Read Angami Naga Rommiako 8 Bible Online

Rommiako 8 - Angami Naga bible

Rommiako 8

¹Süla tsiewe Jisu Khrista nu ketuoko pejokecü die jüte.

²Kekreilamonyü Khrista Jisu nu kelhou kerhei Ruopfü zho-u thuo kephouma mu kesia nunu n shüphraliete.[10]

³Chüüphou kethachü la thezho-u chülie lhoketau Ukepenuopfüe chüshüketa la: Süusü puo thuo puo nuou ketsepie puo bu kephouma chüu mevi di kephouma dzetsa la puo chüu geinu kephouma pejowate,

⁴sidi we chüüphou kitsa tuo monyü Ruopfüu kitsa tuoketako kelhou nunu thezho nu chü morosuo toucüko chü tseilieketuo la.

⁵Kekreilamonyü chüüphou kitsa ketuoko chüüphou rüliko medoya, derei Ruopfüu kitsa ketuoko Ruopfüu rüliko medoya.

⁶Siro chüüphou kitsa medokecüe kesia zo, derei Ruopfüu kitsa rüli kemedoe kerhei mu noune zo.

⁷Haha la u nou se chüüphou kitsa tuoketae Ukepenuopfü ngumvü zo; süu Ukepenuopfü zho-u khrükhro baya mo; mu ba reilie lho zo,

⁸mu chüüphou kitsa ketuoko Ukepenuopfü nei chülieya mo.

⁹Derei nieko we chüüphou kitsa ba monyü Ruopfü kitsa bate, Ukepenuopfü Ruopfüu nie kelhou nu tuoketa la. Kehoupuorei Khrista Ruopfüu nyi kemomia puo vie mote.

¹⁰Derei Khrista nie nou bata ro, kephouma la nie mo thuo kesia kitsa bata zorei, kemiatho la nie Ruopfü kerheitsa bate.

¹¹Mhanuü kesia nunu Jisu chü perheikelie Ukepenuopfü Ruopfüu nie nou lhou tuota ro, puo Ruopfüu nie nou lhou tuoketa la, kesia nunu Khrista chü perheikelieu thuo kerhei pie nie siataketuo chüümo chükepfüko rei tsü zotuo.

¹²Süla a üpfünuoko mu siezedzürieko[11], we chüüphou medo ze lhoutuoü di chüüphou pu pfütuo mo,

¹³kekreilamonyü nie chüüphou medoko ze lhouya ro, nie sia zotuo, derei Ruopfüu pie nie chüüphou mhathoko biekhriwa ro, nie rheilietuo.

¹⁴Kekreilamonyü Ukepenuopfü Ruopfüu bu u shüta zeketuo khe, süko Ukepenuopfü nuonuota zo.

¹⁵Siro nie michieketuo die kechü ruopfü ngulie monyü, nieko peviepie puo nuo chükelie ruopfü nguliete, süla we “Abba, a Puo” idi kiekeshü ki,

¹⁶we Ukepenuopfü nuonuo chüta ükecü Ruopfüu thuo u ruopfüu ze kezhapuya,

¹⁷mu we puo nuonuota ro, puo kayieko reita zo, Ukepenuopfü kayieko mu Khrista ze karheko zo; we puo ze kemezhielie ro, puo ze zayie rei chütuo.

¹⁸A la zowe tsiedo kemezhiekecü hako se thiesie u pengushüketuo zayieu ze kemejükeliepfü mo.

¹⁹Tei kijü pete rei Ukepenuopfüe puo nuonuoko pie pengushüketuo pfhelie kelho chü baketa la;

²⁰kekreilamonyü tei kijü peteko pie kemethuo chüwate, süu si nyü di mo, derei süko kekhakelieu medo la zo, süu kemerü liro,

²¹tei kijü pete zorei khunhie puo cieürietaketuou nunu shüphralie di Ukepenuopfü nuonuoko shüphrakelie zayieu ngulietuo.

²²Mu tsieketso rei tei kijü peteko nuonuo vachü chü di keze meheimelo bakecü we si ba zo;

²³mu tei kijü rübei zomonyü Ukepenuopfü kitsa puo si rüchükelie we ha rei meheimelo di Ukepenuopfü bu u peviepie puo nuonuo chülieketuo, süu themo hau rhalieketuo pfhe ba zo.

²⁴Kekreilamonyü kemerü bakecü la u kelakelie zo. Derei tsie ngulieketau üse kemerü ülie kenjü. Kekreilamonyü supuonie ngulieketau merü baya ga?

²⁵Derei we mha ngu kemo-u merüya liro, we shügeshühie di süu pfhe baya.

²⁶Süsü tuoi Ruopfüue u thachüko nu u khruohishüya; kekreilamonyü we chalie morokesuoko rei chalie siya kemo la, derei Ruopfüu thuo themia die nu pulie kelho nunu u la meheimelo baya.

²⁷Mu Ukepenuopfü, thenou mehoyakezhau, Ruopfüu keleko rei si baya, kekreilamonyü Ruopfüue Ukepenuopfü medo mhiei kemesako la cha bayakezha la.

²⁸Siro Ukepenuopfü khrieyakezhako puo mharhü la kiekelieko la zowe kehoupuo chü shierei u dze kevi la phre zokecü we si bate.

²⁹Puo pedzüperie si tuoketa süko bu puo Nuou rhiu mhielieketuo la, süko la rhü sa se tuote, sidi puo Nuou bu kikru kezha süu nu nuorieu chüliete.

³⁰Mu puo pedzüperie rhüse tuoketako, puo süko kie reiliete; mu puoe kielieketako, puoe süko chü kemiatholiete; mu puoe chü kemiatholieketako, puo süko bu zayie rei chüliete.

³¹Siro we mha hako dze kedipuo pu ta? Ukepenuopfüe u kitsa liro supuonie u ngumvülie vita?

³²Puo thuo puo Nuou zorei khrie mo di u pete la khashü ro, puoe mha kekrei pete puo Nuou sa khashü u tsü motuo me?

³³Supuonie Ukepenuopfü kedakelieko gei kenyalie vi ga? Süusü Ukepenuopfü zo, derei puoe sükoü mezhüüwata ze.

³⁴Supuonie süko pejolie vi ga? Süu Jisu Khrista zo, puoe siakeshüu, rheilasiekelieu, sidi puoe vo Ukepenuopfü zatsa ba di u zhapu chü bate.[12]

³⁵Supuonie Khrista u kekhrie nunu u chükho setalie vituo ga? Kemezhiekecü, morei u nou kehoukeruo kechü, morei u pechüpenyükecü, morei pekriekecü, morei methuokecü, morei kemichie, morei zhiechae chülietuo me?

³⁶Thiedzü thupiekezhü, “Nieko la mia bu zhate hie dukhri; mia hie üse tekuo ze vo dukhriwatuoükezhü mhieya”

³⁷Derei mha hako pete nu hie khrieyakezhau la hie kuokelie sie rei kuolieya.

³⁸Kekreilamonyü kesia rei, kerhei rei, teigeidieliemia rei, mia kekhakecüko rei, tsiedoko morei thiesie vorketuoko rei, kekuoko rei,

³⁹morei kerükrieko rei, kesou rei, morei tei kijü donu mhapuorei u Niepuu Jisu Khrista nu ketuo Ukepenuopfü u kekhrieu nunu u chükhowalie kenjükecü a si tou bata zo.