Read Angami Naga Mhakechüko 24 Bible Online

Mhakechüko 24 - Angami Naga bible

Mhakechüko 24

¹Zha pengou sie zievokezhau Ananiae pehümia huo mu dienya dzekesimia, Tertula ükecüu vor. Sidi uko kezha Felika mhodzünu nu Paul kepejo dieko pushü.

²Süsie Paul kieshü, mu Tertula puo pejokecü dieko hamhie: “Therhukepfü Felika, n mhasi mu krüta kevi la hie bu puotei kecha mene di lhou vorliete, mu mhachü kesa la morokesuo kekra hie dzevi le di chüshüte.

³Hieko kehourapuorei mu puotei pete nu hau la hie neithor mu n peziethor bawe.

⁴Derei n tei kha pechawa nyü mo. Siürei noe ngumezhieshü seiyakezha tuoi hieko die huoyo rünyüshünu chaya.

⁵Themia hau mha kebvü pesuo sekecü puote, puo kijü pete nu Judamia pfükerhü tuoya mu puo Nazari[78] kro-u nu krüta chüya.

⁶Sizomonyü puo rüsuokiu rei bie perhuwatuoü kesie ki hie puo teliete.

⁷Derei nyie mhokezhau Lisia hie kemvü chü di vor hie dzie nunu puote zete.

⁸No n thuo puo ketsoshü ro puo ki nu hieko puo pejokecüko pete silietuo” sita.

⁹Sitse Judako keze puo chü puo pejo di mha hako pete ketho zo üta.

¹⁰Sitse kezhau puo bu die punu di puo dzie keleshü, sitse Paul sie: “No teicie kekra seyie hau mho capi chü vorketa silie, süla tsie n mhodzünu a mezhü puketuo tei ngukelie la a nei tha.

¹¹No rei silietuo, a rüsuotuoü di Jerusalem nu kekho zha kerekenie zoluo.

¹²Süki rüsuoki nunu a uko ze keprüli ketha miapuorei ngu mo, morei sinagog nu morei nadiu nu shierei a miapuorei pfükerhüshü mo.

¹³Sizomonyü uko a kepejo die hako ketho zoükecü puorei zhapu khashülieketuo ba mo.

¹⁴Derei a n ki hau putuo, a Chau medzi di u puotsanuoko Kepenuopfü rüsuoya, mu uko süu üse u rülakreiketuo puo üte, siürei a rei thezho-u mu siedzekesiko leshü nu thupiekezhüko pete rei peleyacümia zo.

¹⁵Ukepenuopfü gei kemerü puo tuo, uko rei kemerü süu tuo zo, süu kemiathoko rei mu kemoko rei rheilakesie nyi zokecüu.[79]

¹⁶Süla Ukepenuopfü mu themia mhodzü rei a noule bu mecümecie zoketuo a rhiechü tuoya.

¹⁷Siro a teicie huo sienu mhapie a seyieu tsüshütuoü mu ruosuo chütuoü khor.

¹⁸Mu hau chü keba ki, rüsuoki nunu u chü kemesakecü zho-u chü tseikewa sie uko a ngu, süki krodi rei tuo mo mu mha kebvükecü puo rei chü mo.

¹⁹Derei Asia nunu kevor Judako huo thuo a gei kenya nyü ba ro, uko thuo n mhodzünu vor di a gei kenyacü mese.

²⁰Moro a mechü kehou mhodzünu ketha ki a kedipuo nu kekrüta di ngulie shicü pulie,

²¹ae ‘Kesiamia rheilasieketuo pelekecü la thie nieko mhodzünu tha di a ketsozhie süu zokemo mha kekrei puorei nieko mhodzünu ketha ki pushü mo’ ” sita.

²²Derei Felikae Chau dze si kemenuolie di süsienu dienya kecütuo üdi sie, “Nyie mhokezhau Lisia bu vorkelie ze a nieko nyie hau pepituo” idi kehou thela chüwa.

²³Siro puo meho keba kezhau ki puo bu puo pfhe balienushü, derei puo bu puo medo chülie kevi huo le mu puo kezeko kehoupuo bu rei puo lie kechü kha hienuwata.

²⁴Siro zha huo sienu Felika puo kimia Drusila, Judapfü ze di vor, sidi puo Paul kelieshü di puo bu Khrista Jisu mu kepele dze pukeshü rünyülie.

²⁵Derei Paul-e sie kethoca, u kethekerekecü mu u ketsoketuo vorkezhü dzeko pushü tse, Felika michieta di, “Thie lawe tuotalie, a puotei kevi puo nhie n kie lashütuo” sita.

²⁶Siro Paul bu raka huo rei pie puo tsüketuo merü di tsiekenuo puo kie di puo ze kerüchüchüya.

²⁷Cie kenie voketa sie, Porkia Festae, Felika sou nu kezha chü vorlie, mu Felikae Judako nei chü nyü di Paul khapie kedieki nu bawa.