Read Angami Naga Mhakechüko 9 Bible Online

Mhakechüko 9 - Angami Naga bible

Mhakechüko 9

¹Sükisü Saul-e thete dieu se mu Niepuu siedziko dukhrituoü khuboupfü di zievo kezhau ki vo,

²di puo bu Damaska nu sinagogko nu voketuo la zhapu leshü chalie, sidi puoe kehoupuorei Chau zeyakezha thenu rei thepfu rei ngukelieko teze Jerusalem nu votuoü tuo.

³Sidi puo tuo Damaska penuo vozhü tse, vapuochü teigeinu kezie puo tsur puo khie lutsahatsa va ziekruoita.

⁴Sitse puo te kijü tsuta mu mhapfhe puo, “Saul, Saul, no kiüdi a pechüpenyüya ga?” si.

⁵Sitse puo sie, “Niepuu, no supuo ga?” sita. Sitse puo die kela di, “A Jisu, no puo pechüpenyüyakezhau.

⁶Derei no sieliecie, sidi tuo nadiu nu lelie, süu nu n bu kedipuo chü morosuo shicü pushütuo” sita.

⁷Süki puo ze rüveketuoko mhapfheu we si zo derei miapuorei ngukemo la thopfü thata.

⁸Saul kijü nu sielie di mhirhoshü, derei mhapuorei ngu mota; süla uko puo dzie teshülie di puo ze Damaska nu leta.

⁹Sidi puo zha se mhapuorei ngu mo mu mhacümhakrie rei mo bata.

¹⁰Süki puo za Anania ükecü pethakeliemia puo Damaska nu ba. Niepuu ziemho geinu puo ki, “Anania” si. Puo sie, “Niepuu, a haki bawe” sishü.

¹¹Süki Niepuu puo ki, “Sieliecie, sidi tuo cha Kemezhüu üyakezha nu volie mu vo Juda kinu keba Saul ükecü Tarsmia puo ketsocie. Puo tsie kecha chü bate,

¹²mu puo ziemho geinu Anania ükecümia puo vor puo bu mhangulieketuo la puo dzie yhapie puo geikeshü ngu bate” sita.

¹³Derei Anania sie, “Niepuu, mia kekra themia hau dze mu puo Jerusalem nu n themia kemesako gei kemeriekecü mhatho chükeshü dzeko pete a ki pute,

¹⁴siro puo haunu zorei zievo kezhako ki nu Damaska nu keba n rüsuoyakezhako telietuoü kekuo chaliete” sishü.

¹⁵Derei Niepuu puo ki, “Tuoshülie, kekreilamonyü a puo bu Judakemoko mu kediko tsiu Israelko ki a zau se pushüketuo la puo kedaliete;

¹⁶a a thuo puo bu a za la kemezhie morokesuo peteko thashü puo kietuo” sita.

¹⁷Süla Anania sie di tuo Saul keba kiu nu vo di puo dzie nie yhapie puo geishü di sie, “Siezeu Saul, Niepu Jisu no cha nu vorkezhü ki n pengukeshüu thuo n bu mha ngu lalieketuo mu Kemesa Ruopfü bu n tshulieketuo la a ketseshüwe” sishü.

¹⁸Mu sishü tse mezemo puo mhi geinu mha lhe mhiekecü huo tetsuta di puo mha ngu lalieta. Sitse puo sielie di dzülupfülie,

¹⁹süsie puo mha huo cülie di metei lalie. Süsie puo pethakelieko ze di zha huo Damaska nu bata,

²⁰Sidi puo kenourhei sinagog nu vo di Jisu dze pu di sie, “Puo Ukepenuopfü Nuou zo” ibata.

²¹Siro puo die kesiko pete u ngo di, “Puo Jerusalem nu theza hau kieyakezha kheko pekatuoyakezhau mo me? Puo thechü hau nu rei süu la themiako telie di ze zievo kezhako ki voketuo la kevor-u zo mo me?” sita.

