Read Angami Naga Mhakechüko 2 Bible Online

Mhakechüko 2 - Angami Naga bible

Mhakechüko 2

¹Pentekost zha vorlieta tse, uko pete keze vo thechü puo nu ba.

²Sitse va puo nu mhapfhe puo teigeinu khriedi mhie vor di uko keba kiu pete tshulieta.

³Ru mi themia meü kemhie, pruo keza vo uko mia puopuo gei ba phreta.

⁴Uko pete Kemesa Ruopfüu u tshupfü di Ruopfüue chükeshü mhiei die kekreiko nunu mha pu sieta.

⁵Süki teikhro seyie pete nunu nanyü nu pecüsekecü Judamia vor Jerusalem nu lhou ba.

⁶Mu mha pfhe hau sikelie ki krodi vor kengulie mu u ngo phita, kekreilamonyü pethakeliekoe uko mia puopuocü ramia die nunu mha pu keba siketa la.

⁷Sidi u ngo thopfü di sie, “Die pu keba hako pete Galilmia zo mo me?

⁸Di siliro, kikidi úko pete u thuo u die nunu si phreta ga?

⁹Parthiamia, Mediamia, Elamitmia, siro Mesopotami-a, Judia mu Kapadokia; Pontu mu Asia nunu kevormia,

¹⁰huomia Frigia, mu Pamfilia, Ijipt mu Kurin kepenuoki Libia nu kebamia, tsiu Rom nunu rüso chü kevor Judamia mu Judamia nanyü zeketako,

¹¹Kretamia mu Arabmia; u pete u thuo u die nunu Ukepenuopfü mha kezha chükeshü dze rünyü bate” sita.

¹²Sidi uko pete va pethopfü mu u ngo di sie huoniehuo ki, “Hau kikidi hilieta ga?” si bata.

¹³Derei kekreiko kethekre di, “Uko zu kesa se u tshupfü balie” isita.

¹⁴Derei Pitor kerepuokrüko ze siethalie di die pu puo rhiechü themiako ki, “Judiamiako mu Jerusalem nu kebako, nie hau siliecie, mu a kepuko rünyülie.

¹⁵Hako nieko noule tuoi meze ba mo; tsie khise keba thepfü zoluo.

¹⁶Derei hau dze thiedzü siedzekesiu Joel bu pupiekezhü:

¹⁷‘Ukepenuopfüe puya, vo teisozha thelatsa, a a Ruopfü rupie themia pete gei shüshütuo, mu nie nuonuo thenu rei thepfu rei siedzedie putuo, mu nie khriesako ziemho ngutuo, nie donu ketsako u mho pematuo.

¹⁸Siro zha sütei ki, a a Ruopfü rupie, a kituo thenu rei thepfu gei rei shütuo, mu uko siedzekesi putuo.

¹⁹Mu a tei peso geinu u ngo zokecü, mu teikhro kijü nu zasiko, thezie, mu mi, mu mhoutsa, pekieshütuo.

²⁰Niepuu teisozha kezha, mu zayie chü kevor mhodzü, niaki zeidetatuo, mu khrü thezie mevitatuo.

²¹Mu kehoupuorei Niepuu za kiekelieu kelalietuo’ si.

²²“Nie Israelmiako[7], a die rünyüshücie: Nazaret[8]Jisu ha, nieko rei si keba tuoi, Ukepenuopfü thuo puo geinu kekuo mhathoko, u ngoko mu zasiko chü di puo zoücü thashü,

²³themia hau, Ukepenuopfü thuo rhüse ketuo mhie mu puo pedzü si tou di, puo khapie nieko dzie nu shüwa, nieko bu puo gouwa, mu puo dukhriwa.

²⁴Derei Ukepenuopfü kesia nunu puo shüphralie[9] di puo chü perheilie, süu kekuo nunu puo phapie balie kenjücü la.

