Read Angami Naga Mhakechüko 7 Bible Online

Mhakechüko 7 - Angami Naga bible

Mhakechüko 7

¹Sitse zievo kezhau sie puo ketso di, “Mha hako si zo me?” ita.

²Stefan sie: “A kezeko[32] mu a krünuoko, a die rünyüshücie. Zayie Kepenuopfü u puotsau Abraham vo Haran nu kelhou mhodzü Mesopotami-a nunu puo pengushü,

³sidi puo ki, ‘N rüna mu n seyiemia khawa di tuo zo a kijü puo tha n kieshüketuou nu voliecie’ sita.

⁴Süla puo Chaldian kijü khawa di vo Haran nu lhouta. Puo puo se sie, Ukepenuopfü puo bu tsie nieko lhou keba kijü hau nu vorlie.

⁵Sirei Ukepenuopfü puo ya kijü phizho puorei rhuopie puo tsü pekrei mo, derei kijü süu pie puo mu puo yieko vie chü zotuoü phrashü, puo nuo puorei jü zoluo ürei.

⁶Derei Ukepenuopfü pukecü hamhie, puo yieko bu vo sikemo kijü puo nu lhoutuo, mu uko miadiemia chü di cie krie dia mia bu uko pese phituo.

⁷Ukepenuopfü pukecü, ‘Sirei mia uko tepie u die chükecüko, a süko pejotuo, siro süsie uko la parlie di thechü hau nunu a lie chütuo’ si.

⁸Süsie puo dietseidiekho chülieketa zasi la puo zhüre. Sütuoi Abraham puo nuou Isak penuolie mu zha thetha nhie puo zhürelie; siro Isak puo nuo Jakob ngulie mu Jakob geinu u puotsanuo kerekenie lhoulie.

⁹“U puotsanuoko, Josef ngu u rota di puo zepie Ijipt nu shüwa; derei Ukepenuopfü puo ze tuo,

¹⁰sidi puo kemezhiekecü neiüko nunu puo kelalie, sidi puo Ijipt nu kediu Faro mhodzünu kevor ki zorei mhasi mu mia khriepfükelie theja ngulie, sidi puo chüpie puo bu Ijipt kijü nu puo kikru pete kekhakezhau chülie.

¹¹Süki Ijipt mu Kanan kijü pete nu pekrie di kemezhie phita mu u puotsanuoko kecüca puorei ngulie kenjüta.

¹²Derei Jakob-e Ijipt nu telha ba ükecü sikelie ki puoe u puotsanuoko ketsepie sünu shü rie.

¹³Süsie va kenieu va, Josef-e puo dzürieko bu puo silie, tsiu Faro bu Josef kinumiako silieta.

¹⁴Süsie Josef-e puo puo Jakob mu puose puoyieko pete kesa mia hiethenie-epengou bu Ijipt nu kertanu pushü.

¹⁵Süla Jakob-e Ijipt nu tsuta. Sidi puo mu u puotsanuoko sünu nu siata hu,

¹⁶mu uko mo pie Shekem nu vo Abraham-e Hamor nuonuoko ki nu raka pie khrükelie mekhruu nunu khruwa.

¹⁷“Sirei Ukepenuopfü thiedzü Abraham ki phrapiekezhü chü tseishüketuo teiu penuo vortazhü tse, u themiako Ijipt nu kra mu kruo phi sierta.

¹⁸Josef si kemo kedi kekrei puo Ijipt mho di sierta kemochie.

¹⁹Puo u yieko gei kethedo di u puonuoko pese phita di uko kemvü chüpie uko bu u nuonuo pesiawaketuo la süko kelhouwanuta.

²⁰Süteiki Mosa penuolie, puoe Ukepenuopfü mhodzünu nuo kezivi phi yopuo, sidi khrü se puo puo kinu theke,

²¹sidi puo kelhoushü tse, Faro nuopfü puo chüpielie di pie puo nuo chülieta.

²²Süla Mosae Ijiptmia mhasi pete pie pethapfülie di puo die nu mu puo mhathoko nu kuo se sierta.

²³“Siro puo cie hiediaketa ki, puo themia Israelko[33] kedipuo mhie baya shicü mehoketuo lelieta.

²⁴Süki mia puo mia bu puo zhasekecü ngu di puo themia süu yapie sie di puo kepese Ijipt-u biewa di puo zeu khepulie.

²⁵Puoe Ukepenuopfü puo se di puo themiako kelashütuoü keba uko silietuo nhiecü le sie, derei uko süu ca silie mota.

²⁶Süsienhie puoe mia kenie kegei kebaki puo unie donu theca chüwatuo üdi ‘A zenie, n nie siezedzürie ze; kiüdi nnie kegei ba ga?’ sishü.

²⁷Derei mia pese kethau Mosa khukege zo di sie, ‘Supuonie n bu hie mhokezha mu capiu chünushü ga?

²⁸No n du Ijipt-u dukhrikewa tuoi a rei dukhriwa nyü me?’ sita.

²⁹Mosa die süu sishü di ta vo Mediamia kijü nu lhou tuota, mu sünu nu puo nuo kenie rei lhoulie.

³⁰“Si tuo di cie hiedia sie Sinai kijüthou rayhau nu ronyho tu keba miü nunu teigeidieliemia puo puo pengushü.

³¹Mosa süu ngu di puo ngota, sidi puo süu mehotuoü penuo phi tse:

³²‘A n puonuoko Kepenuopfü, Abraham, Isak mu Jakob Kepenuopfü’ idi kepu silie. Süki Mosa pekhrukhru di süu meho michieta.

