Read Angami Naga Rommiako 4 Bible Online

Rommiako 4 - Angami Naga bible

Rommiako 4

¹Siro u puotsa Abraham-e chüüphou kitsa nu krakelie dze kedipuo pulie ta?

²Kekreilamonyü Abraham-e puo mhathoko la miatholie üliro, puo kemelhalie kevi ba, derei Ukepenuopfü mhodzünu we silie kenjü.

³Siro ketholeshüe kedipuo pu ga? “Abraham-e Ukepenuopfü pele, mu süu pie puo miatho chülie”

⁴Siro mhakechümia puo puo zha ngulie rei puo zhakhrau üse methuo ngulie üya mo, derei süu krakelie puo.

⁵Sirei mhatho la mo zo, derei miathokemomia chü kemiatholieyakezhau pelekecü, puo kepele hau la puo üse miatho üya.

⁶Süla u mhathoko la mo di Ukepenuopfü thuo u chü kemiatholiekezhamia thejakepfü dze David rei hamhie di pu:

⁷“U kejokemou vashü u tsüwaketamia, mu u kephoumako whekewamia thejakepfütho;

⁸Niepuue puoü kephoumiaü sa lhoketamia thejakepfütho zo.”

⁹Siro thejapfükecü hau zhükeremia rübei pu me, mo zhürekemomia rei sa pu ga? Hie kepuu ro, “Abraham kepele la puoü miatho ülie.”

¹⁰Kimhie di puoü silie ga? Puo zhürekelie mhodzü mo zhürekelie sienu ga? Süu puo zhürekelie sienu mo, derei zhürekemo nu zo.

¹¹Puoe zhürekemo nu kepele la miathokelie zasi vükewa ngulie. Sidi puo bu zhürekemo nu rei pelekelie khe puotsa chülie, mu ukoe pelekelie la Ukepenuopfü uko chü kemiatholie.

¹²Puoe zhürekelie mia pete puotsau rei zo, süu zhürekelie la mo, derei u rei kepele kelhou nu Abraham puo zhürekelie mhodzü kelhou mhie lhoukelie geinu zo.

¹³Siro Abraham mu puo se puo yieko bu kijüu pie u vie chüketuo phrakeshüu thezho-u la monyü pelelie di miathokelieu la zo.

¹⁴Mhanuü thezho chüüzeyakezhako bu theka süu lietuo üro, kepele se mhapuorei kechü jüte mu phrapiekezhüu rei kemethuote.

¹⁵Kekreilamonyü thezho-u noupfhü se vorya; derei thezho kejüra thezho kevarhuo rei ba mo.

¹⁶Süla phrapiekezhüu kepele geinu zo, mu phrapiezhüwaketau geinu methuo khapie seyie pete tsü zo, mu süusü thezho chüüzeyakezhako rübei zomonyü Abraham kepele mhie pelekezhako la rei zo, (puo u pete puotsau zo,

¹⁷süusü thupiekezhü, “A n bu seyie neiüko puotsa chütuo” si), sidi puoe peleyakezhau kesiamia chü perhei lashüyakezha mu mha tuo moto zokecüko nunu mhachü se parshülieyakecü Ukepenuopfü mhodzünu u puotsa chü.

¹⁸Siro kemerü tuo moketa kemhie ki zorei puo pele tsa zo, süla puo “Seyie neiü puotsa chütuo” ikecüu chülie, sidi, “N seyiemia bu kra phituo” idi pupiekezhü tuoi chülie.

¹⁹Siro puo chü puo mo-u phichüta mu puophi puodzie laketa kize (puo teicie krie puo penuote) morei Sara rei nuo lhoulie kevi tei keyieta zorei puo kepele rükreta mo.

²⁰Puoe Ukepenuopfü phrapie kezhüu pele kemo chüta mo di kepeleu nu metei miemie sie di thetshetherhu se Ukepenuopfü tsülie,

²¹Ukepenuopfü phrapiekezhüu chü motalie lho zo ücü pele khruta.

²²Puo kepele la[5] “Puo üse miathomia puo ülie.”

²³Siro “Puo kiekelie” die süu puo rübei la thupiezhü mo,

²⁴derei u la rei sa zo. We rei kesia nunu u Niepuu Jisu perheikelieu peleya liro, kepele la u üse miatho ülietuo,

²⁵u kephoumako la puo bu sia mu u chü kemiatholieketuo la puo perhei lalie.