Read Angami Naga Rommiako 1 Bible Online

Rommiako 1 - Angami Naga bible

Rommiako 1

¹Paul, Jisu Khrista kituou,[1] apostel chünu di kielie, Ukepenuopfü dieliekeviu la kelakreikelieu,

²süusü thiedzütho puoe puo siedzekesiko ki pupiekezhü kemesa ketholeshüko nu thupie ketuo,

³dieliekevi süu puo Nuou dze, puo chü puo phou tsatie lesie ro David yie geinu lhou vor

⁴mu ruopfü kitsa kemesa lesie ro kekuo geinu Ukepenuopfü Nuou zo ükecü kesia nunu rheilasiekelie geinu thashü, u Niepuu Jisu Khrista

⁵geinu hie ngukemezhie nu apostel chükelie zo; sidi puo za nunu Judakemomia seyie neiüko ze vor kepele diezeu nu shülieketuo la zo,

⁶süusü nie, Jisu Khrista vie chüketako rei sa zo,

⁷Thupie Rom nu keba Ukepenuopfü khriekepfü, kemesamia chütuoü kielieketa pete ki shüya: Ukepenuopfü u Puou mu Niepuu Jisu Khrista ngukemezhie mu noune bu nie gei bakelieu chücie.

⁸Therieu, a nie pete la Jisu Khrista nunu Ukepenuopfü tshe baya zo, kekreilamonyü kijü pete nu nieko kepele dze si voketa la.

⁹Siro a a nou se puo Nuou dze dieliekeviu zhapu chü di lietho chüyakezhau, mu a a kechako nu nieko rükra sei bayakecü Ukepenuopfü thuo a zhapu ba zo,

¹⁰Ukepenuopfü medo üro tsiewe a bu nieko ki volie kevi chüshüketuo merü ba.

¹¹Kekreilamonyü a vor nieko ze kengushü di ruopfü theja huo rei se kezashü mu nieko chü kemetei sashü nyü phi bayakezha la,

¹²u, süu geinu nieko rei mu a rei idi úko huoniehuo kepele geinu huoniehuo chü kethepfu salieketuo la.

¹³Siro a üpfünuoko mu siezedzürieko[2], Judakemoko donu tuoi nieko donu rei a mhatho si huo ngulie kenyü la, a tsiemelie nieko ki vor nyü seyakecü (sirei tsie ketso vorlie mo ba zo) a nie bu si ba nyüya.

¹⁴Ae Grikmia mu kemomia rei, mhakesimia rei mu kemomia rei pete pupfü tuote.

¹⁵Süla a diekeviu pie nie Rom nu kebako kirei pushü nyü phi tuo zo.

¹⁶A dieliekeviu la we mengaya mo; süusü pelekelieko pete kelalieketuo la Ukepenuopfü kekuou zo, Judako ki shü rie mu Grikmia la rei zo.

¹⁷Kekreilamonyü süla kepele geinu Ukepenuopfü miatho-u thashüya, süu kepele geinu vor; süu dze hakemhie thupiezhü, “Kemiathomia kepele geinu rheilie zotuo” si.[3]

¹⁸Mhakesuo chü di ketho-u chakha chükewako la teigei nu Ukepenuopfü noupfhüu miatho kemo mu mhakesuo kechü pete petsoukecü thashüte.

¹⁹Ukepenuopfü dze silie keviko uko bu si ba zo, kekreilamonyü Ukepenuopfü thuo thapie uko kiewate.

²⁰Kijü chükelie yawinu puo kekuo kechachie keba mu puo zho puo rüliko, ngu mo zoürei, puo mhathoko geinu si mu nguliete. Süla uko mha puorei kerüpulieketuo cha ba mo zo;

²¹Uko Ukepenuopfü si ba zorei puo üse Ukepenuopfü üdi puo rhu mo, mu kethezie rei pie puo tsü mo, sikecüumonyü u nouleko kemethuo mu u nouko zeibouite.

²²Ukoe u thuo mhasi üdi leketa geinu kenyamia chüte;

²³mu kechachie tuoyakezha Ukepenuopfü zayieu pie kaüjütaketuo themia, morei pera, morei khunuo phidiapfü morei tinyhüko miarhiko ze keliwate.

²⁴Süla Ukepenuopfü uko bu kerüzhü nu uneiunyü chü nyü ro chücie idi uko khapie mesa kemo nu shüwate, sidi uko bu u thuo u donu u phou khriekemo chüwate.

²⁵Kekreilamonyü uko Ukepenuopfü kedietho pie ketijü chüwa di mha Chükeshüu, kechachie thejakepfüu, monyü chükelieko rüsuorüsu mu lie chü tuoketa la! Amen.

²⁶Hauha la Ukepenuopfüe uko khapie chüüphou menguko nushüwate. Sidi thenuko rei lhenuzho-u mo di u thuo keze kethenga mhathoko chüta,

²⁷mu sümhiei thepfuko rei lhenu thenumia zekecü zho-u monyü menguko se huoniehuo gei shü di thepfuko thuo keze thenga mhathoko chüketa nu uko kekrükecü siazha ngu kezhüu ngulie.

²⁸Siro ukoe Ukepenuopfü pie uko nou shü nyü moketa tuoi, Ukepenuopfü rei uko khawa di u bu chü zhükemoko chü tsiu thenou rüporüvükecü nu shüwate.

²⁹Uko kerüzhü noule neiü se u tshupfü tuote, mhakesuo, kemehou, kethakecü, mia ngu u rokecü tshukepfü, mia kedukhri, kegeikecü, mia sekedakecü, kedovikecü, sieükechü,

³⁰kethakemele, Ukepenuopfü ngukemvü, mia rhukemo, kemiakokecü, kemelhakecü, thedo kesuo, u krünuo die zekemo,

³¹Mha lelieya kemo, u die se balieya kemo, mia gei tseiüvi kemo mu u zho rhu sekecü.

³²Ukepenuopfü zho nu hakemhie kechümia sia zhücü ukoe si ba zo, sirei ukoe mha hakemhieko chükecü zomonyü sükemhie chüyakezha kekreimia rei üse puotou üya.