³³Süki Niepuu sie puo ki, ‘N phikou rhuowalie, n ketha chüu mesa zocü la.

³⁴A themiako Ijipt nu kemezhie keba ngu, mu uko meheimelokecü pfhe si bate, süla a uko shüphrashüketuo la vorwe. Tsie vorlie, a n ketsepie Ijipt nu shütuo’ sita.

³⁵“Süu Mosa mia puo melie di puo üse, ‘Supuonie n bu hie mho kezha mu capi chünushü ga?’ isiketau, Ukepenuopfü ronyho tu kebau nunu puo pengushü di teigeidieliemia geinu puo bu themiako kekhaketuo mu kelashüketuo la ketsekeshüu zo.

³⁶Puo Ijipt nunu mu Kemerie Dzükezha nu mu cie hiedia rayha nu ketuo ki u ngo mhatho mu zasiko chü di themiako ze parshü.

³⁷Mosa haue Israelko ki, ‘Ukepenuopfüe a se sierkeshü mhie puo nie themiako[34] donu nu siedzekesimia puo se siershütuo’ idi pukeshüu zo.

³⁸Rayha nu Israelko kehouu mu Sinai kijüthou geinu mha pukeshü teigeidielieu zeketuou sü puo zo; mu khapie u tsüshüketuo la puo Ukepenuopfü ki nu kerheidie ngukelieu zo.

³⁹Derei u puotsanuoko puo die ze mvüte; uko puo khukege zowa di la Ijipt nu vota nyü sie zo,

⁴⁰sidi sie Aron ki, ‘Hie chathaketuo la terhuo huo chüshücie; Ijipt nunu hie ze parkecü Mosau kedipuo chüte shi hie si mote’ sita.

⁴¹Süki uko thudo nuo puo chülie di ruosuo chüpie süu tsü, mu uko thuo chükelie süu la u neipie mhapuo chü.

⁴²Derei Ukepenuopfü uko ki nu rüreita di uko pie uko bu teigei ketuo krodi neiüko rüsuoketuo chüwata, süko dze siedzekesiko leshüda nu thupiekezhü: ‘He-i Israel kinuko, nieko cie hiedia rayha nu ketuo ki perinuo dukhri mu pie ruosuo chükecü se a tsü me?

⁴³Mo zo; nieko Molok rüsuo pfhekiu, mu nie themvü rhuou Refan, nieko rüsuoketuo la chükelie miarhiko toupfütuo; mu süla a nieko whuopie Babilon tsewatuo.

⁴⁴“U puotsanuoko rayha nu ketuo ki zhapu pfhekiu rei se tuo zo, Ukepenuopfüe puo rhi thapie Mosa kieshü di chükelieu.

⁴⁵U puotsanuokoe uko puotsanuoko ki nu pfheki süu ngulie di Joshua ze vor di uko mhodzü hanu lhou ketuo seyieko Ukepenuopfü thuo whuowa di uko bu pevielielie vor. Mu süu David teiki ketuo zo,

⁴⁶süu Ukepenuopfü khriepfülie mu puo Jakob Kepenuopfü bu baketuo la thechü puo cha.

⁴⁷Derei puo la ki chükeshü sü Solomon zo.

⁴⁸Sirei siedzekesiko keputuoi, Kerükrietho Kepenuopfü u themia thuo chükelie kiko nu baya mo,

⁴⁹‘Tei sü a kediba, mu kijü sü a phiba zo. Nieko kimhiecü ki puo chüpie a tsütieya ga? Niepuu siya, morei a bu rüleiketuo chüu kirapuo ba ga?

⁵⁰A dzie thuo mha hako pete chüshü mo me?

⁵¹“Harie kepotsükecü themiako, umelou mu unyie zhürekemo, nieko rei nie puotsanuoko mhiei Kemesa Ruopfü petsou seiya.

⁵²Nieko puotsanuoko donu siedzekesimia pechüpenyü kemo huo sier me? Uko thiedzü kemiatho lietho-u vorketuo dze pukeshü Ukepenuopfü dieliemiako dukhri, mu tsie nieko puo sewa mu dukhriwate.

⁵³Nieko teigeidieliemia bu keyiekeshü zho-u ngukelieko zo; siürei nieko süu dieze chü kemo!” idi pushü.

⁵⁴Mha hako sikeshü ki ukoe sie, Stefan gei u nou rüpe se di u hu thegipie bata.

⁵⁵Derei puo Kemesa Ruopfü bu puo tshupfü di teigei meho terü thata, süki Ukepenuopfü zayie mu Jisu puo zatsa ketha ngu.

⁵⁶Sidi puo sie, “Harie, a tei kokeshü mu Themia Nuou Ukepenuopfü zatsa ketha ngu bate!” sishü.

⁵⁷Sitse uko shie kemerie chü mu u dzie pie u nyie mekalie di keze thu zo vo puo vapielie.

⁵⁸Sidi puo merhashü ze ca sie pra di ketsie pie puo va; mu puo kepejoko u pfhe lhepie Saul ükecü khriesamia puo phi nu piezhü.

⁵⁹Uko ketsie pie puo va thaluocü nu puo kechachü di, “Niepuu Jisu, a ruopfü zeliecie” ishü.

⁶⁰Süsie puo khoutoupfü di shie puo rhiechü di, “Niepuu, no kejo hau pie uko tsü gei shü hiecie!” sishü. Puo die hau pushü di siata[35] .