Read Angami Naga Mhakechüko 27 Bible Online

Mhakechüko 27 - Angami Naga bible

Mhakechüko 27

¹Süsie hieko bu rou geinu Itali nu voketuo pepilieta tse, uko Paul mu kediemia kekrei huo sa pie Julio ükecü krie mhokezha Agustu Kro-u nu Rüpfhünuo dzie nu shüwa.

²Hieko Adramutium rou puo gei pfülie, süu Asiatsa dzükezha khie rou rüleichüko nu votuoüzhü; sidi hieko tuoshü, sükisü Thesalonia nunu kevor Makedoniamia Aristarka rei hieko ze tuo.

³Siro süsienhie hieko vo Sidon tsolie; mu Julio-e Paul gei viya mu puo bu vo puo zeko ze keselie kevi chüshü di rüleilie.

⁴Sünu nu ta lashü derei teikhrie hie petsouketa la, hieko rou thu kijü rüchütsokemo Kupra khrotsatie merhie vo.

⁵Sidi hie rou thu se Kilikia mu Pamfilia mhodzütsa kezhü dzükezha pfüthe se Lisia kijü Mura nu vorlie.

⁶Sünu krie mhokezhaue Alekandramia rou puo Itali nu vortuoükeba puo ngulie, süla hie süu gei pfülie.

⁷Hieko zha huo rüli phi di rou thu vozhü mu re se di thu Knida mhodzünu volie, derei teikhrie hie petsouketa la tuo sashülie kenjüta di hie rou ze Kreta khro merhie zo Salmone mhodzünu volie.

⁸Hie kemezhie phi di dzükezhakhie merhie vor Lisia nadiu kepenuo ki Kenei Rüleichü ücüu tsolie.

⁹Puotei kekra pevowata mu dzükezha rüve chükecü kemichie nyita, Kemevonyi teiu rei vota, süla Paul uko tarho,

¹⁰di sie, “Kezhako, úko rüve tsieuva michie rei mu ka rei philie vi mu úko mha pfüketuoko mu rouu zomonyü uphou rei sa katalie vite” sishü.

¹¹Derei krie mhokezhau Paul-e pukeshü dieu kirei rou mhokezhau mu rou niepuu diezeta.

¹²Siro rou rüleichüu nunu teisei teiu pevoketuo vi zo mota; süla themiako pete khre rei tuo lashü di Foiniko nu volie di süu nunu teisei teiu pevoketuo u nei phreta. Süu pesopekhro valie kevi Kreta nu rou rüleichü puo.

¹³Pekhrotsa nu tei rükhrie zaza vor mu themiako u kele mhie volieketuo medo di uko rou phreilie di rou thuse Kreta khie merhie vozhü.

¹⁴Derei pecha kemo nu Kreta nunu Pesotsa Khriedi ücüu tsurta.

¹⁵Sidi süu vor rouu heta, süla rou thu teikhrie petsoulie kenjüta tse, hie süu khawa di teikhrie bu rouu hepfü tuota.

¹⁶Sidi kijü rüchütsokemo Kauda[83] khrotsa va vozhü tse hie keya ngulie di hie chü re phi di rou kecüyo merhashülie di pha kemetei pie bawa.

¹⁷Sitse uko süu teshü se sierlie di rou kezhau pha kemeteilie, siro uko rouu vo Sirti nu huocanyo thukewa prei di rou pfheu lhe kerünuo tsurwa, sidi teikhrie bu rouu hepfü tuota.

¹⁸Siro khriediu rükhrie ba zota tse süsie nhie uko rouu geinu mhanya huo keta kelhou sedevüta,

¹⁹si ba zha se nhie u dzie pie rou gei mhanyako keta kelhouta.

²⁰Siro hieko zha kekra niaki rei themvü rei ngu mota mu hie he petsa moketa la hie rheikelie puo rei pele tuo mota.

²¹Siro puotei kecha themiakoe mhacü mo di tuoketa la Paul uko donu sie thalie di, “Themiako, nieko a die ze di Kreta nunu rou bu tuoshü moücüwe mha kepeka mu pejükewa hako chü molietieciü.

