Read Angami Naga Mhakechüko 28 Bible Online

Mhakechüko 28 - Angami Naga bible

Mhakechüko 28

¹Hieko ta sünu pralie tse, kijürüchütsokemo süu üse Malta ücü silie.

²Siro sünu keba khenumiako hieko gei vi phishü. Siro teirüta di meku phiketa la uko mi chüpie hieko bu peguo.

³Süki Paul rei sei khro puo pie vor mi mhoshü tha ru mi kele ze tinyhü puo rüka par puo bou reipfülie.

⁴Süki khenumiako tinyhü hau, puo bou reipfükelie ngushü di sie huoniehuo üse, “Themia hau mia kedukhrimia puo toute, dzükezha nunu puo se kelashü zorei puo bu rheilieketuo theruo we tuo mote” si tha.

⁵Derei puo khunuo süu kegepie mi nu shüwata, mu puo gei mhapuorei mo zo.

⁶Uko puo üse rümie mha zo partatuo morei tetsu siazhütaketuo le tha, derei pfhe zo tha rei puo gei mhapuorei kreita mokecü ngu tse, uko kele rüdi lata di, puo üse terhuomia puo üta.

⁷Siro thechü süu kepenuoki lie kro puo kijü rüchütsokemo sünu rüna peyuu Publio ükecüu lie, puo puo neisiei di hieko zelie mu zha se hieko puo so chü.

⁸Süki Publionuo puou ruki mu thezie buo di suo phizhü. Paul vo puo la chashü mu puo dzienie pie puo geishü di puo chü keshürhoshü.

⁹Mha hau chüketa sie, kijürüchütsokemo nu kechükenyümiako ze vor mu süko shürholie.

¹⁰Siro uko mha kekra pie hieko tsü, tsiu hieko rou ze tuo lakeshü ki, hieko rüve la rei se morokesuo pete pie hieko tsü.

¹¹Siro khrü se sie nu hieko Alekandra nunu vor keba rou puo puo za Nuobinie üdi thukepfü puo teiseiki vor kijürüchütsokemo hau nu rülei kebau gei pfülie.

¹²Sidi hieko vor Sarakus tsolie mu zha se sünu bata.

¹³Süsie nhie hieko rou ze rüwhi vo Rhegium tsolie. Siro süsie nhie pekhrotsa nu teikhrie puo rükhrie vorlie, mu hieko bu zha kenie nunu Puteoli nu vorlie.

¹⁴Mu hieko sünu kepelemia[85] huo ba di ngulie ru hieko bu zha thenie uko ze bashünuta. Hai di hieko Rom nu vorlie.

¹⁵Rom nu keba kepelemiakoe[86] hieko vorkezhü dze silie di Apia Lhithochü mu Rüsoki Seko nu ketso vor di hie zelie. Süko ngushü tse, Paul Ukepenuopfü tshe mu thepfu reilie.

¹⁶Süsie hieko Rom nu vor tsolie tse, chüpahimia puo bu Paul pfhe baketuou thoü puo bu puo ki krei di balieketuo chüshü.

¹⁷Siro zha se sie puo Judamia krütako kie kengulie. Sidi uko vor kengulie tse puo uko ki, “A kezeko, ae u themia kepetsou morei u pfutsanuo zhoko kepetsou puorei chü mo zoürei, Jerusalem nunu a telie di a pie Rommia dzie nu shüwate.

¹⁸Siro uko a ketsokewa sie Rommiako a kha lashüwa nyü sie, kekreilamonyü uko a bu sia kezhü mhatho puorei ngulie mo.

¹⁹Derei Judako hau chü mvüketa ki a a seyieu pejoketuo puorei ba mo zoürei, a Kaisar ki a nyiekecüketuo cha molie kenjüta.

²⁰Hau la a nieko kieshü di nieko ze kerüchüketuo leliete, Israelmia kemerüu la thegiro hau pie a phapfütuo zocü la” sishü.

²¹Sitse uko sie, “Hieko zowe Judia nunu n dze leshü puorei ngulie mo, siro u kezeko miapuorei thedze hau pukeshü morei n dze pu pesuokecü puorei si mo.

²²Derei hie n ki nu n kele puo sishü nyü ba, kekreilamonyü lukihaki themiako hau zeyakezha kro-u dze pu pesuo phi phre tuoketa la” sita.

²³Süla uko khunhie puo vor puo ze keseketuo zhau chielie tse sünhie uko themia kekra puo bayakezha kiu nu vorlie. Sitse puo khise nu vo theva ketso Ukepenuopfü kedi dze pu menuopie uko kieshü, mu puo uko bu Jisu dze si toulieketuo la Mosa zho-u nunu mu siedzekesiko leshüko nu kepu cako vatsha menuoshü.

²⁴Mu puo dieko la huomia bu pelelie derei kekreimia huowe pelelie mota.

²⁵Sitse uko thuo uko donu nu kedierhe mota di tuota, süsie Paul sie mha pu sa di: “Kemesa Ruopfüu thiedzü Isaya siedzekesiu tie nunu nie puotsanuoko ki pu toupiezhü zo,

²⁶‘Themia hako ki vo di pushüliecie, nieko kerünyü we rünyütuo, derei mhakipuorei puocapuola silie lho; nieko kemeho we mehotuo, derei mhakipuorei lelie lho.

²⁷Kekreilamonyü themia hako u melou rüvo tuote, mu u nyie rei kenyiebite, uko mhi mhimiete, sidi uko uko mhi pie meho molieketuo la, mu u nyie pie rünyü kelho la, tsiu uko melou pie mha silie mu rüreilie di a bu uko chü keshürhokeshü keprei la’ sishü.

²⁸Süla Ukepenuopfü kelakelie dieu khapie Judakemoko ki shüwaketa nieko hau siliecie; uko rünyülie zotuo” sishü.

²⁹Puo hau pukeshü sie, Judako u thuo u donu nu keprüli phi di tuota.

³⁰Sidi puo cie kenie la puo thuo mia ki nyiekelie[87] puo nu bata, di mia puo ki kevor kheko ze kese,

³¹mu puo thepfu se di Ukepenuopfü kedi dze pupie mia kie mu Niepuu Jisu Khrista dze pie mia petha ba tso mu miapuorei puo kha mo.