Read Angami Naga Rommiako 10 Bible Online

Rommiako 10 - Angami Naga bible

Rommiako 10

¹A üpfünuoko mu siezedzürieko[16], a a melou nu kemenguu mu Ukepenuopfü ki a kechau sü themia hako bu rei kelakelie ngulieketuou zo.

²Ukoe Ukepenuopfü kitsa u rhie chü phikezhü a zhapu chülie vi zo, derei süue mhasi ketho-u nunu mo.

³Kekreilamonyü ukoe Ukepenuopfü ki nu kevor kemiatho-u si mo, di u thuo u kemiatho-u bu metei balietuo üdi Ukepenuopfü kemiatho khrükhro lerlie mo.

⁴Kekreilamonyü themia kehoupuorei pelekelieu bu miatholieketuo la Khrista geinu thezho-u bu puo thela chüte.

⁵Mosa rei thezho nunu miathokelie dze pu di “Kehoupuorei süko chüyakezhau rheilie zotuo” sishü.

⁶Derei kepele geinu kemiatho paryakezhaue pucü, “N nou nu, ‘Supuo teigei kho ta?’ ” (Puoca Khrista bu kerketuo.)

⁷“Morei ‘Supuo kijü khro tsur ta?’ (Puoca kesia nunu Khrista ze parketuo) idi le hie” iya.

⁸Derei süu kedipuo puya ga? “Dieu n penuo ba zo, n tie nu mu n nou ba zo” si. (Puoca, we se puyakezha kepele dieu zo);

⁹kekreilamonyü no Jisu üse Niepuu zo ükecü n tie nunu puphralie mu kesiako donu nu Ukepenuopfü puo chü perheilietacü n nou nu pele liro, n kelalietuo.

¹⁰Kekreilamonyü miatholieketuo la themia u nou se pelelieya, mu kelakelie ngulieketuo la u tie se phralieya.

¹¹Ketholeshü pukecü, “Kehoupuorei puo pelekelieu bu thenga chütalie lho zo” si.

¹²Kekreilamonyü Judamia rei Grikmia rei kekreilie lho; Niepuu sü themia pete mho Niepuu zo mu puoe puo ki chayakezha pete gei mephruomevuo phiya.

¹³Kekreilamonyü, “Themia kehoupuorei, Niepuu za kiekelieu kelalie zotuo.”

¹⁴Derei ukoe pele mo liro kikidi puo kielie ta? Mu uko kimhie di puo dze sikemo puo pelelie ta? Siro mia puo dze pushü mo ro kikidi uko puo silie ta?

¹⁵Mu themia ketseshü mo ro kimhie di puo dze pushülie vi ta? Süko dze, “Dieliekevi se kevorko phi kide zivi shi!” idi thupiezhü.

¹⁶Derei mia pete dieliekeviu rünyülie mo; kekreilamonyü Isaya pucü, “Niepuu, supuonie hieko dielieu pelelie ga?” si.

¹⁷Süla kerünyü geinu kepeleu parya, mu rünyükelie süusü Khrista dieu nunu zo.

¹⁸Derei ae uko süu si mo zo me? idi ketsoya. Uko süu si tou zo; kekreilamonyü “Uko pfhe kijü pete nu si vote, mu uko dieko kijü vala ketso nu rei vote” isipiezhü zo.

¹⁹Siro Israel süu caüla silie mote? Therie nu Mosa rei pucü, “A seyie ketho mo zocü kro puo la, nieko bu nie rokelie chüshütuo: mu kenya seyie puo la nieko bu nie nou meyietuo.”

²⁰Siro Isaya thepfu se di hakemhie pu sakecü, “A pfhütuo kemo kro puo a nguliete; a a thuo a khapie a ki cha kemo kro puo pengushüte” si.

²¹Derei puo Israel ki, “Mia die zekemo mu mha kepetsou themiako ki we teisozha pete a bou yhapie kie tha zo” si.