vorlie.

²⁵Sidi unie Perga nu dieu pie pethakewa sie Atalia nu keta,

²⁶mu sünu nu unie rou zelie di Antiok nu la vota, rüna sünu nu Ukepenuopfü ngukemezhie mhatho-u chünushü, mu unie-e süu chü tseiwata.

²⁷Sidi unie sünu vo tsolie tse kehouu nu themiako kie kengulie di Ukepenuopfü unie ze mha chükeshü pete mu kimhie di Judakemoko bu pelelieketuo chau khrüshü shicü dzeko pushü.

²⁸Sidi unie puotei huo sünu pethakelieko ze bata.