Read Angami Naga Mhakechüko 4 Bible Online

Mhakechüko 4 - Angami Naga bible

Mhakechüko 4

¹Pitor mu Johan unie themiako ki diepu ketha nu zievoko mu rüsuoki kepfhe mhokezhau mu Sadukiko unie ki vorta,

²unie-e Jisu geinu kesiamia rheilakesie nyikecü dze pie mia pethaketa la u nou u nei mo phituo.

³Süla uko unie telie mu süki thevatieketa la unie khapie ba süsienhie tso.

⁴Derei dieu kesiko themia kekra pelelie; sidi süko lekesie nyie pengou mese.

⁵Süsienhie uko razou kezhako, pehüko, mu thezhokepethako Jerusalem nu kengulie,

⁶phichükezhau Ana, Kaifa, Johan[19] mu Alexander, tsiu phichükezhau ze keseyiecü pete.

⁷Uko kedienie ze vo uko donu thalie tse sie, “Nnie kedipuo kekuo morei kedipuo za se hau chüya ga?” idi ketso.

⁸Sitse Pitor, Kemesa Ruopfü bu puo tshupfhü di uko ki, “Kezhako mu pehüko,

⁹mhatho kevi chüpie kerünyieu geikeshü mu puo kimhie di shürholiete shicü dze thie hienie ketsoya üro,

¹⁰nieko pete rei mu Israelmia pete rei si touliecie, tsie haki ketha themia hau shürhokelie ha Jisu Khrista Nazaret-u[20] za kekuo nunu zo, süu niekoe puo goukewau mu kesia nunu Ukepenuopfüe puo chü perhei lakelieu zo.

¹¹Jisu hau ‘Kikechüko, niekoe khakewa tsieu; süu bu kike mvüdze tsieu[21]’ chüliete” sishü.

¹²Puo geinu zokemosie kelakelie kekrei puorei jü, kekreilamonyü u kelakelie morokesuo la tei khro chüüphou donu theza kekrei puorei tuo mo.”

¹³Ukoe Pitor mu Johan nie kethepfu ngushü mu unie kesimia zo mo mu miaümia zoükecü silie tse u ngota mu unie hadzü rei Jisu zetuoya ücü sita.

¹⁴Shürhokelieu unie khie ki thakecü ngukelie ki uko mhapuorei pu pejo salie kenjüta.

¹⁵Sidi unie bu mechü kehouu nunu tuotanuwa, sidi uko thuo uko donu nu kerüchü bata.

¹⁶Uko sie, “Úko themia hanie pie kedipuo chü ro vita? kekreilamonyü Jerusalem nu kelhoumia pete rei unie geinu zasi kemeyie puo chükeshü; we rei süu moükelie pulie kenjüte.

¹⁷Derei hau dze keyie pekrapie mia ki shü sawa kemo nu úko unie bu mia ki theza hau pu sa hienu kedewa khe” sita.

¹⁸Süla uko unie kielie di unie bu mhakipuorei Jisu zau se pu morei petha sa hienuwata.

¹⁹Derei Pitor mu Johan unie sie uko ki, “Ukepenuopfü mhodzünu Ukepenuopfü pfhe zekecü ki nieko pfhe zekecüu puo toukuotuo mo ki shi, nieko thuo le phicie;

²⁰kekreilamonyü hie kesi kengu-u pu molie kenjü ze” siwa.

²¹Sidi unie kede za lakewa sie, unie bu tuota, unie pechülieketuo ca puorei ngulie kenjüta, kekreilamonyü themiako pete unie mhatho süu la Ukepenuopfü tsheketa la.

²²Siro shürhokelie zasi hau puo geinu chükelieu kelhouzha cie hiedia rei zie saketa la.

²³Mia unie khashükewa sie, unie la unie kro-u[22] nu vor di phichükezhako mu pehüko unie ki kedipuo pu shicü kezashü.

²⁴Siro uko süu sikeshü ki, uko pete keze puo chü u pfhephra peto di Ukepenuopfü ki, “Kekuotho Niepuu, tei mu kijü, dzükezha mu süko nu ketuo pete chükeshüu,

²⁵Kemesa Ruopfü geinu no hie puotsau David, n kituou[23] geinu pukeshü, ‘Kiüdi Judakemomia u nou rüpeya ga? mu themiako kemethuoko medoya ga?

²⁶Kijü nu kediko u kesese thate, mu kezhako keze kengulie di, Niepuu mu Khristau petsou thate.’

²⁷Ketho zo, Herod mu Pontia Pilat unie rei rüna hau nu Judakemoko mu Israelko ze kehou di n kemesa kituou[24] Jisu, no puo kenhekelieu petsou zo,

²⁸sidi n dzie mu n mharhü pedzüperie chütuoü di rhüpie ketuoko chüwa.

²⁹Mu Niepuu, tsie uko mha kechükede kebako mehoshücie, di n kituoko[25] bu thepfu di n dieko pulieketuo chüshücie,

³⁰n kekuo dzieu yhashü mia chü keshürhoshü mu n kemesa kituou[26] Jisu za nunu zasi mu ungomhatho chülieketuo khashücie.”

³¹Sidi uko kecha chüshü tse, uko vo kehou kebachüu shükenieta; süsie uko pete Kemesa Ruopfü u tshupfü tsiu thepfu di Ukepenuopfü die pu tuota.

³²Süki kepeleko keze ruopfü mu nou puo chüta, mu miapuorei puo thuo puo vieü puo vieü mota, derei uko mha pete pie vierhe chüta.

³³Siro apostelko kuo se di Niepuu Jisu rheilasieketa zhapu chü bata, mu uko gei ngukemezhieu thuo tshupfü bata.

³⁴Süki uko donu ketsopfhümia puorei jüta, kekreilamonyü u ki u lie kenyimia, süko zelie di zekelie mako se vor.

³⁵Sidi uko süko pie apostelko phi ki khashü, mu mia puopuo tsopfhü le di uko süko kezalieta.

³⁶Süki mia puo Josef ükecü Kupra nunu penuokelie Levimia puo, apostelko puo üse Barnaba (puoca “mia chü kethepfuyakezha nuou”).

³⁷Puo lie puo zelie, sidi puomako se vor apostelko phiki shü.