Read Angami Naga Mhakechüko 23 Bible Online

Mhakechüko 23 - Angami Naga bible

Mhakechüko 23

¹Sitse Paul sie mechü kehouu meho terü di sie, “A siezedzürieko,[75] thie haketso a nou mecümecie di Ukepenuopfü mhodzü lhou vorzhü zo” sishü.

²Sitse zievokezhau Anania-e sie puo khieki kethako bu Paul tie vüshünuta.

³Süki Paul sie puo ki, “Ukepenuopfü n kepfhüshütuo, no sü nyhüpekrapie keba sozha zo! No cüki ba ba di thezho-u medzi di a nyie kecütuoü tuo, sirei no thezho-u varhuo di a vünu le?” sita.

⁴Sitse süki kethako sie, “No Ukepenuopfü zievokezhau zorei prei mo me?” sita.

⁵Sitse Paul sie, “A kezeko a puo üse zievokezhau ücü si mo; kekreilamonyü, ‘No n mhokezha chüyakezhau gei die kesuo pu suo’ isi di thupiezhü” sita.

⁶Siro Paul-e sünu kebako huo Sadukimia mu huo Farisimia ükecü ngulie tse puo mechü kehouu nunu shiekhoui di sie “A kezeko, ae Farisimia mu Farisimia nuonuo zo. Mia bu a ketso ketha haha kesiamia rheilakesie mu siedze puo ba ükecü la zo” sita.

⁷Puo die hau pushü mumetha, Farisiko mu Sadukiko kedie kreita, sidi kehou biepie kenie chüwata.

⁸(Kekreilamonyü Sadukiko kesiamia rheilakesie morei teigei dieliemia morei ruopfüko tuoükecü peleya mo; derei Farisiko we süko pete peleya).

⁹Sidi uko shie peto miemie sierta tse, thezho-u pethayakezha Farisiko kro-u mha kesimia huo siethalie di u rhiechü di sie, “Hie themia hau gei mha kekrükecü puorei ngulie mo! Ruopfü morei teigeidieliemia puo thuo puo rüchü üro kiüta di?” sita.

¹⁰Siro uko keprüli se sierta tse nyie mhokezhaue mia Paul ciechücierha zowaketuo preita. Süla puo puo chüpahiko bu krodiu nu le Paul ze par di puo ze chüpahiko ba nu votanushü.

¹¹Süzhü Niepuu vor puo khieki thalie di sie, “No thepfuliecie, no Jerusalem nu a zhapu chükeshü tuoi Rom nu rei a zhapu chüshü morosuo” sita.

¹²Süsieduü Judako keze thedo puo rhülie, di Paul dukhriwa kemochie mhapuorei cüükrielie lhoü rüsewa.

¹³Keze thedo rhü kebako mia hiedia kezie.

¹⁴Uko keze zievo kezhako mu pehüko ki vo di sie, “Hieko Paul dukhriwa kemochie mhacümhakrielie lho üdi rüse kere se puo pie hie phase bate.

¹⁵Süla tsie nieko mu thehou-ue dielie ketsepie nyie mhokezhau kishü di Paul dze ketso menuo sakuoketuo laü di puo ketseshünu chashücie. Mu hie puo ker tsolie kemo nu puo dukhriwaketuo dojüse thate” sita.

¹⁶Derei Paul üpfü nuo-ue mia puo bieketuo la puo cha dze keba silie; süla puoe dahouu nu vo di Paul ki pushü.

¹⁷Sitse Paul krie mhokezhako mia puo kelielie di puo ki, “Khriesa hayo ze nyie mhokezhau ki voshücie; puo mha puo pie puo ki puketuo bate” sishü.

¹⁸Sitse kezhau puo ze nyie mhokezhau ki vo di sie, “Kedie chü keba Paul-e a bu khriesa hayo ze n ki vorshünu chate; puo n ki mha huo puketuo baketa la” sishü.

¹⁹Sitse nyie mhokezhau puo dzie teshülie di puo ze puo bouu nu vo di, “No a ki putuoü ketuou kedipuo ga?” sishü.

²⁰Puo sie, “Judako kedova di Paul rüli ketso menuokuo saketuo laü di sodu puo ze thehou-u nu kernukecü chaketuo kepfhekho se bate.

²¹Derei no uko dieze hiecie, kekreilamonyü uko mia hiedia kezie rüshü di puo cha dze batuoüya. Uko Paul dukhriwa kemochie mhacümhakrielie lho üdi rüse reiwate. Uko tsie süu chüketuo la dojüse bate mu uko n die pfhe keba zote” sishü.

²²Sitse nyie mhokezhau khriesayo bu tuota mu puo ki, “No thedze hau pie a pesishü ükecü mia puo kirei pu hiecie” siwa.

²³Süsie nyie mhokezhau puo khro kezhamia kenie kielie di sie, “Nnie tsiezhü keba thepfü ki chüpahimia krie kenie gura kese chüpahi hiethenie mu rüngou kepie chüpahi krie kenie bu Kaisaria nu voketuo la keselie.

²⁴Siro Paul bu baketuo la gura rei keseshülie, sidi puo rükhie menuo ze vo kezhau Filika kishücie sishü.

²⁵Hau la nyie mhokezhau leshü puo sa thushü:

²⁶“Klaudia Lisiae kezhau Filika therhukepfüu kelushüya.

²⁷Judako themia hau telie di puo dukhriwatuoü ketha ki puo Rommia zo ükecü si lalie tse a chüpahimia zelie di tsu puo se kelashü.

²⁸Uko kedipuo la puo pejote shicü a sishü nyü di puo ze uko mechü kehouu nu vo.

²⁹Mu a sikelie uko puo pejokecü uko thuo u zho dze kropuo la zo; sirei puo sia kesü morei tepie kedie chü kezhü puorei puo gei ngulie mo.

³⁰Siro mia puo dukhriwatuo üdi thedo rhü bata ükecü a pesikeshü ki, a puo ketse mhapie n kishüwaketuo pepilie, di puo pejo kebako ki uko bu dienyau se n mhodzü vorlienu puwate”[76] sishü.

³¹Süla chüpahikoe uko bu chünukeshü mhie di süzhü Paul ze Antipatri ketso voshü.

³²Süsie nhie uko la vorta di gura keseko bu puo ze volienushüwa.

³³Uko puo ze Kaisaria nu vo tsolie tse leshüu pie kezhau tsüshü mu Paul ze vo puo mhodzünu shü.

³⁴Siro puo leshü süu liepie phrü di puo kitsatiepuonu vor shicü ketsoshü, sitse puo Kilikiamia ücü silie tse,

³⁵puo sie “N pejokezhako vor tsokelie ze a n die rünyütuo” sishü. Süsie puo puo khapie Herod badiu[77] nu mia bu puo pfhe balienu di diekhashüwa.