Read Angami Naga Rommiako 11 Bible Online

Rommiako 11 - Angami Naga bible

Rommiako 11

¹Sitse a sie, Ukepenuopfü puo themiako meliewate me? Si mo zo! A rei Abraham yie Benjamin seyiemia geinu lhou kesier Israelmia ze.

²Ukepenuopfü thiedzü puo themia siketuoko khawa mo. Nieko ketholeshüe Elija dze kedipuo pu shi si mo me? Kimhie di Israel kepetsou la Ukepenuopfü ki cha shicü.

³“Niepuu, uko n siedzekesiko dukhriwa, uko n ruosuobako bie pesuo phrewa; a rübei lhiekeshü ze, mu uko a kerheiro pfhü tuote” si die.

⁴Derei Ukepenuopfü kedipuo se puo die kelashü ga? “Khoutou tsu Baal rüsuo kemo a themia nyie thenie baluo” si die.

⁵Süsü tuoi tsierei ngukemezhieu la kedakelie themia kro puo pesha baluo.

⁶Derei süusü ngukemezhie lanu zo üliro, mhatho la mote, sikemosie ngukemezhie üse ngukemezhie ülie lhote.

⁷Siro ki ta? Israel-e pfhüketuou ngulie mote. Sirei kedakelieko süu nguliete, derei keshako nou chü perewate,

⁸süu dze thupie kezhü, “Ukepenuopfü uko nou chü kerüvowate, thie ketso rei uko mhi se ngulie kelho, mu uko nyie se rünyülie kelho chü tuote.”

⁹Mu David rei pucü: “Uko mizhü bu uko la kebie mu ciephrie chütalie, uko phi kemesü mu uko pechüpenyükewa puo chülie;

¹⁰Uko mhi chü pezeipie mhangulie kelho chüwalie, mu uko chie bu chiethou sei tuotacie” si.

¹¹Siro a putuo, uko bu krütaketuo la uko phi perheshü me? Mo zo! Derei uko krüketa geinu kelakelie se vor Judakemoko tsü, sidi Israel bu puo rolieketuo la.

¹²Uko krükeshü[17] la kijüu chü penyilie, mu uko thalie moketa geinu Judakemoko chü penyilie üro, uko sakeshü we kiderei krakuolietuo shi!

¹³A tsie Judakemoko ki mha puya. A Judakemoko la apostel puo chüketuochie a mhatho-u bu zayie chü zotuo,

¹⁴süusü a themiako chüpie u rolie di uko huomia kelalietuo.

¹⁵Uko meliekewa la kijüu bu kezevilie liro, uko ze lakelie-e kesia nunu rheikelie puo zo moü me?

¹⁶Mhanuü thoulha pie ruosuo keshü za puo pie puo si kerieu üdi khakeshüu mesa üta üro za kekrei pete rei mesata zo; mu seimieu mesata üro, puo coko rei mesata zo.

¹⁷Derei puoco huo rükouketa la, no nha Oliv zokecüu biepie rükouketako chü nu pfepie phashülie di Olivbo-u mie keviu ze kerhete,

¹⁸süla puo coko gei rei kemiako hiecie. No kemiakotuoü sie liro, no puo mieu toupfü ba monyü puo mieu thuo n toupfü ba zocü rükraliecie.

¹⁹Siro no sie, “Puoco huo rükoukeshüe a bu süko pfelieketuo la zo” isi sietuo.

²⁰Süu ketho zo. Sükoe pele kemo la rükoute, derei no n kepele la thakelie zo. Süla kemiako hieü michiesieiliecie.

²¹Kekreilamonyü Ukepenuopfüe lhenu the kepar coko thuo rei biewa khrie mo ro, no we lhieshülie lho zo.

²²Siro Ukepenuopfü mia ngukemezhie mu puo die kere rei leshücie, tetsuketako gei puo die re, derei nie puo kekhrieu nu tuolie liro, puo nieko khrietuo; mo liro puo nieko sawa zotuo.

²³Siro Israelko zorei, uko pele kemvü khawa liro, uko pie phi puo pfelietuo, kekreilamonyü uko pie phi puo pfe lalieketuo Ukepenuopfü puo kekuo ba.

²⁴Kekreilamonyü no nha Oliv co rükouketa lhenu the kepar-u mo di se vo Oliv bo ketho-u pfe kesapie phalie di pethelieta liro, puoco zokecü hako pie vo uko Oliv bo ketho-u geinu pethe laketuo we rüükuo zotuo.

²⁵A zeko; a nieko bu kemhasita molieketuo la, a nie bu mha kesou hau si nyü: Judakemoko kra lotsolie kemochie, Israelko huo u nou re tuotuo.

²⁶Sidi Israel pete kelalietuo; süu dze thupiekezhü, “Zion geinu Kelakelieu vortuo; sidi Jakob geinu kerüzhüko chüwatuo”

²⁷“A uko kephoumako chü seketa ki, a uko ze dietseidiekhokelie hauha tuo.”

²⁸Nieko la, dieliekevitsa we uko Ukepenuopfü ngumvüko zo; derei uko uko pfutsanuoko la kedakelietsa liro uko Ukepenuopfü khrieko zo;

²⁹kekreilamonyü Ukepenuopfü mha methuo pie mia ketsü mu mia kiekecü puo nou kedi lataya mo.

³⁰Thiedzü nieko Ukepenuopfü die ze motuo derei tsiewe uko puo dieze kemo la nieko puo khrie pfükelie tuoi,

³¹sütuoi nieko ngumezhiekeshüu la süko bu rei puo khrie pfülieketuo la, uko tsie puo die ze mo bate.

³²Ukepenuopfü themia pete bu mia diezekemo die chüwa, sidi pete ngumezhie ketsoshüketuo la.

³³He-i, Ukepenuopfü kinyiko mu mhasi tsiu kesikeleko sou za le? Kimhie di puo capiko pfhü mu puo zhoko le ketsolie ta!

³⁴“Kekreilamonyü supuonie Niepuu nou silie ga? Morei supuonie puo tarho ga?”

³⁵“Morei supuonie mha ngu merü di, mha methuo kha puo tsü ga?”

³⁶Kekreilamonyü puo kinu mu puo geinu mu puo lanu mha pete rei ketuo zo. Puo bu kechachie zayie chüliecie. Amen.