Read Angami Naga Mhakechüko 15 Bible Online

Mhakechüko 15 - Angami Naga bible

Mhakechüko 15

¹Süsie Judia nunu mia kro puo ker di kezeko petha di sie, “Mosa zho tuoi nieko zhürelie kemosie nie kelalie kenjü” sita.

²Süki Paul mu Barnaba unie süko ze kemeü da mota tse, Paul mu Barnaba unie bu kekreimia huo sa di hau la kho Jerusalem nu apostelko mu kehou nu phichüko ze kerüchüketuo petholie.

³Süla kehoue uko ze vo cha nu shüshü mu ukoe Foinikia mu Samaria pfüthe vo, ukoe Judakemoko u nou kedikelie dze pushü, süla kepelemiako[46] u nei phita.

⁴Uko vor Jerusalem tsolie tse, kehouu, apostelko mu phichüko u nei phi di uko zelie, mu ukoe Ukepenuopfü uko geinu chükeshüko pete se uko ki pushü.

⁵Derei kepelemiako huo, Farisiko rüla zeyakezhako siethalie di, “Uko bu u zhüre morosuo, mu uko bu Mosa zho-u medzi morosuo zo” sita.

⁶Apostelko mu phichüko vo kese di süu dze kerüchü.

⁷Sidi kerüchü sekewa sie Pitor sie thalie di uko ki, “A kezeko[47], nieko rei si batuo, Ukepenuopfü a bu dieliekeviu pie Judakemoko pethashü di uko bu pelelieketuo la therieki nieko donu nu a kedalie.

⁸Siro Ukepenuopfü themia nou siyakezhau u gei chükeshü tuoi Kemesa Ruopfüu pie Judakemoko rei tsükeshü geinu puo medo-u zhapu chüshüta zo;

⁹mu kepele se u nou chü kemesakecü nu puoe u mu uko donu mhapuorei chü kekrei mo zo.

¹⁰Siro kiüdi u puonuoko rei mu we rei pfülie kelho vocieu pie pethakelieko vo geishü di Ukepenuopfü dojüya ga?

¹¹Sizomonyü we rei Niepu Jisu u ngukemezhie lanu süko tuoi kelakelie ngukelie pele ba ze!” sita.

¹²Sitse kehouu pete zeita di Paul mu Barnaba unie geinu Kepenuopfüe Judakemoko donu zasi mu u ngo mhatho chükeshü dzeko rünyü u neisiei bata.

¹³Unie die puthewa mu Jakob sie, “A zeko[48], a pfhe rünyüshücie!

¹⁴Ukepenuopfü puo thuo puo za la Judakemoko donu nu mia kro puo kielietuo üdi uko ki vo riekecü dze Simon-e pushüte.

¹⁵Siedzekesiko kepu rei die süu ze kerhe tou zo, süu dze,

¹⁶‘Hau sie a rürei la vortuo, sidi David ki tetsuketau a chü lashütuo; a puoco mu razhüketako nunu phou lashütuo, sidi süu tou la se sielietuo,

¹⁷sitse themia kekrei pete, tsiu Judakemoko a za se kietuoketa pete bu Niepuu pfhülietuo. Niepuu hakemhie puya, mha hako pete chükeshüu,

¹⁸thiedzütho nu pie pesishütuote.’[49]

¹⁹Süla a nou kele, uko rei Judakemoko rürei la Ukepenuopfü ki vorkelieko keyhu la zhü mo,

²⁰derei we themia süko bu terhuorhi la rhuketako, pierüü nunu, mu chakhrikecü nunu, tsiu thezie cü hienukecü leshü puo thushüwa khe.

²¹Kekreilamonyü thiedzütho nu rüna neiüko nunu sabat nhie Sinagog kheko nu Mosa zho-u phrü di pupie mia petha tuota ze ru,” sita.

²²Sitse apostelko mu phichüko, tsiu kehou peteu rei sanyü di, uko donu nu huomia kedalie di Paul mu Barnaba unie ze Antiok nu votuoü pepilie. Sidi uko kepeleko donu krütanie Juda Barsaba ükezhau, mu Sila unie ketseshü,

²³mu leshü hau sa ketseshü: “Hie apostelko mu phichüko mu nie kezekoe[50], Judamia mo di penuokelie Antiok, Siria mu Kilikia rünako nu keba kepelemiako pete kelushüzhie.

²⁴Hieko mhapuorei pushü mo zorei hie donu nu mia huo vor nie keyhu mu nieko nou chü pesuokecü dze siliete,

²⁵süla hieko kenourhe di hie sou mia kenie kedapie unie bu Barnaba mu Paul,

²⁶u Niepuu Jisu Khrista zau la u phou rei khashükecünie ze nieko ki votuoü ketseshüzhie.

²⁷Sidi hie Juda mu Sila unie ketseshüya, mu unie rei hieko dieko se nie ki pushütuo ho.

²⁸Süla Kemesa Ruopfüu rei mu hie rei nieko bu medzi morokesuo hako sie thepie kemesi kekrei puorei pie nieko gei sashü mo ro viketuo lete.

²⁹Süu mhapie miarhi rüsuokewa vieko cü molie; thezie mu khunuo chakhrikewako cü molie mu pierüü chü molie. Nieko die süko ze balie liro vi zotuo. Keviu chü balie!” sishü.

³⁰Sidi uko ketseshüwa mu uko bu Antiok nu vota. Siro uko vo kehouu kie kengulie di leshü pie uko tsüshü.

³¹Süki tsüphrüko süu phrüshü tse, tarhokeshü dieko la u nei phita.

³²Juda mu Sila unie rei siedzekesimia ze ru mha kekra pupie kepeleko[51] chü kethepfu mu chü kemeteishü.

³³Sidi uko puotei huo sünu bakelie sie,

³⁴kepelemiako unie bu keviu chü volienu di unie ketse lapie unie ketsekeshüko ki la shüwa.

³⁵Derei Paul mu Barnaba unie Antiok nu bata, mu kekreimia kekra rei ze sa di Niepuu die pupie mia kie mu pethashü.

³⁶Zha huo sie Paul-e Barnaba ki, “Avu la vo Niepuu die pie pethakeshü rünako mu kepelemiako[52] kedipuo mhie ba shicü mehoshü khe” sita.

³⁷Ru Barnaba-e Johan Mark ükezhau bu unie ze vo nyülie.

³⁸Derei Paul-e Pamfilia nunu unie ze mhachü mo mu unie khawa di tuoketau bu unie ze vo nyü mota.

³⁹Unie süu la kedie krei phita, sidi unie kekhota; Barnaba-e Mark zelie di rou geinu Kupra nu vota,

⁴⁰mu Paul-e Sila kedalie di kepelemiako[53] bu unie khapie Niepuu ngukemezhieu nu shü di tuota.

⁴¹Puo Siria mu Kilikia pfüthe vo di kehouko chü kemeteishü.