Read Angami Naga Mhakechüko 18 Bible Online

Mhakechüko 18 - Angami Naga bible

Mhakechüko 18

¹Hausie Paul-e Athen nunu Korint nu vota.

²Sünu puo Judamia puo Akila ükecü Pontu nu kelhoumia puo ze keselie, sümhodzü za kinu puo kimia Priskila ze di Itali nunu vor ba, kekreilamonyü Klaudiae Judamia pete bu Rom nunu tuotanuketa la. Paul unie mehotuoü vo,

³puo rei unie mhatho kemhie chüyacü la, puo unie ze bata, unie pfheki chüyakezhamia phre zocü la uko keze mhachü bata.

⁴Süki puo sabat metsei sinagog nunu uko rüchü di Judamia mu Grikmia hü phi.

⁵Sila mu Timothi unie Makedonia nunu vorkelie sie, Paul-e dieu pu thenou kenyü chü mia petha di Jisue Khristau zo ükecü pie Judako ki zhapu chüshü.

⁶Uko puo petsou mu puo thata tse, puoe puo pfhe kesou di uko ki, “Nie zie bu nie tsügeituo! A mezhü zo. Thieyawinu a Judakemoko ki votatuo” sita.

⁷Süsie puo sinagog nunu tuota[61] di vo Ukepenuopfü rüsuoyakezha Tita Justa ükecü Ukepenuopfü kepelemia puo kinu bata; puo ki sinagog khieki ba.

⁸Siro Krispa, sinagog nu krütau rei puo kinuko pete ze Niepuu pelelieta; mu Korintmia kekra Paul dieu kesiko pelelie di dzülupfülie.

⁹Khuzhü puo Niepu-ue ziemho nunu Paul ki, “Michie hiecie, derei diepu ba zolie mu kemekrie bata hie;

¹⁰a n ze tuo zo, süla miapuorei n bie pesuowalie lho, rüna hau nu a themia kekra bakecü la” sita.

¹¹Süla Paul teicie puo di puotie sünu bata mu Ukepenuopfü dieu pie themiako petha bata.

¹²Sirei Galio Akaya nu kezhau chükelie ki, Judako keze kenourhe di Paul teze dienyakiu nu vota.

¹³Uko sie, “Themia hau mia hüpie u bu Ukepenuopfü rüsuolienucü pu di thezho-u petsou tuote” sita.

¹⁴Paul mha putuoü sie tse Galio sie Judako ki, “Dienya hau mha kesuo kechü morei kekrükecü chüwaketa puo üliro, nieko Judako nyie hau a rünyükecü mese zo,

¹⁵derei hau die kro puo mu theza kro puo mu nie thuo nie zho nunu keprülikecü puote ru, nieko thuo meholietacie; a thenyie haicü ca nyü mo!” sita.

¹⁶Puo sidi dienyaki nunu uko ketsewata.

¹⁷Sitse uko peteko[62] sie Sosthene, sinagog nu krüta chüyakezhau merhashülie di dienyakiu mhodzüki nu puo vüta. Derei Galio süu la mhapuorei puo nou nyüshü mo.

¹⁸Paul telhe sünu ba di kepeleko[63] ze kekhota, sidi Priskila mu Akila unie zelie di rou geinu Siriatsa la vota. Siro hadzü puo thuo puo die puo la Kenkria nunu puo tsü thiewa.

¹⁹Uko vor Efesa tsolie tse, Paul Priskila mu Akila nie pie bawa di Sinagog nu vo Judamia ze kerüchü.

²⁰Süki uko puo bu uko ze ba sashünu cha, derei puo mvüta;

²¹mu puo uko ze kekhotatuoü di sie, “Ukepenuopfü medo liro a[64] la nieko ki vortuo” sishü, süsie puo Efesa nunu rou gei sie di tuota.

²²Sidi puo Kaisaria nu vor tsolie tse Jerusalem nu kho di kehouu kelushü, sidi tuo Antiok nu keta.

²³Puo zha huo sünu bakelie sie Galatia mu Frigia tsatie vo di pethakelieko pete chü kemeteishü.

²⁴Judamia puo za Apolo ükecü puo, Alekandramia, puo Efesa nu vor, puo diepu si mu ketholeshü si pevi phikecü puo.

²⁵Puo Niepuu Chau pie pethapfükeliemia puo, puo Johan mia baptaiz kechüu dze rübei kesi zoürei puo rhiechü Jisu dze kethoko pu tou mu pethayakezha puo.

²⁶Puoe thepfu se di sinagog nu diepu; derei Priskila mu Akila unie puo die sikelie ki unie puo ze kinu vo di Ukepenuopfü Chau dze pu tou sapie puo pethashü.

²⁷Sitse Apolo Akaya tsatie vo nyü sie tse, kepelemiako[65] puo chü kethepfushü mu pethakelieko bu puo zelie nu di leshü puo thu sashü. Puo sünu vorlie tse ngukemezhie nunu pelekelieko khruohi phishü,

²⁸kekreilamonyü puoe mechüu mhodzünu nu puo die kuo se di Jisue Khrista zo ükecü ketholeshü nunu tha kemecie toupie kiekeshü geinu Judako die va pejü.