Read Angami Naga Rommiako 14 Bible Online

Rommiako 14 - Angami Naga bible

Rommiako 14

¹Nieko kepele kethachümia[24] zorei zeliecie, derei u kele pu keprüliketuo le hie.

²Mia huo mha kehoupuorei cülie kevi peleya, sirei kepele kethachümia ga rübei cüya.

³Süla mha kehoupuo cüyakezhamia cüyakemomia meleta hie, mu cüyakemomia rei kecümia le pejo hie; Ukepenuopfü u zelieketa la.

⁴No supuo di kekreimia kituou le pejoya ga? Uko thalie rei krüta rei u niepuu thuotie, mu uko thalietuo, kekreilamonyü Niepuu puo bu thaliekevi chüshütuo.

⁵Mia puoe teisozha kekrei puo kirei teisozha puo rhukuoya, mu kekrei puoe teisozha pete rei kemhie zo ükecü leya. Kehoupuo bu rei puo thuo puo nounu puotouu leliecie.

⁶Teisozha puo se pekreiyakezhau, süu Niepuu kerhu nunu siya. Siro kehoupuorei cüyakezhamia Niepuu kerhu nunu cüya, süu la kethezie pie Ukepenuopfü tsüyakezha la; derei cüyakemomia Niepuu kerhu nunu zo mu süu la rei Ukepenuopfü thezieyacü la.

⁷We kehoupuorei u thuo u la rhei ba mo, mu u thuo u la sia reiya mo.

⁸We rhei shierei, Niepuu la rhei baya, mu we sia shierei Niepuu la siaya; süla we rhei rei sia rei, we Niepuu vie zo.

⁹Haha la Khrista bu kesiako mu kerheiko mho Niepuu chütuoü sia di rheilaliete.

¹⁰Kiüdi no n siezeu morei n üpfü[25] pejoya ga? Morei no, kiüdi n siezeu morei n üpfü [26]thiya ga? Úko pete rei Ukepenuopfü dienyabau mhodzünu tha phre zotuocü la.

¹¹Süu dze thupiekezhü: “A rheituokezha tuoi, kehoupuorei a mhodzünu khoutou phretuo, mu pete u meü se Kepenuopfü tshe[27] phretuo” si.

¹²Süla u kehoupuorei Ukepenuopfü mhodzünu u thuo u rüli lha phreshütuo.

¹³Süla úko huoniehuo le pejo molie khe, sikecüumonyü kekreimia phi kemesü morei perheshü molieketuo leliecie.

¹⁴A Niepuu Jisu geinu mha puo si tou mu le touse tuote süu mhapuorei puo thuo zowe mesa kemo jü; derei mia puoe mha puo mesa mo üdi leta ro, süu puo la mesa mote.

¹⁵N kecüca la n siezemia bu rüzalieta ro, no kekhrie nu tuo mote. N kecüca la no mia puo Khristae puo la siakeshüu pekawa hiecie.

¹⁶No vi üdi leyakezhau mia bu thata hie.

¹⁷Kekreilamonyü Ukepenuopfü kedi-e kecükekrietsa monyü kemiatho mu kezekevi mu Kemesa Ruopfü nunu u neikecüu zo.

¹⁸Kehoupuorei hamhie di Khrista lie chüyakezhau Ukepenuopfü nei chüya mu mia rei sümia rhuya.

¹⁹Süla u kehoupuorei kezevilie mu huoniehuo chü pevilieketuo whuo zolie khe.

²⁰Kecüca la Ukepenuopfü mhatho bie pesuowa hie, mha pete rei mesa zo ketho, derei n ca la kekreimia bu krüta ro, süu kekrü.

²¹Süusü themuo cü mo, morei zu krie mo, morei kehoupuo chü rei n siezemia chakha chüwa kemo-u puotou.

²²Süla n thuo vi üdi si touketa kepele n gei baketau pie Ukepenuopfü nnie donu tuolie. Puo thuo puo le pejo mo di mu puo chükezhau puotou üleya ro thejakepfütho.

²³Derei kehoupuorei kenoudo di cü ro, süu jotaya, kekreilamonyü kepele[28] geinu cü mocü la; mha kehoupuorei kepele geinu bode chü kemo khe sü kephouma zo.[29]