Read Angami Naga Mhakechüko 8 Bible Online

Mhakechüko 8 - Angami Naga bible

Mhakechüko 8

¹Mu Saul rei uko puo dukhrikewa puo medo zo. Sünhie yawinu, Jerusalem nu kehouu pechü secü sedeta, mu Apostelko zo kemosie kekreiko pete ta cüre Judia mu Samariamia kijü khieko nu vota.

²Miathomia huo Stefan pie vo khruwa mu puo krükra rei phi.

³Derei Saul we kehouu bie pejüwaketuo la thehie chüta; puo kiü nu le di kepelemiako thenu rei thepfu rei tepie kedieki nu shüta.

⁴Kepelemia ta cüre kevoko thechü puo sie puo nu vo miu kehoura vo rei dieu pu pesi vota.

⁵Filip-e Samaria nadiu nu ke Khrista dze pushü.

⁶Mu sünu themiako u terü chü Filip die rünyülie mu puoe zasi chükeshüko rei ngu,

⁷kekreilamonyü kesuo ruopfüko shie kemerie chü di mia kekra geinu parta, mu lasiamia tsiu phiyhomia kekra shürholieketa la.

⁸Süla nadi sünu u nei phita.

⁹Siro nadi sünu Simon ükecü mia puo baya, puo themou la dopuo Samariamiako bu u ngo phi mu puo thuo puo üse themia kemeyie puo ücü leya.

¹⁰Mu uko pete, kecü nu vo kezhau ketso puo die rünyü terü di sie, “Themia hauha Ukepenuopfü kekuo Kezhau üyakezhau” sita.

¹¹Mu ukoe puo die ze terüya kekreilamonyü puotei kekra puo themouko pie uko bu u ngo phi tuoketa la.

¹²Derei uko Filip kepetha die, Ukepenuopfü kedidze dieliekeviu mu Jisu Khrista zau pelelie, sidi thenu rei thepfu rei dzülupfülie.

¹³Süki Simon rei pelelieta. Sidi dzülupfülieta tse vor Filip khieki bata mu ungomhatho kezha mu zasiko chükelie ngu di puo ngopfü bata.

¹⁴Siro Jerusalem nu keba apostelko Samaria nu kebako rei Ukepenuopfü dieu lielieketa dze silie tse, uko Pitor mu Johan nie ketsepie uko kishü.

¹⁵Unie tsu di uko bu Kemesa Ruopfü ngulieketuo la kecha chüshü.

¹⁶(Kekreilamonyü süketso zowe Kemesa Ruopfüu uko mia puo gei rei vorlie moluo; uko Niepuu Jisu za nu dzülupfükelie zoluo).

¹⁷Sitse Pitor mu Johan unie u dzie pie u geishü, sitse uko Kemesa Ruopfü ngulie.

¹⁸Siro Simon-e Pitor mu Johan unie u dzie pie uko geikeshü ki, süko Ruopfüu ngulieketa ngushü tse, puo raka pie Pitor mu Johan unie tsü,

¹⁹di sie, “Kekuo hau pie a rei tsücie, sidi a bu rei a dzie yhapie mia geikeshü ki mia bu Kemesa Ruopfü ngulieketuo la” sita.

²⁰Derei Pitor puo ki, “N shükeiraka ze keka nu votacie, kekreilamonyü no n shükeiraka se Ukepenuopfü mhaphruo khrülieketuo lekecü la!

²¹No mha hau nu n za morei n ya puorei ba mo, kekreilamonyü n noue Ukepenuopfü mhodzü puotou ba mo.

²²Süla n nou kerüzhü hau nunu thenoukedilie, mu hakemhie keleko vapie n tsülieketuo la Niepuu ki chaliecie.

²³Kekreilamonyü kepfhü n nou keba mu kelhiekecü roko tuokecü a ngu ba” sita.

²⁴Sitse Simon sie, “Niepuu ki a la chashücie, sidi nnie kepu mha kesuo hako puo burei a gei vor moliecie” sita.

²⁵Sidi Pitor mu Johan unie Niepuu dieu zhapu chü mu pushükewa sie, unie Jerusalem nu la vortatuoükezhü ki Samaria rüna kekra nu dieliekeviu pie pethashülie.

²⁶Süsie Niepuu dieliemia puo Filip ki, “Sielie di tuo pekhrotsa Jerusalem nunu Gaza nu kevo chau ze volie” si. (Süu rayha cha zo).

²⁷Süla puo sie di tuo ke. Süki Ethiopia iunokmia puo, Ethiopia nu kedipfü Kandase khro kinyi pete seyakezha kezha phimia puo ba. Ru puoe rüsuotuoü di Jerusalem nu vo,

²⁸di kinu la vortazhü; puo gura gari gei tuo di Isaya siedzekesiu, leshü phrü tuo.

²⁹Sitse Ruopfüu Filip ki, “Gura gari gei pfülie di puo ze balie” sita.

³⁰Süla Filip ta süu ki phi ru puo Isaya siedzekesi leshüu phrüketuo silie. Sitse puo sie, “No leshü phrüketuo ca si tuo mo?” sishü.

³¹Puo sie, “Huomia puoca vatshapie a kieshü kemosie a kidi silietuo ga?” sita. Sitse puo Filip bu pfür puo gariu gei puo ze balienuta.

³²Siro puo Ketholeshü phrüketuo die ro hau: “Tekuo dukhrituoü ze kevo tuoi puo ze vo; siro tekuo nuonuo puomie kebeu mhodzü kemekrie bakezha tuoi, sütuoi puo puo tie tiegashü chie mo.

³³Puo zhase di thecau chüpie puo tsü mote. Suopuonie puo seyieko dze pu kekralie ta? Kekreilamonyü kijü hanu nu puo kelhou chü sete.”

³⁴Sitse iunok-u sie Filip ki, “Siedzekesiu supuo dze pu ba shi pupie a kiecie, puo thuo puo dze mo kekreimia huo dze pu ga?” idi ketso.

³⁵Sitse Filip puo ki kethodie hau nunu sede di Jisu dze dieliekeviu pie puo ki pushü.

³⁶Sidi unie keze cha nu vozhü ru vo thechü puo nu dzü keba ngulie, sitse iunok-u sie “Haki dzü ba. A dzülupfülieketuo chakha huo ba me?” si.

³⁷(Filip sie puo ki, “No n nou pete se peleta ro dzülupfülie vi zo” ishü. Sitse puo sie, “A Jisu Khristae Ukepenuopfü Nuou zokecü pelete” sita.)

³⁸Sitse kezhau guragariu bu thalienushü, sidi Filip mu iunok unie keze dzü nu lelie sidi Filip bu puo dzülu khashülie.

³⁹Süsie unie dzü nunu parlie tse, Niepuu Ruopfüu Filip ze tuota. Sidi kezhau bu puo ngu sa mota, derei puo nei phalie kelho chü di puo chau nu vota.

⁴⁰Mu Filip we vo Azota nunu mia bu puo ngulie, sünu nu rüna neiüko nu vo di dieliekeviu pupie mia kie zo vo Kaisaria tso.