Read Angami Naga Mhakechüko 26 Bible Online

Mhakechüko 26 - Angami Naga bible

Mhakechüko 26

¹Agripa sie Paul ki, “N thuo tsiewe n mezhü pushülie rei vite” sishü. Sitse Paul dzieziepie di puo thuo puo mezhü pukeshü hamhie:

²“Kediu Agripa, a thie n mhodzünu nu Judako a pejoketako pete la a mezhü pushütuoükecü a nei phi tha,

³noe Judamia zhoko mu dienyako si pevi phi ba, süla a n bu shügeshühiepfü di a die rünyüshünu chaya.

⁴“Judamia pete rei a khriesa ki nu a kelhou rüli sü si phre, sietsenu a themia donu Jerusalem nunu lhou sier.

⁵Uko hadzütho nu a rüli si phre ba, ukoe ketho-u putuo üro, ae sietsenu nu uko nanyü nu kepecütho Farisimia puo chü di lhou.

⁶Mu a tsie haki tha di mia bu a nyie kecütuoüketa ha Ukepenuopfü u puotsanuoko ki phrakeshüu gei a kemerü baketau la zo,

⁷mu u seyie kerekeniekoe süu ngulieketuo merü di teizeiteiso u teitso chü Ukepenuopfü rüsuotuoya zo. Mu harie kediu, kemerü hau la Judako a pejo thate!

⁸Kiüdi nieko haki kebakoe Ukepenuopfü kesiamia chü perheilieya ükecü pelelie kenjüte mu?

⁹“Ketho, a thuo zorei mha kekra nu Nazaret[81] Jisu petsou sie zo.

¹⁰Mu sükemhie di a Jerusalem nu chü zo; ae zievo kezhako ki nu kekuo chalie di kemesako kekra tepie kediechüwa; mu mia bu süko dukhrikecü ki, a rei a medota zo.

¹¹A va kekra sinagog nunu uko pechü mu uko bu uko kepeleu khawaketuo la thehiechü; mu a süko ngu a nou rüpethorcüpfü uko pechüketuo la uko pfhü mia rünako nu rei vo zo.

¹²“Mha hau chüketuo la a zievo kezhako ki kekuo mu chülie kevi chalie di Damaska nu kezhü,

¹³mu kediu, a rüvecha nu khinhieluo niaki kirei ziekuokecü kezie puo teigeinu tsur a mu a ze ketuoko khie lutsahatsa vata.

¹⁴Sidi hieko pete te kijü tsuta tse, mha pfhe puo Ibri[82] die nunu a ki pukecü, “Saul, Saul no kiüdi a pechüpenyüya ga? Seithie kepakecü n thuo n pechü keba zo” isita.

¹⁵Sitse ae sie, ‘Niepuu no supuo ga?’ ishü. Süki Niepuu sie, ‘A Jisu, no puo pechüpenyüyakezhau.

¹⁶Derei no sielie di thalie, kekreilamonyü a thie n pengukeshü, n bu a kenguko mu thiesie n bu a nguketuoko zhapu chüketuo n kedakelie la zo.

¹⁷A n ketsepie n themia mu Judakemomia kishü zhükecüko dzie nunu n kelashütuo,

¹⁸n bu uko mhi chü kemhirhopie kezeiu nunu kezieu ngulieketuo mu Satan kekuou dzie nunu rürei Ukepenuopfü kekuou nu vorlie, sidi uko bu u kepeleu pie a gei balie di kephoumako va lalie di chü kemesalieketako donu u tha nyilieketuo la’ sita.

¹⁹“Süusie, kediu Agripa, a teigei ziemho dieze chü mvüta mo zo,

²⁰derei a therieu Damaska nu mu Jerusalem nu süsieu Judia kijü pete nu, mu Judakemoko ki rei sa idi uko bu thenou rürei la Ukepenuopfü ki vorlie morokesuo mu thenou kedilieta ükecü u kelhou nunu pie pekieshü morokesuo dze pu pethashüte.

²¹Mha hauha la Judakoe rüsuokiu nunu a telie di a dukhriwaketuo thehiechü.

²²Derei thie ketso Ukepenuopfü a khruohi tuo zocü la, a tsie haki ketha kecümia kirei kezhamia kirei zhapu chüzhie, mu siedzekesiko siro Mosae pukeshü chü vorketuo kepuu sie die kekrei puorei pu mo zo;

²³süu Khrista bu kemezhielietuo, sidi kesiako donu nu rheilasielie kerieu chü di kezieu pie Judako mu kemoko pesishüketuo lawe” sishü.

²⁴Haidi puo mezhüko pu ketha nu, Festae shiekhoui di sier, “Paul, no nyate! Leshü phrüthorcü la n chü penyawate” sita.

²⁵Derei Paul sie, “Harie, therhukepfütho Festa, a nyata mo! A ketho-u puya.

²⁶Kediu thuo rei mha hako si ba zo, a puo ki a kethechie mo di pu tha zo; sizomonyü die hako puoe sikemo puorei mo zoükecü a le tou tha zo, hako mia kejüra nu chü mo zocü la.

²⁷Kediu Agripa, no siedzekesiko peleya mo? No süko peleyacü a si ba.” sita.

²⁸Sitse Agripa sie Paul üse, “No hai zo di a bu Khristamia chü mhailie thenyüsieya me?” sita.

²⁹Sitse Paul sie, “Zi rei morei a Ukepenuopfü ki a mezhiemelo kethau sü, no mu thie a die rünyü keba pete bu rei a khepfü kebau mhieta zo kemosie, a mhie phreta nyü zo” sita.

³⁰Sitse kediu sie thata, mu kezhau mu Bernikapfü tsiu puo khie kebako pete siethata;

³¹sidi uko tuoprakezhü ki huoniehuo üse, “Themia hauha sia kezhü morei kedie chü kezhü mhatho puorei chüwa mo zolie” isi tuota.

³²Siro Agripa sie Festa ki, “Themia hauha kediu bu puo nyie kecütuoü chata kemosie puo kha lashüwatalie vi zo” sita.