Read Angami Naga Mhakechüko 22 Bible Online

Mhakechüko 22 - Angami Naga bible

Mhakechüko 22

¹“Kezeko mu a puonuoko, tsie a kitsa dieu rünyüshücie!” si.

²Siro puo Ibri[73] die nunu uko ki dieputa tse uko kemekrie sakuota. Sitse puo sie:

³“A Judamia puo zo, Kilikia nu Tars nunu penuolie, derei rüna hau nu Gamaliel dzie nunu u puonuoko zho touu pie a pethapfülie di nieko thie haki kethako mhie Ukepenuopfü kitsa a rhiechü kesiermia zo.

⁴Ae Chau medziyakezhako pechü di uko bu kesia ketso rei zo, sidi thepfu rei thenu rei tepie kedieki nu shü,

⁵süusü phichükezhau mu mechü kehou nu phichüko pete rei a zhapu chülie vi. A uko bu thupie u themia Damaska nu kebako ki keshü leshüko rei ngulie, süla ae sünu vo di themia süko teze vor Jerusalem nunu pechüketuo le tuo zo.

⁶“A Damaska penuo vozhü tse, khinhieluo ki ziekruoicü puo teigeinu tsur a khie lutsahatsa va pezieta.

⁷Sitse a te kijü tsuta, tsiu mha pfhe puo sie a ki, ‘Saul, Saul! No kiüdi a peseya ga?’ idi kepu si.

⁸Süki a sie ‘No supuo ga, Niepuu?’ ishü. Sitse puo sie a ki, ‘A Nazaret[74] Jisu, no puo peseyakezhau zo’ sita.

⁹A zeketuo themiako rei kezieu we ngu derei uko a ki mha pukeshü pfheu we si mo.

¹⁰Sitse a sie, ‘Niepuu, a bu kedipuo chü ta?’ ishü. Sitse Niepuu a ki, ‘No sielie di tuo Damaska nu lelie, sitse sünu nu n bu chütuo üdi rhüpieketuoko pete pushütuo ho’ sita.

¹¹Kezie süu bu a rüpie mha ngulie mota di a ze ketuoko bu a dzie teshü di Damaska nu le.

¹²“Anania ükecü thezho ze pecü phiyakecü puo ba mu Judamia sünu keba khe rei puo rhu phiyakezha puo,

¹³a ki vor; mu a khieki thalie di, ‘A siezeu Saul, no mha ngu laliecie’ sishü. Sitse sütei touki a mha ngu lalieta.

¹⁴Sitse puo sie, ‘U puonuoko Kepenuopfü n kedapie n bu puo medo silieketuo, mu kemiatho-u ngulieketuo mu puo tie nunu kepar puo pfheu rünyütuoü rhüse tuote;

¹⁵süu n bu themia peteko mhodzünu no si mu nguketako zhapumia puo chülietuo.

¹⁶Süla no tsie kiüdi pfhe ba zo ga? Sielie di dzülupfülie mu puo za nu n mezhiemelo di n kephoumako khrüwalie’ sita.

¹⁷“A Jerusalem nu la tsurta, di rüsuokiu nu kecha chü ba tse, a sie si mo zhüta.

¹⁸Süki Jisu ngu ru puo a ki, ‘No rükri Jerusalem nunu tuota cie, hanu themiako no a zhapu chükeshü lielie lhotakecü la’ sita.

¹⁹Sitse a sie, ‘Niepuu, uko a vo di Sinagog kheko nu n kepeleko telie di vü reiwaketa si ba.

²⁰Siro Stefan n zhapuu zie pekrukeshü ki, a rei a medo zokecü la süki tha di puo kedukhriko pfhenei pfhe tha zo’ sishü.

²¹Sitse puo a ki, ‘Tuoshüliecie, a n ketsepie kepecie nu Judakemoko ki shütuoükezhü la’ ” silie.

²²Haketso zowe uko puo die rünyü tha; süsie uko shie u rhiechü di, “Kijü nunu themia haicümia chüwalie. Puo bu lhou tuokecü mese mo” sita.

²³Mu uko shiekhoui di u pfhe rhuo kelhouwa di nyophe bie kelhoupie teikhrie nu shü vüta tse,

²⁴Rommia nyie mhokezhaue Paul ze chüpahiko bou nu lelie mu seiro pie puo vü di Judako kedipuo la puo ngumvü hathede chüte shicü ketsolienuwata.

²⁵Derei uko puo phalie di puo vütuoükesie ki Paul süki krie mhokezhau ki, “Rommia puo zorei puo kejo nguliekemo nu vükecü thezho nyi me?” sita.

²⁶Sitse kezhau die hau silie tse, vo nyie mhokezhau ki, “No kiü tuoü tha ga? Themia hau Rommia puo zo” ishü

²⁷Süla nyie mhokezhau Paul ki vor di, “A ki pushücie, no Rommia zo le” isita. Sitse puo sie, “U zo,” sita.

²⁸Süki nyie mhokezhau sie “A we Rommia chükelie raka kekra pie khrü di chülie” sita. Sitse Paul sie, “A we penuolie tse nunu zo” sita.

²⁹Süki puo ketsotuoü kethako tsiesieta; mu nyie mhokezhau Paul üse Rommia ükecü sikelie sie puo thegiro pie puo phakecü la michieta.

³⁰Siro puoe Judako kedipuo tou la Paul pejo ba shicü silie nyüta; süla süsie nhie puo Paul phrei lashüwa di zievo kezhako mu mechü kehouu kehoutuoü kieshü. Süsie puo Paul ze vor puo bu uko mhodzüki thalie.