Read Angami Naga Rommiako 5 Bible Online

Rommiako 5 - Angami Naga bible

Rommiako 5

¹Siro kepele geinu u chü kemiatholie di we rei u Niepu Jisu Khrista la Ukepenuopfü ze kezeviliete,

²puo geinu we ngukemezhie tha nu thakelie cha ngulie, mu Ukepenuopfü zayieu kezaketuo kemerüu se u mho chüya.

³Mu sikecü rübei zomonyü we kemezhiekecüko nu rei u neituoya, kekreilamonyü kemezhiekeshü nunu shügeshühielieya,

⁴mu shügeshühiekelie geinu u zho vilieya,

⁵mu u zho vikelie geinu kemerü nyilieya, mu kemerü hau u nou chü pesuowa lho; kekreilamonyü pie u tsükewa Kemesa Ruopfü nunu Ukepenuopfü kekhrie rupie u nou shüwaketa la.

⁶We thachü ketuo ki, Khristae puotei tou ki pelekemoko sou chü siawate.

⁷Khatho zo mo ro miapuorei kemiathomia puo sou chü sia lho, derei lakipuo huomia themia kevimia puo la sia rei michie molie vi nhie.

⁸Derei we kephoumamia chüketuo nu rei Khrista bu u phousou chü siakeshü geinu Ukepenuopfü u khriekecü tha toushüwate.

⁹Sizomonyü we tsie puo zie la u chü kemiatholietaü ro, we puo la Ukepenuopfü noupfhüu nunu u kelalietuoükecü si kemeciekuota zo.

¹⁰Mu we puo ngumvümia chüketuo ki thuo rei puo Nuou se la u bu Ukepenuopfü ze kezevilie liro, puo ze kezevikelie sie puo kelhou la u kela reilie zotuo.

¹¹Sürübei monyü we tsie puo la kezevikelie u Niepu Jisu Khrista lanu Ukepenuopfü nunu u nei rei sa bate.

¹²Siro mia puo la kephouma kijü vor, mu kephouma la kesia vor, mu themia pete phoumaketa la kesia rei themia pete gei vorta,

¹³thezho-u mhodzü kephouma kijü nu tuo, derei thezho-u bakemo ki kephouma rei si mo.

¹⁴Sirei Adam geinu vo Mosa ketso kesia themia mho di, Adam mhie monyü kephouma chükemomia gei zorei, Adam-e mia puo vortuo üketuou rhiu zocü la.

¹⁵Derei methuo pie u ketsüu we phoumakewa mhie mo. Kekreilamonyü mia puo phoumakewa la themia kekra siata liro süki rei Ukepenuopfü ki nu kepar ngukemezhieu mu mia puo süusü Jisu Khrista u ngukemezhie la methuo khakeshüu we themia kekra kelhuo chükuotuo.

¹⁶Mu methuo kha u ketsüu we mia puo phoumakewa mhie mo. Kekreilamonyü mia puo phoumakeshü geinu pejokewa vor, derei themia kekra phoumakewa la methuo khakeshüu we chü kemezhükelie se vorshü.

¹⁷Kekreilamonyü mia puo phoumakewa geinu kesia bu u mho di tuota liro, süki rei Jisu Khrista la ngukemezhie mu kemiatho methuo khapie u ketshukelhuo chükeshüu u kelhou gei di kuotatuo.

¹⁸Mia puo kephouma la mia pete pejokewa mhie, kemiathomia puo mhatho la themia pete bu mezhülie mu rheilie.

¹⁹Mia puo dieze chü mokeshü geinu mia kekra chü kephoumakewa mhie mia puo dieze chükeshü geinu mia kekra bu miatholietuo.

²⁰Derei thezho-u vorta, mu süki ze thezho kevarhuo rei kruo parte; derei kephouma krakecü ki ze ngukemezhieu rei krakuote,

²¹sidi kephouma la kesia bu diketuo tuoi, chü kemezhükelie[6] nunu ngukemezhie bu di, sidi Niepuu Jisu Khrista geinu kechachie kerhei ngulie vite.