²²Derei a tsie nieko bu thepfulienu puya, nieko mia puo kerheiro rei pevowalie lho; rouu rübei pekakewa zotuo.

²³Kekreilamonyü a puo vie mu puo rüsuoyakezhau Ukepenuopfü dieliemia puo n zhü vor a khieki thalie,

²⁴sidi puo sie, ‘Paul, michie hiecie; no kediu mhodzünu vo morosuo; mu ketho zo, Ukepenuopfü n ze di rou geiketuoko pete kerheiro kelashüte’ si.

²⁵Süla thepfuliecie, themiako, kekreilamonyü a ki pukeshü tuoi chülie zoketuo a Ukepenuopfü pele tou ba zo.

²⁶Derei úko hepfü dzükezhakhie kijü rüchütsokemo huora vo zotuo” sishü.

²⁷Siro teizeizha keredia zhü khriediu bu hieko hepfü Adria dzükezha nu vota, mu khisoteiluo ki roukethukoe kijü penuo votazhü nhiecü leta.

²⁸Süla uko keropie mha kemesi puo khelie di dzü kesou mejü sie ru thu krie di mepfü bacü ngulie; süsie sa za phi di mejü lashü ru thu hiethepfü zoketa ngulie.

²⁹Sitse hieko rouu vo tsiekrie huo thukecü preita, süla uko mha kemesi dia pie rouu sietsa kheshü di teiso pfhe kelho chü bata.

³⁰Derei roukethuko rouu geinu taketa le di rou kecüu petepie dzü nu shülie di rou mhodzütsa rei mha kemesi huo kheshüketuo meviva bata.

³¹Derei Paul sie krie mhokezhau mu chüpahiko ki, “Themia hako rou gei ba zokemosie, nieko kelalie kenjü” siwata.

³²Süla chüpahiko rou kecüu khepie keba roko dathewa di süu petawata.

³³Siro teisotie ki Paul sie uko pete bu kecüca huo cülienu di sie, “Nieko tsieketso zha kerediako kecüca puorei cü mo di tuote.

³⁴Süla a nieko bu mha huo cülienuya; rhei balieketuo la nieko süu cülie; kekreilamonyü nieko tsü geinu nie thaprü yopuo rei pekawalie lho” sita.

³⁵Siro puo hau pukeshü sie, puo niekhrüda chüpielie di uko pete mhodzünu nu kethezie khapie Ukepenuopfü tsüshü di süu bietshiepie cülie.

³⁶Sitse uko rei thepfulie mu uko pete rei kecüca huo cülie.

³⁷(Hieko rou gei ketuoko pete kesa mia krie kenie di hietheniesorou.)

³⁸Siro uko pete mhacü chüsechülieketa sie, thoulha pfüketuoko pete kelhoupie dzükezha nu shüwa di rouu pie chü kemedzalie.

³⁹Teiso parlie tse, ukoe kijüu silie mota, derei dzükezha khietsatie kijü rükou puo ngulie di, chülie vi ro rouu thuse sünu lekelie leta.

⁴⁰Süla uko rou gei mha kemesi khepie kebako dathepie dzü nu shüwa, süsie routhusei phapie keba keroko phreishü; siro rou mhodzütsa pfheu lha kerükrieshü di teikhrie bu rouu hepfü pedzü dzükezhakhietsatie va vozhü.

⁴¹Derei rou vo ketsie puo[84] thuta mu rouu mo kekreitsa mapfülie di kelelie suota, tsiu rouu sietsatie dzü rüpfhü kereu bu bietshebietshawata.

⁴²Süki chüpahikoe kedieko bu dzüvü puo khie pa di tata molieketuo la uko pete dukhriwaketuo rhü bata.

⁴³Derei chüpahi mhokezhau Paul kelalie nyüta, süla uko bu uko mharhüu chüketuo khawata; sizomonyü puo themiako dzüvülie kevi peteko bu kelie di kijü keso nu palienuta;

⁴⁴mu kekreiko bu melako morei rouu ketsa coko geinu palienuwa. Hamhiei peteko rei kru di keso nu pra phrelie.