Read Angami Naga Mhakechüko 21 Bible Online

Mhakechüko 21 - Angami Naga bible

Mhakechüko 21

¹Sidi uko ze kekhota tse hieko rou geinu, mezhü vo Kos tsolie di süsie nhie Rhoda nu volie, siro sünu nu Patara[70] nu volie.

²Mu sünu nu Foinikia nu kevo rou puo ngulie di hie süu gei sie di tuoshü.

³Sidi Kupra ngu tse, rouu thu thevitsa va se Siria nu vor di Tur nu pralie, rou nu mha pfüketuoko khapie sünu shüwatuoü tuocü la.

⁴Sünu pethakelie huo ba di ngulie ru zha thenie uko ze bata mu süki Ruopfüu nunu uko Paul bu Jerusalem nu vo hienuta.

⁵Derei hieko zhako tseita tse, uko ze kekhota di hieko rüvecha nu va lata. Süki uko pete rei u nupfü unuonuo sa di hie ze ca sie pra. Dzükezha khie nu hie khoutou phrelie di kecha chülie,

⁶di kekhotaketuo die huoniehuo ki puwa. Süsie hieko rou gei pfülie di tuota mu uko la kinu vota.

⁷Süsie hieko rüve Tur nunu Tolemai nu volie di kepelemiako kelushü mu hieko zha puo uko ze bata.

⁸Süsie nhie hieko tuo lashü di vor Kaisaria tsolie; sidi hieko vo sünu Filip, dieliekevi kepethau, mia thenieko donu mia puo ru, hieko puo ki vo puo so chü.

⁹Puo puo nuo rüümia[71] dia ba mu süko siedzekesi die kepu mhaphruo ba.

¹⁰Hieko zha huoyo sünu keba ki, Judia nunu Agaba ükecü siedzekesiu vor.

¹¹Puo hie ki vor di Paul chiephau chüpie puo phi puo dzie phalie di sie, “Kemesa Ruopfüu hakemhie puya, ‘Chiepha hau seyakezhau Jerusalem nunu Judako bu puo phalietuo, sidi puo khapie Judakemoko dzienu shüwatuo’ ” sita.

¹²Hie hau silie tse, hieko mu kekreiko rei puo bu Jerusalem nu vo hienuta.

¹³Derei Paul sie, “Nieko kiüdi kra di a nou bie kethachüya ga? Kekreilamonyü a mia bu Jerusalem nunu a phaketuou rübei zomonyü Niepuu Jisu la sia rei shüketuo dojü setuo zo” sita.

¹⁴Sirei hieko puo khalie kenjüta tse, hieko sie, “Niepuu bu puo medo-u chüliecie” sishüwa di kemekrieta.

¹⁵Sidi zha süko sie, hie hie nyako dojülie di Jerusalem nu voketuo la tuoshü.

¹⁶Süki Kaisaria nunu kepelemia huo sa hieko ze vo hieko bu puo ze baketuo puo za Nason ükecü Kupramia puo kishü, puoe thiedzü nu kepelemia chüketa puo.

¹⁷Hieko Jerusalem nu vorlie tse, kepelemiako u neisiei di hie zelie.

¹⁸Mu süsie nhie Paul hieko ze di Jakob ki nu vo; mu sünu phichüko pete rei ba.

¹⁹Sidi uko kelukeshü sie Ukepenuopfü puo geinu Judakemoko donu mha chükeshüko dze pupie uko kie.

²⁰Siro uko süu sikeshü ki, uko Ukepenuopfü tsheta. Süsie uko puo ki, “Harie kezeu, Judamia donu zorei kepelemia nyie kidepuorei parliete shi, mu süko pete rei thezho-u ze pecü phiya.

²¹Siro no üse Judakemomia kijü nu lhou ketuoko Judamia bu Mosa zho-u khawanu mu u nuonuoko zhüre hienu mu Judamia zhoko medzi morei viü pethaya üdi uko pu tuote.

²²Süsie kedipuo chü ro vi ta? No hanu vor tsota ücü uko sitatuo.

