Read Angami Naga Mhakechüko 17 Bible Online

Mhakechüko 17 - Angami Naga bible

Mhakechüko 17

¹Paul mu Sila unie rüve Amfipoli mu Apolonia pfüthe Thesalonia nu vorlie, sünu Judamia sinagog puo ba.

²Paul-e puo zhoki tuoi Sinagog nu vo, mu sünu sabat va se ba di ketholeshü nu dieko se uko ze keti ba,

³mu süko ca vatshapie uko kie di Khrista kemezhiekewa sie kesia nunu rheilakesie dzeko thapie uko kie menuoshü, di sie, “A pie nieko ki pu keba Jisu hauha Khristau zo” sishü.

⁴Süko donu huomia kepfhe zelie mu pecükecü Grikmia kekra tsiu thenumia krüta kekra rei pelelieta di Paul mu Sila unie zeta.

⁵Derei Judako u ro di sie, lhithochü nu kerüzhümia huo kie kengupie kemeyhu kro puo chülie di rünau nu mha kebvüshü. Sidi ukoe unie ze mechühou nu votuoü Paul mu Sila nie pfhü keba ki vo Jason ki reta.

⁶Derei uko unie ngulie mota tse, Jason mu kepeleko[56] huomia merhashü rünau nu kekuokeseko mhodzü vor, shiekhoui di sie, “Kijüu pfü pekhepelaketuo themianie haki rei vor ru,

⁷Jason unie pesolie. Uko pete rei kedi kekrei Jisu ükecü puo tuo üdi kediu zhoko petsoute” sita.

⁸Siro die hau sikeshü ki themiako mu kekuokeseko bu u nou kehoukeruo chüta,

⁹sidi Jason mu kekreiko bu jamin pfülie di uko bu tuota.

¹⁰Süzhü kepeleko[57] Paul mu Sila nie ketsepie Beria nu shüwata; sidi unie sünu vorkelie ki Judamia sinagog nu vota.

¹¹Hanu keba Judako Thesalonika nu kebako ki u nou mezhükuo, kekreilamonyü ukoe u neisiei di dieu lielie mu die süko puotou mo mo shiü silieketuo la teisonhie ketholeshüko pfhü phrüya.

¹²Sidi themia kekra rei pelelie; siro u tha kenyi Grikmiapfü mu therhukepfü thepfumia kekra rei pelelie.

¹³Derei Thesalonika nu keba Judako Paul vo Beria nu rei Ukepenuopfü dieu pie petha tuoketa dze silie tse, uko sünu rei ker di mha kebvü mu krodiko nou chü pesuoshü.

¹⁴Sitse kepelemiako[58] Paul ketsepie dzükezha khie shü mhawa; derei Sila mu Timothi unie we sünu bata.

¹⁵Derei Paul meza ze kevoko puo ze vo Athen tsoshü, süsie Sila mu Timothi nie bu pezi vo puo tsolie morokesuo silieta, di uko puo ze kekhota.

¹⁶Paul-e Athen nunu Sila mu Timothi nie pfhe keba ki nadiu nu terhuorhiko thuo tshupfü keba ngu di puo nou meca seta.

¹⁷Süla puo teisonhie sinagog nu Judako mu pecükecümia kekrei rei mu lhithochüko[59] nu themia kehoupuorei ze kesekelieko rüchüshü.

¹⁸Siro Epikuri mu Stoik mhasi pie pethayakezha kronie donu huomia puo ze ketikemeüta. Süko huomia sie, “Diebou hau kedipuo pu ba mu?” si. Kekrei huo sie, “Puo chazoumia rhuo kropuo pupie mia pethaketuo puo zo” si. (Puoe Jisu Khrista mu rheilasiekelie dze pie petha tuokecü la).

¹⁹Süla uko puo ze Ariopaga ükecü chü nu vorlie di sie, “No mha kesa puo pie pethaketuo dzeu hie si nyüyalie.

²⁰Süko hie la kesa kro puote, süla hie n ki mha süko ca si nyüyalie” sishü.

²¹Siro Athenmia mu chazoumia sünu lhou keba pete mhapuorei chü mo zo di mha kesa puo kepu morei rünyü ba u tei pevowawaya.

²²Sitse Paul-e Ariopaga metsuo nu thalie di sie, “Athenmiako, nieko ha mha pete nu terhuo keprei nanyü nu pecü phiyacü a ngulie.

²³A nieko ra tuo rühou kevoki nieko rüsuoyakezhako meho tuo ru, ruosuoba puo gei ‘Sikemo Rhuo puo la’ ikecü thupie keba ngulie. Nieko si mo zorei rüsuoyakezha süu, a tsie pie nie ki puya.

²⁴Puo sü Ukepenuopfü, kijü mu sünu ketuo kheko chükeshüu, puoe tei mu kijü mho Niepuu zo, themia thuo chükelie rüsuokiko nu baya mo,

²⁵morei puo mha puo tsopfhü bata di u dzie pie puo theke rei ya mo, puoe puo thuo kerhei mu keha mu mha pete rei pie u kehoupuorei tsüyakezha la.

²⁶Mia yopuo geinu puo seyie neiüko chüpie uko bu kijüu pete gei lhou tuote, mu puo pedzüperie uko bu lhouketuo teiko mu baketuo rieko rhieshüwate,

²⁷Sidi uko bu Ukepenuopfü[60] pfhülie mu si zo vo puo ngulieketuo la, puo zowe u mia puo ki nu rei pecietuo mo zo;

²⁸kekreilamonyü ‘We puo geinu rhei mu mele mu lhoukezha zo!’ si; süu nie donu ükezomia huo rei pukecü, ‘We rei puo yiemia zo’ si.

²⁹We rei Ukepenuopfü yiemiakecü la, puo üse suna morei rakachü morei ketsie pie chükelie miarhi, themia do mu mhasi se chükelie kemhie puo ücü leta zhü mo.

³⁰Ukepenuopfüe thiedzü themia mhasikemo teikiko kevavuo di khawate, tsiewe puo themia kehoura tuo shierei pete bu thenou kedilie nu pushüwate,

³¹kekreilamonyü puoe mia puo bu kemezhütou nunu kijüu nyie pepiketuo la teisozha puo petho setuote, mu hau chü touketuo la kesia nunu themia süu chü perheipie peteko kieshüte” sishü.

³²Kesiamia rheilakesie dze sishü tse, uko huomia udzü thevita; derei kekreiko sie, “Hie hau dze n ki nu rünyü latuo” sita.

³³Süki Paul uko ze kekhota.

³⁴Derei huomia puo kitsa vata di pelelie, süko donu Ariopagit-u Dionisi, mu thenumia Damari ücüpfü puo, siro kekrei huo rei sa.