Read Angami Naga Mhakechüko 20 Bible Online

Mhakechüko 20 - Angami Naga bible

Mhakechüko 20

¹Mha kebvükecüko la zeiketa sie Paul-e pethakelieko kelieshü di uko chü kethepfushü mu kekhokecü die pushü di Makedonia nu vota.

²Puo rünako pfüthe kevo ki kepelemiako chü kethepfu phishü, sidi puo Gris nu vorlie,

³sidi sünu khrü se bata. Puo rou nunu Siria nu votuo üdi dojü keba ki Judako puo gei thedo kesuo puo rhülieta, süla puo Makedonia nunu la votaketuo pepilie.

⁴Süki Beriamia Pairha nuou Sopater, siro Thesalonia nie Aristarka mu Sekunda, Derbemia Gaya, siro Timothi, tsiu Asiamia Tukika mu Trofima rei puo ze tuo.

⁵Süko hie mhodzü vo Troa nunu hie pfhe ba;

⁶derei Khreiüshükemo Niekhrüda nyiu sie nu hie Filipi nu rou nunu tuoshü, sidi zha pengou sienu vo Troa nunu uko ze keselie, mu hieko zha thenie sünu bata.

⁷Deoba zha therie nhie hieko keze niekhrüda bietshie cütuoü kengulie tse, Paul süsie nhie tuota nyü keba la uko ki diepu zo ba khisoteiluo tso.

⁸Siro hieko kehou keba kibou peso nu mitu rei ba pere.

⁹Süki khriesamia Iutuka ükecü puo khirki gei ba ru, puo ze rüngu tsuta mu Paul süki rei diepu ba zo. Puo ze pesou tsuta di ki lha seu geinu te kijü tsuta mu uko puo phou sie ru siata.

¹⁰Derei Paul ke di zere tsu puo ciepielie di sie, “Nie nou thachüta hie, puo rhei ba zo” sita.

¹¹Süsie Paul la peso gei kho di niekhrüda bietshie cükelie sie rei diepu zo ba teisotie tso di tuota.

¹²Süsie uko khriesau rheikelie la uko nei dapfü rei mota.

¹³Hieko we Asos nunu Paul pfhekelie le di rou geinu sie sünu vota. Puo kijü keso ze sünu voketuo rhü pekreilieketa la.

¹⁴Puo Asos nu vor hieko ze keselie tse, hieko puo bu rou gei pfülie di Mitilin nu vota.

¹⁵Hieko sünu nu rou ze ta lashü di süsie nhie Khios rücietsa vorlie. Süsie nhie vo Samos tsolie mu süsie nhie Mileta nu vorlie.

¹⁶Paul Asia nu puo zha va sawa molieketuo le di rou thu se Efesa cievoketuo leta, puo chülie kevichie Pentekost nyi nhie Jerusalem tsolie nyü bei tuoketa la.

¹⁷Puo Mileta nunu dielie ketsepie Efesa kehou nu phichüko ze keseshütuo üdi kelieshü.

¹⁸Sidi uko vor puo tsolie tse, puo uko ki: “A Asia nu keler therie nhie nu nieko ze kedipuo mhiei nieko donu lhou shicü nieko si ba,

¹⁹a rünuo, mhidzü pekrü zo mu Judako thedo rhü a rükeba neiüko kegepfü di Niepuu lie chükecü nieko si batuo.

²⁰A nieko bu si ro viketuoko se nieko ki pu, mechühou nunu rei mu kiüko nunu rei nieko petha mota mo,

²¹tsiu Judamia mu Grikmia rei kemhie zo, thenou kedipie Ukepenuopfü tsülienu mu u Niepuu Jisu pelelienu pushü zo.

²²Mu tsie, a Ruopfüu diemia tuoi,[68] Jerusalem nu votazhie, mu sünu kedipuo a gei phirtuo shicü si mo,

²³mu rüna kehoupuonurei Kemesa Ruopfüu a ki kepu zowe kedie chüketuo mu kemezhieketuo a pfhe keba thapie a kie.

²⁴Sirei a a thuo zowe a kelhou hau mhathopuo ütuo mo; derei Niepuu Jisu a ketseshü di a bu Ukepenuopfü ngukemezhie dieliekeviu pupie mia kieshünukecü lietho-u chü tseishü nyükecü leketuo rübei zo.

²⁵“Siro harie a nieko donu nu Ukepenuopfü kedi dze pu petha tuokecüko nieko miapuorei cüsie a zie ngu lalie lho zokecü a si bate.

²⁶Süla thie a nieko mhodzünu pushüya ho, themia kehoupuorei kata rei süu zie a tsü gei mo ho,

²⁷kekreilamonyü a nieko ki kelakelie do-u pete pushü khrie di a ketheta mo zo.

²⁸Süla nieko thuo zorei nie terü chü balie mu Kemesa Ruopfüue pie nie peleshüwaketa kro-u bu rei u kirei balie. Puo Nuou[69] zie pie khrükelie Ukepenuopfü kehou kepfhemia chüliecie.

²⁹A tuoketa sie socie puo zho kesuoko nieko donu vor zotuokecü si ba, mu tekuo kro-u khrielie lho.

³⁰Siro nie thuo nie kro-u donu zorei pethakelieko teshüpie u siemedzilieketuo la kedietho-u chü kerüpfhiwaketuo huomia sier zotuo.

³¹Süla nie terü chü balie, mu a mhidzü pekrü zo di teizeiteiso cie se nie kehoupuorei pethakeshü rükraliecie.

³²Mu a tsie nieko khapie nie chü pekruo pethelie di mesalieketako donu puo kau khapie nie tsülie keviu Ukepenuopfü mu puoe mia ngukemezhie dieu pelewatatuo.

³³A mia puo rakachü, suna, morei pfhemenei lie nyü vor mo.

³⁴Nie si batuoü, a a thuo a dzienie pie mhachü di a mu a zeketuoko se morokesuo de pfhülie vor zo.

³⁵Mu sügeinu we rei kethachümiako khruohishülie morokesuo la mu u Niepuu Jisu thuo pukeshü ‘Mia ki nu mha ngukelieu kirei mha pie mia ketsüwe thejapfükuo’ ikecü dieu rükralieketuo la a mha pete nu a rhiechü di mhachüpie nieko kieshü” sishü.

³⁶Puo diepu tseikewa sie, puo uko pete ze khoutoulie di kecha chülie.

³⁷Süki uko pete keze kra phita, sidi uko Paul ciepielie di puo mebo,

³⁸puo uko üse mhakipuorei puo zie ngu salie lhoketa pukeshü la uko nousuo phita. Sidi uko puo ze zo vo rou kebau nu shü.