²³Süla hie n ki kepuu chüliecie. Hieko donu mia dia u die phrakeshü ba.

²⁴No rei uko ze vo n chü kemesawalie mu uko bu n tsü thieketuo la uko zha chüwalie. Siliro mia no üse Mosa zho-u ze tuoya zo ükecü silie di hadzü n dze puketuoko ketho mo ükecü silietuo.

²⁵Derei Judakemo peleketako lawe, uko ki uko bu kecüca pie terhuorhi rüsuokewa vieko, mu thezie mu kerüchakhriketa khunuoko cü hienu, mu pierüü kechü nunu u kekhalienukecü hieko pepikelieko leshü thushüwate.”

²⁶Süla Paul-e themia süko ze di süsie nhie puo chü kemesalie di uko ze rüsuoki nu lelie, sidi mia puo puo ruosuo chüketuo zha kitsuo liro uko chü kemesakecü chü tseilietuo shicü pie pesishü.

²⁷Derei zha thenieko tseitatuoüzhü tse, Asia nunu kevor Judako huomia puo rüsuokiu nu keba ngushü di vor themia kro-u pfükerhüshü. Sitse uko vor puo telieta,

²⁸mu shiekhoui di sie, “Keze Israelko, vor kekhruohiliecie! Themia hauha lukihaki vo di themiako, u zho-u mu thechü hau ketha die pu mia pethatuoyakezhau we, siro puo tsierei Grikmia rei ze rüsuokiu nu vor di thechü kemesa hau bie perhuwate” sita.

²⁹Kekreilamonyü uko hadzü Trofima ükecü Efesamia puo puo ze uko rüna nu phere ketuo ngu ru, uko Paul üse themia süu ze uko rüsuoki nu vo ükecü leta.

³⁰Sitse nadiu pete bouübita, sidi themiako takewhuo vota. Uko vor Paul telie di rüsuoki nunu puo merhashü ze parlie, sidi rükri kikhako khawa.

³¹Siro uko puo dukhriwatuoü sieta tse mia dielie ketsepie Rommia chüpahi nyie mhokezhau ki Jerusalem pete kebvü bata üshü.

³²Sitse chüpahi kezhaue krie mhokezhako mu chüpahimia huo ze di ta mha uko ki tsu. Sitse themiako nyie mhokezhau mu chüpahiko ngulie di Paul vü sa mota.

³³Süki nyie mhokezhau zo phi Paul telie di mia bu thegiro kenie pie puo khelienuwata, sidi puo supuo shicü mu puo kedipuo chüwa shicü ketso.

³⁴Sitse themia kro-u donu huomia die puo pu mu kekreiko die kekrei puo pu idi shie khoui bata; süki themia bouübiketa la mhapuorei si kemecielie mota tse puo themiako bu Paul ze dahouu nu volienuta.

³⁵Siro Paul chapra gei khokezhü ki, themia u nei mo di puo khu toutoutacü la chüpahiko bu puo toupie kho morosuota.

³⁶Themia krodiu puo siemedzi chakhrie shiekhoui di, “Puo dukhriwalie” si tuota.

³⁷Siro Paul ze chüpahiko ba nu letatuoüzhü tse, puo sie nyie mhokezhau ki, “A bu n ki mha huo pulie vituo me?” sita. Sitse nyie mhokezhau sie puo ki, “No Grik die si me?

³⁸Ki-a, siüro no tsiedoki nu Ijiptmia puo mha kebvüshü di mia kedukhrimia nyie dia taze nhanu voketau mo me?” sita.

³⁹Paul sie, “A Judamia zo, Kilikia nu Tars nunu a penuolie, rüna kemeyie puo nu kelhoumia. A bu themiako ki diepushücie” sita.

⁴⁰Süki nyie mhokezhau puo bu diepulie vi üshü tse, Paul chapra gei thalie di puo dzie cha sie tse themiako kemekrieta. Sitse puo Ibri[72] die nunu diepu di sie: