Read Angami Naga Rommiako 15 Bible Online

Rommiako 15 - Angami Naga bible

Rommiako 15

¹We meteiketako, u thuo u nei u nyü chüta mo di kethachüko kho rei yalie zhü.

²We kehoupuorei u siezanuomia chü pevikelie le di sümia nei chülie khe.

³Kekreilamonyü Khrista rei puo thuo puo zhazhü pfhü mo; sikecüumonyü süu dze thupie kezhü, “Mia nie kengakecü dieko a gei pfürte” si.

⁴Siro thiedzü thupieketuo kehoupuorei se u pethaketuo la zo, sidi u bu shügeshühiekelie mu ketholeshü geinu u chükethepfulie di u siedze nyilieketuo la zo.

⁵Siro shügeshühiekelie mu kethepfu khashüyakezha Ukepenuopfü bu nieko huoniehuo nou chü kerhepie Khrista Jisu nou mhie shükelieu chüliecie,

⁶süu geinu nieko keze puo chü mu kedierhe di u Niepu Jisu Khristanuo puo Ukepenuopfü tshelietuo.

⁷Ukepenuopfü bu zayiechülieketuo la Khrista nieko zekelie tuoi nieko rei huoniehuo zeliecie.

⁸Siro a nieko ki puya, Khristae Ukepenuopfü kedietho-u thashütuoü zhürekelieko la lhou vor di u pfutsanuoko ki phrapiekezhü chü tseishü,

⁹di Judakemoko bu rei puo u ngumezhiekeshü nunu Ukepenuopfü tshelieketuo la. Süu thupiekezhü: “Süla Judakemoko donu a n tshetuo, mu keli n za tshetuo.”

¹⁰Mu puo pu sakecü, “He-i Judakemoko, puo themiako ze di nie neiliecie.”

¹¹Süsie rei, “Judakemoko pete, Niepuu tsheliecie, tsiu themia pete bu puo tsheliecie”

¹²Siro Isaya rei pukecü, “Jese geinu puo yie puo the partuo; puo Judakemoko mho dituoü di kesier-u; Judakemoko puo gei u kemerü batuo” si.

¹³Pelekelie la kemerü Ukepenuopfü bu kenei mu noune pie nie ketshu chücie, silie ro nie kemerü süu bu Kemesa Ruopfü kekuou geinu krakechü salieketuo la.

¹⁴Siro a üpfüko mu siezedzürieko[30] nieko mha kevi pie nie ketshu chüketuo, mhakesi neiüko se nie ketshu chükepfü, mu huoniehuo tarholie vi keba, nie gei a kethepfu nyi.

¹⁵Derei Ukepenuopfü ngukemezhie pie a ketsü la nieko kekhrokecü leshü hau nu a thepfu se di mha dze huo thupie nie ki shü ho.

¹⁶Süusü a bu Judakemoko la Khrista Jisu lie chü mu Ukepenuopfü dieliekevi zievo lietho chü di Judakemoko pie Ukepenuopfü tsü di Kemesa Ruopfü bu nieko chü kemesapie puo bu lielie kevi chülieketuo la.

¹⁷Jisu Khrista nu, a Ukepenuopfü lietho kechü la a kemholielie vite.

¹⁸Khrista a geinu chükeshü, die mu mhatho nunu Judakemoko bu dieze nu vorlieketuo la zo moro mha kekrei puorei pulie lhote.

¹⁹Zasi mu ungomhatho kekuoko tsiu Ukepenuopfü Ruopfü kekuou nunu chüshüwate, sidi a Jerusalem nu mu sükhie sümhou vo Ilirikom ketso Khrista dieliekeviu se mia petha ketsoshü.

²⁰Sidi a kemenguu sü Khrista za si moto zokecüra dieliekeviu pushü nyü bei tuoya, sidi kekreimia puo mvüdzepie zhüwaketa geinu sede molieketuo la,

²¹derei süu dze thupiekezhü, “Puo dze u ki pu mo zokecükoe ngutuo, mu puo dze si moto zokecükoe puocapuola silietuo.”

²²Siro tsiekenuo a nieko ki vor nyüketuou nunu a kediwakuo phi.

²³Derei tsiewe hatsatie mharapuorei kevo ba sa mote, mu teicie kekra a nieko ki vor nyü tuo,

²⁴a Spain nu kevo ki vortuo. Kekreilamonyü a rüve teiu nu a nieko ze kengushü di nieko bu a ketseshütuo, va puo puotei huo nieko ze a nei zalieketa sie.

²⁵Derei tsie zowe kemesako khruohishüketuo la a Jerusalem nu votazhie;

²⁶Makedonia mu Akaya nu kebako mha huo khapie Jerusalem nu keba kemesako donu kejüko tsütuoükecü u neite.

²⁷Uko sikecü uko neita zo, mu uko süko pu pfü tuota ketho zo; kekreilamonyü Judakemoko süko kinu ruopfü thejako ngulie liro, uko kishükinyiko se süko khruohi zhü zo.

²⁸Süla a mhatho hau chü tseiwa mu mha kengukelie pete pie uko tsükewa sie,[31] a nieko ki vor di Spain nu votuo;

²⁹mu a nieko ki kevor ki a Khrista geinu ngukelie ketshukelhuochükecü thejako[32] se vortuo.

³⁰Siro a zenuoko, u Niepuu Jisu Khrista lanu mu Ruopfüu kinu kepar kekhrieu la, a ze di nie teitsochü Ukepenuopfü ki cha banuya,

³¹süusü kekreilamonyü pelekemo Judia nu kebako kinu a kelalieketatuo la mu a Jerusalem nu kebako khruohituoü[33] tuokecü kemesako bu u neilieketuo la,

³²sidi a bu Ukepenuopfü medo nunu a nei di vor nieko tsolie di nieko ze rüleilieketuo la.

³³Ukepenuopfü nouneu bu nieko pete zebakelieu chüliecie. Amen.