Read Angami Naga Mhakechüko 3 Bible Online

Mhakechüko 3 - Angami Naga bible

Mhakechüko 3

¹Khunhie puo Pitor mu Johan unie thehesie keba se ki, kecha teiu nu rüsuoki nu vozhü.

²Sitse penuolie tse nu rünyiecü puo pie vor. Puo bu rüsuoki nu kevor kheko ki mha chatuo üdi mia teisonhie puo pie vo Care Keziviu ükezha rüsuoki careu nu baya.

³Puo Pitor mu Johan unie rüsuoki nu letuo ükezhü ngu di unie ki mha cha.

⁴Sitse Johan tuoi Pitor rei puo mehoter di sie, “Hienie meholie” sishü.

⁵Sitse puo unie ki mha huo ngulieketuo merü di unie meho bata.

⁶Derei Pitor sie, “A raka morei suna se tuo mo, derei a seketuou pie n tsütuo, Nazaret[13] Jisu Khrista za se puya, sie chatuoliecie!” sishü.

⁷Sidi puo themiau dzie thezatsa teshülie di puo teshü piesieshü; sitse vapuonu themiau phinie mu puo phico kere metei parta.

⁸Sitse puo karüi sie thalie di chatuo tuota, mu puo chatuo mu rülhou tuota, tsiu Ukepenuopfü tshe di unie ze rüsuokiu nu leta.

⁹Themiako pete puo chatuo mu Ukepenuopfü tshe ketuo ngu,

¹⁰mu uko puo rüsuoki Care Keziviu nu khruo cü bayakezhau ücü silie di uko puo geinu mhachüketau la u ngo phita.

¹¹Themiau Pitor mu Johan unie zetuota, mu themiako u ngo phi di keze ta Solomon kifükhro ükezhau nu uko ki vorta.

¹²Pitor süu ngu tse sie uko ki, “Nie Israelko[14], kiüdi hau la nie ngo, morei kiüdi nie hie mehoterü mu hie kevikekuo üse themia hau chüpie puo bu chatuolie ücü leya ga?

¹³Abraham, Isak mu Jakobnuoko Kepenuopfü, morei u puotsanuoko Kepenuopfüu thuo zayie kechü kekuo pie puo kituou[15], Jisu geishüshü, nieko puo khapie mia dzienu shüwa, Pilat zowe, puo khashüwa nyü sie zoürei nieko Pilat mhodzünu puo meliewa.

¹⁴Sirei nieko Kemesau mu Kemiatho-u meliewa di mia kedukhrimia puo pie nie tsünu cha,

¹⁵sidi nieko kerhei khakeshüu dukhriwa, sirei Ukepenuopfüe kesia nunu puo chü perhei laliete. Hie süu zhapuko zo.

¹⁶Mu puo za pelekelie la puo za süu thuo nieko si mu ngu ketha themia hau chü pekuokelie zo. Mu Jisu geinu kepar kepeleu thuo nie pete mhodzünu themia hau chü keshürho lotsokelie zo.

¹⁷“Mu süla, kezeko[16], a sikecü nie rei mu nieko mhokezhako rei sitso mo di süu chüwa.

¹⁸Hai Ukepenuopfüe Khrista bu kemezhieketuo dzeko siedzekesikoe pete pedzüperie pukeshüko chü tseilie.

¹⁹Süla thenoukedilie di rürei Ukepenuopfü ki vorlie, silie liro nie kephoumako vawatuo,

²⁰mu Niepuu ki nu thenou vakepemvü teiu vorlietuo, sidi nie la kedapie keba Khrista, süu Jisu ketseshü nie kishütuo,

²¹puo mha peteko chü kesa la morokesuo teiu vor kemochie teigei ba morosuo. Ukepenuopfü thiedzütho puo kemesa siedzekesiko tie nunu pushüwate.

²²Mosae pukecü, ‘Niepuu nie Ukepenuopfü thuo siedzekesi a tuoicü puo bu nie themiako[17] donu siertuo. Puo mha kehoupuo nie ki pu rei rünyü morosuo.

²³Kehoupuorei siedzekesi süu die ze kemo-u themiako donu nu puo phe kemesawatuo’ si.

²⁴Siro Samuel yawinu puo sie lhou kevor siedzekesimia pete mha kepu khe nu teisozha hako vortuoü di pu zo.

²⁵Nieko siedzekesiko nuosenuoyieko mu Ukepenuopfü nie puotsanuoko ze dietseidiekho chükeliemia nuoyieko zo, sidi puoe Abraham ki, ‘Mu n nuosenuoyieko geinu kijü nu seyie pete bu thejapfütuo’ sishü.

²⁶Ukepenuopfü puo kituou[18] sesier di ketse riepie nieko ki shü, nie kehoupuo bu rei mha kesuo kechüu nunu rüreilie di theja ngulieketuo la” sita.