Read Angami Naga Mhakechüko 25 Bible Online

Mhakechüko 25 - Angami Naga bible

Mhakechüko 25

¹Siro Festae rünau nu vor tsokelie zha se sie, puoe Kaisaria nunu Jerusalem nu kho,

²Sünu zievo kezhako mu Judamia pehüko Paul pejokecü die pie puo ki pushü. Uko puo ki cha

³mu Paul petsoukecü die puo pu u mezhiemelo di puo ze Jerusalem nu kershünu chata. Ketho nu ro uko puo cha dze ba di puo dukhriwaketuo rhüpie ba.

⁴Sitse Festa sie uko ki Paul-e Kaisaria nu kedie chü ba mu puo rei pecha kemo nu sünu khotuoükeba pushü

⁵Puo sie, “Süla nieko krütako a ze kholie mu puo mha huo chü kekrüwakecü nyi ro, sünu nu uko bu puo pejoliecie” sita.

⁶Siro puo zha thetha moro ker uko ze bakeshü sie Kaisaria nu la keta, süsie nhie puo dienya bau gei balie di mia bu Paul ze vornushü.

⁷Sidi puo vorlie tse, Jerusalem nunu kekerko puo houpfü thalie di mha kekra pupie puo pejota, sirei ukoe süko zhapu khashülie kenjüta.

⁸Paul-e puo mese pu di sie, “A Judamia zho-u morei uko rüsuokiu morei Kaisar rei ngukemvü mhatho chü chie mo” sita.

⁹Derei Festa Judako nei chü nyü di Paul ki, “No Jerusalem nu kho di a mhodzünu n nyie kecüketuo n medo me?” sita.

¹⁰Sitse Paul sie, “A Kaisar dienyabau mhodzünu tha zo; mu hau nunu a nyie kecükelie mese zo. No n thuo zorei a Judamia gei kekrükecü mhapuorei chü mo zocü si ba zo.

¹¹A thezho-u varhuo liro mu sia kesü mhatho huo chüwata ro, a sia rei mvü mo zo; derei a pejo ketha die hakoha puorei ketho mo ücü sie miapuorei a khapie uko dzie nu shüwakelie jü. A Kaisar bu a nyie kecütuo” sita.

¹²Sitse Festae sie puo pehüko ze kerüchü di sie “No Kaisar bu n nyie kecüketuo chate, süla no Kaisar ki votuo” sita.

¹³Siro zha huo sie kediu Agripa mu Bernikapfü unie vor Kaisaria nu Festa kelu.

¹⁴Unie zha kenie kese sünu bakelie sie, Festae Paul dze pete pu menuopie kediu kie di, “Haki Felikaemia puo khapie kedie chü ba;

¹⁵mu a Jerusalem nu kho tse, Judamia zievoko mu pehüko puo ngukemvü die puta mu a bu puo pejowanu chata.

¹⁶Derei a sie uko ki mia puo pejokesie ki puotei pie puo tsüshü di puo bu puo pejoketako mhodzü puo mezhü pulieketuo khashü mo di puo pie mia dzie nu shükewa u Rommia zho mo üshüwate.

¹⁷Sidi uko vor hanu kengulie tse, a puotei puorei kehiewa mo di süsie nhie a dienyabau gei balie di mia bu themiau ze vorlienushü.

¹⁸Süki puo pejokecüko siethalie di puo pejovü, derei puo kekrükewa[80] puorei se puo pejolie mo.

¹⁹Sirei puo pejokecü pete rei uko thuo uko nanyütsatie dze nu mu siaketa Jisu ükecümia puo, Paul-e puo üse rhei ba ükecü dze rübei pu keprüli.

²⁰A mha hau la thedzeko si kemenuopie mhapuorei pepilieketuo chülie kenjüta, süla a sie Paul ki puo bu Jerusalem nu vo di puo nyiekecüketuo puo medo tuo mo mo shi di ketso.

²¹Derei Paul sie puo khapie haki ba zonu mu Kaisar bu puo nyie pepituoü di chata, süla a puo ketsepie Kaisar ki keshü mhodzü mia bu haki puo pfhe ba zolienu die khashüwate” sishü.

²²Agripae Festa ki, “A rei themia süu die sishü rei vi zo” sishü. Ru puo sie, “N bu sodu puo pfhe sishütuo” sita.

²³Süla süsie nhie Agripa mu Bernikapfü unie kerütso phi mu chüpahi mhokezhako mu rünau nu pehümiako ze di mia vor kehou kebachüu nu lerlie. Süsie Festae mia bu Paul ze vorlienu die khashü, ru mia puo ze lershü.

²⁴Sitse Festa sie, “Kediu Agripa mu hanu vor kebako pete, nieko themia hau ngu batuo, puo la Judako pete, haki kebako mu Jerusalem nu kebako, puo dienya se a ki vorte mu uko pete rei puo bu rhei sa tuo zhü mo üdi pheshie phrete.

²⁵Derei ae puo sia kezhü mhatho puorei chükewa ngulie mo; sidi puo kediu bu puo nyie kecütuoü chaketa la, a puo ketseshüwaketuo pepiliete.

²⁶Derei a kezhatho kediu ki puo dze kedipuo thushütie shi lelie mo ba. Süla a puo ze vor haki kebako mu, kediu Agripa n mhodzünu pekuo di bawe, sidi puo nyieu kega meho menuoshü di a bu puo dze mha huo thulie kevi chülieketuo la.

²⁷Kekreilamonyü kediemia puo puo pejokecü ca si tou di thu kemesa mo di puo ketseshüketuo a mhodzü ki lelie mokecü la” sishü.