²²Derei Saul kepetha dieu kuo kechü sa di Jisue Khrista zo ükecü thashü di Damaska nu kelhou Judako ti pejüwa.

²³Siro zha huo sie Judako kedova di Saul dukhriwaketuo rhü bata,

²⁴derei Saul uko mharhü süu silie. Uko teizeiteiso kharuko nu puo cha dze bata;

²⁵derei khuzhü puo puo siedziko puo pie mekho puo nu shülie di dahou kecie puo nunu puo petepie dahou sie shüwa.

²⁶Sidi puo Jerusalem nu vorlie tse, puo pethakelieko ze kepekrolie nyü sie; derei uko puo üse pethakeliemia ücü pele mo di uko pete puo preita.

²⁷Sirei Barnaba puo ze apostelko ki vo di, uko ki puo kimhie di chala nu Niepuu ngushi mu Niepuu puo rüchükecü, mu puo thepfu se di Jisu zau pie Damaska nu mia petha shicü dze pushü.

²⁸Süla puo uko ze Jerusalem nu kho mu ke di Niepuu za nu thepfu se di mia petha tuota.

²⁹Puo Grik die puyakezha Judako ze kerüchü mu keprüli, derei uko puo dukhriwatuoü sieta.

³⁰Süla kepelemiako[36] hau silie tse, uko puo ze Kaisaria nu vo di puo ketsepie Tars nu shüwata.

³¹Süteiki Judia, Galil mu Samaria nu kehouu bu mene mu meteisielie. Siro Niepuu khrü prei di lhou mu Kemesa Ruopfü bu u chü peluo tsiu tsüphrü kra miemielie.

³²Pitor rüve lukihaki kepeleko donu vo,[37] mu puo Lida nu keba kemesako kirei vor.

³³Sünu Aenia ükecü lasiamia puo, cie thetha puo zhü nu zhüketamia puo ze keselie.

³⁴Sitse Pitor sie puo ki “Aenia, Jisu Khrista n chü keshürhoshütuoüzhie, sielie di n zhü tshüwalie” sishü. Sitse puo mhai sielie.

³⁵Mu Lida mu Sharon nu pete hau ngu di rürei Niepuu kitsa vorta.

³⁶Siro Jopa nu Tabitha ükecü kepelemiapfü puo baya, Grik die nu puo za Dorka.[38] Süpfü mha kevi kechü mu methuo di mhapie miaketsü nu chüsechü.

³⁷Si ba ru puo mhachülie di siata, sitse uko puo mo-u khrüwa di pie kibou peso-u gei zhü.

³⁸Lidae Jopa kepenuoki ba, mu kepelemiako Pitor sünu keba sishü di uko mia kenie ketsepie puo kie bei di, “No rükri hieko ki vor zocie” ishü.

³⁹Süla Pitor sielie di sünie ze tuota; mu puo vor tsolie mu uko puo ze kibou peso-u gei sielie. Sitse samipfüko vor puo houpfülie, di Dorka rhei keba ki boulie mu pfhemenei mu boulie chükeshüko chüpie puo pekie di kra ba.

⁴⁰Süla Pitor uko pete bu chazou prata, mu puo khoutoulie di kecha chüshü; süsie puo rürei vo themo-u kitsa valie di sie, “Tabitha, sieliecie” sishü. Sitse puo mhirhoshü di Pitor ngulie tse, puo sie balieta.

⁴¹Sitse puo hapfü mengupie puo bu siethalie, süsie puo kepelemiako pete mu samipfüko rei kie lashü di puo chü perheilieketa se uko pekieshü.

⁴²Mu thedze hau pu kezapie Jopa nu mia pete ki vota mu themia kekra Niepuu peleta.

⁴³Süsie Pitor telhe Jopa nu Simon chüzhü chüyakezhau ze ba.