²⁵Kekreilamonyü David-e puo dze pukeshü: ‘A a mhodzüki Niepuu nguya, puo a zatsa ba seiya, mu a rüsierünielie lho;

²⁶süla a nou rei puo noumvü, mu a meü rei puo neiya, sümho rei a chüüphou ha kemerü nu lhoutuo.

²⁷No a ruopfü pie Hades nu vawa lhocü la, morei n Kemesau bu cieürietalie lho.

²⁸No kerheichako thashü a kie; mu a bu n mhingu ki nu a nei lhemo tuotatuo.’

²⁹“A keze Israelko,[10] a u puotsa David dze nieko ki pu kemecie tsuoshütuo, puo siata di khruwa, mu puo mekhru thie rei u kengu nu zhü zo.

³⁰Siro puoe siedzekesimia rei chü mu Ukepenuopfüe puo ki rüse di puo se puo yiemia puo bu puo kediba gei batuoü phrakeshü dieko si zo.

³¹Pedzüperie hau ngu di, David-e Khrista rheilasieketuo pu di, ‘Puo pie Hades nu bawa mo, morei puo chüe cieürieketa si mo.’

³²Ukepenuopfü thuo, Jisu hau chü perhei laliete, mu hie pete rei süu zhapumia zo.

³³Süla Ukepenuopfü zatsa nu puo chü pezha se bate, mu Puou ki nunu phrapiekezhü Kemesa Ruopfüu ngulieketa la, nieko tsie si mu ngu keba hau puoe rushüte.

³⁴Kekreilamonyü David zowe teiko gei sie mo, derei puoe pukecü, ‘Niepu-ue a Niepuu ki, “No a zatsa balie,

³⁵A ngumvüko pie n phiba shüwa kemochie.” ’

³⁶Süla Israel kiu pete bu, nie puo goukewa Jisu hau, Ukepenuopfü puo chüpie Niepu mu Khrista chüwataücü si kemecie tsuoiliecie” sita.

³⁷Uko hau silie tse, u melou va pechüteilie di sie Pitor mu apostel kekreiko ki, “Kezeko,[11] hie bu kedipuo chülie morosuo ga?” si.

³⁸Pitor sie uko ki, “Thenoukedilie di nie kehoupuorei Jisu Khrista za nunu dzülupfü phrelie tse nie kephoumako valietuo; mu methuo khakeshü Kemesa Ruopfü mhaphruou nie ngulietuo.

³⁹Kekreilamonyü phrapiekezhüu nie mu nie nuonuo la, tsiu kepecie phi nu ketuoko pete la, tsiu Niepuu Ukepenuopfü puo thuo kiepie puo kitsa shülieketa pete la rei zo” sita.

⁴⁰Mu puo die kekrei kekra rei se zhapu chüshü mu uko tarho di sie, “Kesuokeruo phou hau ki nu nie thuo nie kelaliecie” sishü.

⁴¹Süla puo die u neikelie khe dzülupfülie, sidi sünhie mia nyie se mese uko salie.

⁴²Süko u khapie apostelko kepetha die nu, kepekrokecü nu, niekhrüda bietshiekecü nu mu kecha nu shü seilie.

⁴³Süki themiako uko le pevi mu u ngo phita, kekreilamonyü apostelkoe u ngothoko mu zasiko kekra chüshü.

⁴⁴Siro pelekelie khe keze kro puo chü di u vie pete vierhe chüta.

⁴⁵Uko u vieko mu u ngaürako zelie di puomako se vor uko donu tsopfhü kebako vaphilie.

⁴⁶Siro uko teisonhie kezepuo chü di rüsuoki nu u tei kha seshü, uko kinu nu niekhrüda bietshiecü tsiu u nou mezhü[12] mu u neisiei di mhacümhakrie ibata.

⁴⁷Siro Ukepenuopfü tshe mu themia pete mhodzü therhu rei pfülie. Mu Niepuu teisonhie kelakelieko bu uko salielie ba zota.