Read Angami Naga Rommiako 7 Bible Online

Rommiako 7 - Angami Naga bible

Rommiako 7

¹Harie a üpfünuoko mu siezedzürieko[7], nieko si mo me? A thezho-u kesimia ki mha putuoükezhü la. Mia puoe rhei keba ki rübei thezho-u khrükhro tuoyakezha zo.

²Siro kiyaketapfüe puo nupfu rhei kebachie thezho-u bu puo phapfü baya; derei puo nupfu siaketa sie puo nupfu la puo phaseketuo zho-u nu ba sa mote.

³Süla puo nupfu rhei keba nu puo thepfu kekrei puo ze lhou ro, puo üse pieüpfü puo ütaya, derei puo nupfu siata ro, puo thepfu kekrei puo ze keri zorei puo thezho-u nu mezhü zo, puoe pieüpfüta mo zo.

⁴Sükemhie, a zenuoko[8], nieko rei Khrista mo-u la thezho-u kitsa siate; nie bu kekreimia puo vie chülieketuo la, süusü kesiako donu nu rheilasieketau vie chü ketuo la, sidi u bu Ukepenuopfü kitsa u si vülieketuo la.

⁵Siro we chüüphou medo ze lhouketuo ki kesia bu rüchü parlieketuo la thezho-u bu kehükeshü kephouma menguko chüüphou geinu chü vor.

⁶Derei tsiewe u phaseketuo kitsa siaketa la we thezho süu khro tuo sa mote; sidi we thukelie zho leshü keweu monyü Ruopfüu geinu kelhou kesau die chüte.

⁷Siro we kedipuo pu ta? Thezho-u üse kephouma ütuo me? Suotuo! Thezho-u kemosie, a kephoumae kicüpuo shi silie lho. Siro “No mha mehou lho” ikecü thezho-ue pushü kemosie kemehoue kikecüpuo shi silie lho.

⁸Derei kephoumae puo hievi chü di diekhakeshü zho-u la a gei mha kemehou neiüko chüshü. Thezho-u sakemosie kephouma siazhüta zo.

⁹A rei va puo thezho-u sa mo di lhou, derei diekhakeshü zho-u vor tse kephouma chü perheiwa,

¹⁰mu a bu siata, tsiu kerhei khashütuoü phrakeshü thezho-u a la we kesia se vorshü.

¹¹Kekreilamonyü kephoumae puo hievi chü di diekhakeshü-u geinu a sewa mu süu geinu a dukhriwate.

¹²Süla thezho-u we mesa zo, mu diekhakeshü zho-u mesamezhü mu vi zo.

¹³Di siro mha kevi süu kesia se a gei vorshü me? Mo zo! Süu kephouma la zo, mha kevi süu kesia se a gei vor mhachü, sidi kephouma üse phouma ülie mu diekhakeshüu nunu kephoumae suothorkecü pekieshü.

¹⁴Thezho-u ruopfüdzetsa zokecü we si ba; derei a zowe chüüzie zo, mu a zepie kephouma khrükhro shüwate[9].

¹⁵A a thuo mhathoko siya mo; kekreilamonyü a mha chü kenyüu chülieya mo, derei a ngumecüyakezhau chütaya.

¹⁶Sirei a chü nyükemo-u chüya ro, a thezho-u üse vi ücü si ba zo.

¹⁷Süla a chüyakezha süu a monyü a nou keba kephouma thuo zo.

¹⁸Kekreilamonyü a gei, süusü a chü a phou nu mha kevi puorei ba mokecü a si ba. A mha puotoukecüu mengulie vi, derei a süu chülie lhotaya.

¹⁹Kekreilamonyü a chü nyü keba mha keviu monyü, a chü nyükemo mha kesuou chütaya.

²⁰Süla a chü nyükemo-u chütaya liro, süu chüyakezhau a monyü a gei keba kephouma thuo zo.

²¹Süla a mha puo sikelieu sü a mha kevi chü nyükesie ki mha kesuou a khieki bataya.

²²Kekreilamonyü a nou zowe Ukepenuopfü zho-u a nei tuoya,

²³derei thezho kekrei puo a chü a phoutsa nu a nou keba zho-u ze keperhie di a te ze vo a chü a phou gei keba kephouma zho-u die chüwayacü ngulie.

²⁴A themia hieshiehieruo za puo ho! Supuonie kesiamo hau nunu a kelashü ta?

²⁵U Niepuu Jisu Khrista geinu Ukepenuopfü peziewe. Süla, thenoutsa we a Ukepenuopfü zho-u diemia chüte, derei a chü a phou zowe kephouma zho-u diemia chüte.