Read Angami Naga Mhakechüko 16 Bible Online

Mhakechüko 16 - Angami Naga bible

Mhakechüko 16

¹Süsie Paul rüve Derbe mu Lustra nu vo ru, sünu pethakeliemia puo puo za Timothi ücü puo ba, puo zuoe Judamiapfü di peleketapfü puo, derei puo puoe Grikmia.

²Lustra mu Ikonia nu kepelemiako[54] pete rei Timothi pu pevi phiya.

³Paul-e Timothi bu puo zetuota nyüta, süla puo bu puo zhürewa, sütsatie lhou keba Judakoe puo puoe Grikmia ücü si keba la.

⁴Uko rüve rünako nu kevo ki Jerusalem nu apostelko mu phichüko pepikelieko pie kepelemiako ki pu di uko bu süko chüüzelienushü.

⁵Süla kehouko bu kepele nu metei sakuolie tsiu teisonhie themia kra kechülie.

⁶Kemesa Ruopfüe uko bu dieu pie Asia nu pu mvüketa la tuo Frigia mu Galatiatsa vo.

⁷Sidi Misia kepetsoutsatie vorlie tse, uko Bithunia nu lekecü le sie, derei Jisu Ruopfüu uko bu sünu le mvüta.

⁸Süla uko Misia kijü pfüthe Troa nu vota.

⁹Süzhü Paul-e ziemho geinu Makedonia mia puo puo kie bei di sie, “Makedonia nu vor di hieko khruohishücie” isi ketha ngu.

¹⁰Paul-e ziemho süu ngu tse hieko Makedonia nu voketuo la dojülie, Ukepenuopfüe hie bu dieliekeviu pupie uko pethashünukecü la hie kie keba lelieketa la.

¹¹Hieko Troa nunu rou ze lelie di mezhü Samothra nu vo, mu süsienhie Niapoli tsolie.

¹²Hieko sünu Rommia vo rüna chü keba Makedonia nadi kemeyietho-u Filipi nu vorlie. Sidi hie zha huoyo nadi sünu bata.

¹³Hieko sabat nhie kharu sie pra di, kerü khieki kecha chüyaücü thechü puo nu vo, mu hieko sünu ba di thenumia kro puo vor kengu kebako ze kerüchü.

¹⁴Süki puo za Lidia, Ukepenuopfü rüsuoyakezhapfü puo, hieko die rünyülie; puoe Thiatira nadiu nunu vor mu pfhe meriemegekecü lhi chüya. Niepuu thuo puo nou chüshü di Paul die pukeshüko rünyü menuolie.

¹⁵Süpfü mu puo kinuko dzülupfülieta tse, puo hieko kie bei di sie, “Nieko a üse Niepuu kepelemiapfü puo üya ro, a ki nu vor batacie,” sita. Sidi puo hie bu vonu beita.

¹⁶Khunhie puo hieko kechachüu nu vokezhü ki, miadiemiapfü puo themou ruopfü zeyakezhapfü puo ze keselie, mu puo themou la raka kekra krapie puo niepumia tsülieya.

¹⁷Süpfü Paul hieko siemedzi shiekhoui di sie, “Themia hako Kerükrietho Kepenuopfü kituomia zo, kelakelie chau pie nieko ki puya” si tuota.

¹⁸Puo zha kekra si tuota. Hau Paul keyhu phiketa la reipra ruopfüu ki, “A Jisu Khrista za se n bu puo geinu partanuyawe!” sishü. Sitse bavüdo süki süu prata.

¹⁹Derei puo niepuko raka ngulieketuo cha ba moketa ngulie tse, uko Paul mu Sila telie di merhashü ze lhithochü nu kezhako mhodzünu vota.

²⁰Uko unie ze kezhako mhodzünu vor di, “Themia hanie-e u rüna kebvü bate; unie Judamia,

²¹mu we Rommia medzi morei zelie kesuo u zho kemo zenu pethaya” sita.

²²Süki krodi kepekrolie di unie petsou sierta, mu sorkari keseko unie pfhenei cierhawa mu mia bu seipie unie vüwanu die khashüwa.

²³Sidi uko unie vü pesuo phiwa di unie khapie kedieki nu bawa mu kedieki kepfheu bu unie pfhe menuolienushüwata.

²⁴Dielie hau ngukelie ki kedieki kepfheu phikha pie unie phi kekhawa di unie khapie kedieki kesoutho nu bawa.

²⁵Khisoteiluo Paul mu Sila unie kecha chü mu chielipie Ukepenuopfü tshe ba mu kedieko unie pfhe rünyü ba.

²⁶Süki kiükishü kemerie mhapuo chü vorta, mu kedieki mvüdzeko shükeniewa, mu kikhako shühie parta, tsiu kedieko phako rüprei phreta.

²⁷Kedieki kepfheu cosier ru kikha pete khrüpie ketha ngu di kedieko pete tate nhiecü le di, puo zhiecha zoupie puo thuo puo dukhriwatuoü thata.

²⁸Derei Paul shie puo rhiechü di sie, “No n thuo n pechü hiecie, hieko pete haki ba phre zo” sishü.

²⁹Kedieki kepfheu mi chalie di ta le mu pekhrukhru di tsu Paul mu Sila unie mhodzünu zhüta.

³⁰Süsie puo unie ze chazou pralie di sie, “Kezhanie, a kelalieketuo la kedipuo chü morosuo ga?” si.

³¹Sitse unie sie puo ki, “Niepu Jisu pelelie, sitse no rei mu n kinuko rei kelalietuo” sishü.

³²Sidi unie Niepuu die pie puo mu puo ki sünu keba pete ki pushü.

³³Süzhü teiluo kedieki kepfheu unie ze vo unie rüzapfüko pete khrüwa; sidi puo mu puo kikru pete dzülupfü mhalieta.

³⁴Siro puo unie ze puo kinu vo di kecüca pie unie tsü; puo mu puo kinuko pete u nei phita, puo Ukepenuopfü pelelieketa la.

³⁵Teisolie tse, kekuo keseko thenako ketseshü di sie, “Themianie khashüwacie” sita.

³⁶Süla kedieki kepfheu sie Paul ki, “Kezhakoe Sila nnie khashüwanu pu vorte; süla nnie parlie mu n nie nou mene di tuolie” sishü.

³⁷Derei Paul sie, “Uko hie nyie kecü mo di, hie Rommia zorei mechühou nunu hie vü di hie pie kedieki nu shüwa; sidi tsie pekhre hie kha lashüwatuoüya le? Mhakipuorei silie kenjü! Uko bu vor di hienie kha lashüliecie” sita.

³⁸Sitse thenako die süko se vo kekuokeseko ki pushü, mu uko unie Rommia zo ücü silie tse michieta.

³⁹Süla uko vor di unie ki u kejo chata. Sidi uko kedieki nunu unie ze parshü di unie bu nadiu nunu tuotanu cha beita.

⁴⁰Siro unie kedieki nunu parta tse tuo Lidia ki nu vota, di sünu unie üpfüko mu siezedzürieko[55] ngulie tse uko nou chü kethepfushü di tuota.