Read Angami Naga Mhakechüko 19 Bible Online

Mhakechüko 19 - Angami Naga bible

Mhakechüko 19

¹Siro Apolo Korint nu keba ki, Paul pesotsatie nu rüve se Efesa nu vorlie, mu sünu puoe pethakeliemia huo ba ngulie.

²Puo uko ki, “Nieko pelekelie ki Kemesa Ruopfü ngulie me?” sishü. Uko sie, “Molie, hieko Kemesa Ruopfü tuoükecü rei si mo” si.

³Sitse puo sie, “Di siro nieko kikecü dzülu puo pfülie ga?” sita. Uko sie, “Johan dzüluu zo” si.

⁴Sitse Paul sie “Johan thenou kedikelie dzülu se mia dzülu khakeshü zo; mu puoe themiako bu puo sie vorkezhüu pelelienushü, süu Jisu zo” si.

⁵Uko hau sikelie ki Niepuu Jisu za nunu dzülupfülie.

⁶Paul puo dzie chapie uko geikeshü ki, Kemesa Ruopfü uko gei vorlie, mu uko pfheneiü nunu mha pu, tsiu siedzekesi die rei puta,

⁷uko pete kesa mia kerekenie mese.

⁸Sidi puo sinagog nu le mu khrü se mese thepfu se di Ukepenuopfü kedi dze pu keti di mia hü phi.

⁹Sirei huomia u nou re mu pele mvü di mechü mhodzünu Chau dze pu pesuota, süla puo uko khawa, di pethakelieko ze teisonhie kepethayakezha Tiranus kiu[66] nunu kerüchüta.

¹⁰Puo teicie kenie si bata, süla Asia nu keba Judako rei mu Grikko rei pete Niepuu dieu silie.

¹¹Ukepenuopfüe Paul geinu u ngo mhatho rükrü zokecü kropuo chüshü,

¹²süki mia dziesüpfhe morei pfhenyhie se vo puo nyülie di pie kechükenyü chükebako geishü tse, süko shürholie mu kesuo ruopfüko rei whuolie.

¹³Sirei rüve rühou tuokezha Judamia themoumia kro puorei Niepuu Jisu za se di kesuo ruopfü u gei tuoketako ki, “A Paul-e se petha tuoyakezha Jisu za se rüse zo di nieko ki pushü ho” si tuota.

¹⁴Themia süko Judamia zievo, kezha chüyakezhau, Skiva nuonuo thepfu thenieko süsü chü.

¹⁵Derei kesuo ruopfüu sie uko ki, “A Jisu si, mu a Paul si; derei nieko suomia ga?” sita.

¹⁶Sidi kesuo ruopfü puo gei tuoketau prou uko va, di uko penyüwa, mu uko penyü pesuothor pie uko bu uko phoulhuo mu rüzapfü di puo ki nunu tata.

¹⁷Judamia rei, kemomia rei Efesa nu keba pete thedze hau silie tse, u ngopie mhapuo chüta, mu hau geinu Niepuu Jisu za chü pezhakuolieta.

¹⁸Peleketa kekra rei chüwaketa mhathoko phra phreshü.

¹⁹Siro kemeduo mia kekra u leshüdako se vor kengulie di mechü mhingu nunu thewata; mu süko ma lekesie rakachü nyie hiepengou mese.

²⁰Sidi Niepuu dieu kuo süthede chü di kruo kechü sa vota.

²¹Mha hako chüthekewa sie Ruopfüu Paul hü chü di puo bu Makedonia mu Akaya pfüthe Jerusalem nu voketuo rhülie. Puo sie, “A sünu vokelie sie, Rom rei sa meho morosuo” isita.

²²Süla puo kekhruohiko mia kenie Timothi mu Erasta, ketsepie Makedonia nu shüwa, mu puo zowe zha huo Asia nu ba sata.

²³Siro süki Chau dze la kebou petsa mota.

²⁴Demetria ükecü, rakachü rükreimia puo, rakachü pie Artemis rüsuoki kechü rhithomiako la thelhi ketsapfü puo chüshü mo.

²⁵Puo puo kezeko mu lhitho sükemhie chüyakezha pete kie kengulie di, “Kezeko, úko mhatho hau la mhanyiliekecü nieko rei si ba.

²⁶Mu nieko si mu ngu bate, Efesa nu rübei zomonyü Asia pete khre rei Paul ücüu themia kekra hü mu se ketsi ze themia thuo rhikelie rhuoko üse terhuo ketho mo üdi pute.

²⁷Siro mia bu u mhatho hau rhu moketa zomonyü terhuopfü Diana rüsuokiu rei ü mhaü moketa prei mu Asia nu mu kijü pete nu rüsuoyakezhapfü za pejüwatie” sita.

²⁸Uko hau sishü tse u nou meyiepie mhapuo chü di “Efesamia terhuo kezhapfü sü Diana” idi shie kemerie chüta.

²⁹Sidi nadiu pete nu bouübita; siro Paul ze rüveketuo Makedoniamia Gaya mu Aristarka nie telie di merhashü ze rüzhüchüu nu vota.

³⁰Paul-e themia krodiu ki vo nyü sie, derei pethakelieko puo bu vo mvüta;

³¹Asia kijübou nu[67] kezhamia puo khriethomiako rei dielie ketsepie puo kishü di puo bu rüzhüchüu nu vo hienuta.

³²Süki mechü kehouu bouübi bata; huomia shie di mha puo pu, mu kekreiko mha kekrei puo pu ita; sitse themia kekratsa kedipuo la vor kengu ba shikecü ca rei si mo.

³³Ru Judako huomia thuo Alexander khupie krodiu mhodzünu khashü. Sitse Alexander puo dzie chapie uko bu kemekrieta nu di themiako mhodzünu puo mezhü pu nyü sie.

³⁴Derei uko puo Judamia ücü silie tse, bavüdo kenie mese pfhe puo chü shiekhoui di, “Efesamia la Diana sü terhuo kezhapfü zo” si bata.

³⁵Derei rüna süu se keba kezhau themiako kekha zeiwa di sie, “Efesamiako, supuonie Efesamia rünae Artemis kezhapfü rüsuoki mu teigeinu teketsur miarhiu kepfhe ükecü si kemo ba ga?

³⁶Miapuorei mha hakoü moükelie jü, siüliro nieko rei kemekrie bakelie mese mu meyhumezhie di mhapuorei chüta hie.

³⁷Niekoe themia hanie rüsuokiu vie sekecümia morei úko rhuopfü thakecümia mo zoürei unie ze haki vorte.

³⁸Mhanuü Demetria mu puo ze mhachüyakezhako huomia gei dienya huo ba üliro mha süko pepiketuo la dienyaki mu capimia rei ba, mu sünu nu kenyaliecie.

³⁹Nieko sümho rei mha huo si sa nyü üro, mechü thehouzho nunu pepi morosuo.

⁴⁰Si moliro thie kebvükeboukecü hau u pejotalie vi, kekreilamonyü kebouketa hau we puoca jü, u ketso kesie ki we keboukecüu pu kemesalie kenjütatuo” siwa.

⁴¹Puo die hau pushü tse themiako tuota.