Read Angami Naga Mhakechüko 5 Bible Online

Mhakechüko 5 - Angami Naga bible

Mhakechüko 5

¹Derei Anania ücüu, puo kimiapfü Safira ze kepfhesi di lie puo zelie,

²mu puo kimia ze kenourhe di puoma huo pie zhüwa, sidi kekreiko se vor apostelko phinu shü.

³Pitor sie, “Anania, no kiüdi Satan bu n nou tshupfü di lie ma huo pie bawa di Kemesa Ruopfü seya ga?

⁴Süu zekewa mhodzü n vie moü me? Mu süu zelieketa sie rei puomau n vie zo mo me? No kiüdi mha hikecü chüketuo medoya ga? No hieko[27] monyü Kemesa Ruopfü sewate” sita.

⁵Anania die hau silie mumetha tetsu di siata mu süu dze kesi khe michie phita.

⁶Sitse khriesako ler puo mo-u kezilie di puo toupie vo khruwa.

⁷Siro bavüdo se mese sie, puo kimia kedipuo chüte shikecü dze puorei si mo di vor.

⁸Sitse Pitor sie, “A ki pushücie, n nupfu nnie lieu zekelie ma hai zo me?” idi ketso. Sitse hapfü sie, “U, cüde zo” sita.

⁹Sitse Pitor sie puo ki, “Kiüdi nnie Niepuu Ruopfü kedoketuo kenourhe haita ga? Harie, n nupfu khrukewako tsie vor kicie ki thate, mu süko bu n sa pie vo khruwatuo!” sishü.

¹⁰Sishü mumetha hapfü vapuochü tetsu puo phinu siazhüta, süsie khriesako tuo ler tse puo siazhüketa ngulie, süla uko puo toupie prata mu pie vo puo nupfu khieki nu khruwa.

¹¹Süla kehouu mu kekreimiako pete rei thedze hau kesiko michie phita.

¹²Siro apostelkoe themiako donu nu, zasiko mu ungomhatho kekra chüshü. Siro uko pete vo Solomon Kifükhro nu kengulie.

¹³Sirei kekreimiako le uko sa michieta, sirei themiako uko le pevi phita.

¹⁴Derei thenumia rei thepfumia rei kepelemia kekra Niepuu kitsa vor miemieta.

¹⁵Siro Pitor tuo kevor ki, puo khrü bu zorei huomia morei huomia vakeshü le di u kechükenyü toupie chaüko nu thezhüko mu zoprieko gei pie zhüzhütaya.

¹⁶Süki themia krodidicü Jerusalem khieümhou rünako nunu kechükenyümia mu mesakemo ruopfü bu u kebi zetuoketako ze vor, mu süko pete chü keshürho shülieta.

¹⁷Süki phichü kezhatho-u mhatho chü sieta; puo mu puo zeketuo pete (süko Sadukiko kro-u zo) u ro se sie di

¹⁸apostelko tepie kedieki nu khawa.

¹⁹Derei theva Niepuu dieliemia puo vor kedieki careu khrüshü di uko ze par, di sie,

²⁰“Rüsuoki nu vo thalie di themia peteko ki kerheiprü dielie hako pete pushülie” sita.

²¹Uko hau sita tse, teisotie tuo rüsuoki nu le di mia petha bata. Phichü kezhau mu puo zakroko vorlie tse uko mechü kehouu mu Israel pehümia pete kieshü, sidi mia ketsepie kedieki nu shü di uko ze vornushü.

²²Derei rüsuoki nu thenako sünu vo tse, kedieki nunu uko ngulie mota; süla uko la vor di pukecü,

²³“Hie vo kediekiu khatsapie ba di ngulie mu kedieki kepfheko pete rei careko pfhe tha zo, derei hieko kikha khrü le ru, miapuorei kinu ba ngulie mo” sita.

²⁴Zievokezhako mu rüsuoki kepfheko mhokezhau thedze hau silie tse apostelko gei kedipuo chütie shicü lelie mo bata.

²⁵Süki mia puo vor di sie, “Harie, nieko kedieki nu khapie kebako vo rüsuokiu nunu mia petha thate” sita.

²⁶Süla kezhau rüsuoki thenako zelie di uko pechüwa mo di ze vor, ukoe mia bu ketsie pie uko vakecü preiketa la.

²⁷Siro uko ze vor kehouu mhodzünu thalie tse Phichükezhau uko ketso,

²⁸di sie, “Hie nieko bu theza hau se petha hienu di nieko kha beishü, derei nieko kepetha dieu pie Jerusalem nu kezawa mu themia hau zie pie hie gei shütuoü medo bate” sishü.

²⁹Derei Pitor mu apostelkoe uko die kela di sie, “Hie themia kekuo kehoupuo[28] kirei Ukepenuopfü die ze morosuokuo.

³⁰U puotsanuoko Kepenuopfüe nie sei geinu puo goukewau Jisu chü perheilaliete.

³¹Ukepenuopfü puo chü pezhapie puo zatsashülie di puo bu Krütau mu u Kelakelieu chüliete, sidi puoe thenoukedikelie mu kephoumako vakelie pie Israel tsüketuo la.

³²Mu hie süko zhapuko zo, süsü tuoi Ukepenuopfüe puo die zekelieko tsükeshü Kemesa Ruopfüu rei zo” sishü.

³³Uko hau silie tse, uko nou rüpepie uko dukhriwa nyü sieta.

³⁴Derei mechü kehou nu Farisimia, Gamaliel ükecü thezho kepethamia puo, themia pete mhodzü therhu pfüyakezhau, sie thalie di mia bu themiako ze chazou patanuta.

³⁵Süsie puo uko ki, “Keze Israelmiako[29], nieko themia hako gei kedipuo chütuo üba shi, menuoliecie.

³⁶Kekreilamonyü thiedzü Theuda, puo thuo puo üse mia puo üdi sier, mia krie dia mese puo siemedziketa dze rükra batuo; derei puo dukhriwa, mu puo siedziko pete rei whuo kecürewa di jüte.

³⁷Puo sie nuolhou phrükecü teiu nu Juda Galil-u la sier; mia bu puo siemedzilie, puorei siata mu puo siedziko pete rei ta u ketuora si mote.

³⁸Süla a nieko ki pushütuo, hau nyie nu rei themia hako gei nie ketheliecie, uko khashüwalie; kekreilamonyü mhatho hau morei chükezhü hau themia ki nu zo liro thalie lhotatuo;

³⁹derei Ukepenuopfü ki nu vor üro nieko süko penyülie kenjü, nie thuo Ukepenuopfü ze keperhie ketha zotatuo” sita. Sitse ukoe puo die rünyülie,

⁴⁰sidi ukoe apostelko kie la ze vorlie tse uko vüwa, mu uko bu Jisu za se pu sa hienuwa di uko bu tuota.

⁴¹Uko mechü kehou nunu tuota tse uko neisiei vota, uko theza süu la kemezhie di zhasepfükecü uko zha chülie üdi leketa la.

⁴²Siro uko teisonhie rüsuoki nu mu huoniehuo ki nu rei Jisue Khristau zoükecü se mia petha mu pu mia kie ba zota.