Read Angami Naga Rommiako 9 Bible Online

Rommiako 9 - Angami Naga bible

Rommiako 9

¹A Khrista nunu ketho tou puya, a tijü ba mo; mu Kemesa Ruopfü geinu a noule süue mezhü zo ücü zhapu chüya.

²A nou kemezhie mu a melou chü sei tuoya,

³chülie vikecü sie we a chü a phou tsatie a themiako[13] mu a se a yieko kelalieketuo la a bu rüsepfüta di Khrista kitsa a khawanu sie zotieciü.

⁴Sükoe Israelmia zo; mu uko kedapie nuothonuo chülieketako zapuzayie, dietseidiekhoko, thezho-u khakeshü, rüsuokecü, mu pupiekezhüko rei süko vie;

⁵keriekimiako rei uko vie, chüüphoutsa nu le vo ro uko geinu Khrista, mha pete mho kebau lhou vor, kechachie thetshepfülie kesü sü Ukepenuopfü zo. Amen.

⁶Derei Ukepenuopfü dieu chü tso mota mo zo. Kekreilamonyü Israelmia pete rei Israel ketho zo mo,

⁷mu Abraham nuonuo pete rei puo nuosenuoyie ketho phre mo; derei “Isak geinu n seyiemia za kiesietuo” isipie zhü.

⁸Hau ca liro chüüphou nuonuokoe Ukepenuopfü nuonuo mo, derei pupiekezhü nuonuoko üse puosepuoyie üte.

⁹Hau la phrakeshü dieu pukecü “Ha meseki a la vortuo mu Sara thepfunuomia puo penuolietuo” si.

¹⁰Mu sürübei zo mo; Rebeka rei puo nupfu u puotsau Isak nuo nuonipfükelie ki rei sükemhiecü puo chü.

¹¹Puo nuonie penuokelie mhodzü morei kekrükecü puorei chüwa mo zoluocü nu (Ukepenuopfü kedakelie mharhüu bu ba seilieketuo la,

¹²mhathoko la monyü puo u kiekelie la zo) puoe pukecü, “Phichüu nhicuu lie chütuo” isipiezhü.

¹³Siro thupiekezhü, “A Jakob khrie, derei Esau ngumecü” si.

¹⁴Siro we kedipuo pu sa ta? Ukepenuopfü gei kethoca ba mote me? Si mo zo!

¹⁵Kekreilamonyü Mosa sie, “A ngumezhieketuomia ngumezhie zotuo, mu a khrieshüketuomia khrieshü zotuo”

¹⁶Süla süu themia medo morei u rhiechükecü geinu mo, derei Ukepenuopfü u ngukemezhieu la zo.

¹⁷Kekreilamonyü ketholeshü nu Faro ki pukecü, “A n geinu a kekuo pesishü di a za pie kijü pete nu pushüketuo la a n se sierkeshü zo” si.

¹⁸Sidi puo puo medomia ngumezhieya mu puo thuo puo medomia nou chü perewaya.

¹⁹Süla nieko a ki, “Siüro kidi puo mia kejo pfülie vi ta? Kekreilamonyü supuonie puo medo-u therhielie vi ta?” idi putuo nhie?

²⁰Sirei no themia zo di Ukepenuopfü prülikezha ha no supuo ga? Chükelie mhanyau sie puo chükeshüu ki, “No kedipuo la a chüpie hiwa ga?” ilie vi me?

²¹Likechümia puoe rügau se puo thuo puo medo chü di huo chüpie therhu li chü mu huo chüpie therhu phikemo li chülie kevi puo kekuo jü me?

²²Di siro Ukepenuopfü noupfhü mu puo kekuo pie mia pekieshüketuo la pekawaketuoko gei puo nou cha ba ro mha puote me?

²³Mu puoe pedzüperie zayie chüketuo la kedase tuoketako bu puo zayieu kinyiko nguketuo la sita üro,

²⁴mu sünu Judamia donu rübei zomonyü Judakemomia donu rei kiekelie úko rei sata üro, we mha huo pulie vi me?

²⁵Puoe Hosea leshü nu pukeshü: “A themia kemoko ü, ‘A themiako’ idi kieliete, mu a khriekemopfü ü, ‘A khriepfü’ üdi kietuo” si.

²⁶“Siro thiedzü, ‘Nieko a themia mo’ idi uko ki pukeshü ra nu, uko üse rheituoyakezha Ukepenuopfü nuonuo üdi kietuo” ipiezhü zo.

²⁷Siro Isaya Israelmia dze pu shiekhoui di, “Israel nuonuoko thuo krapie dzükezha khie theshünyo mhie zorei, peshakeliekoyo rübei kelalietuo;

²⁸kekreilamonyü Niepuu pecha mo di kijü hau ze mhachü kemezhüketuo dienyau pepi mhatuoü bate.”[14]

²⁹Mu Isaya pukeshü mhie, “Krodiko Niepuu thuo huomia khapie u tsia chüshü kemosie, we Sodom mhieta mu u chüpie Gomora tuoiwa zotuo” sipiezhü.

³⁰Siliro we kedipuo pu ta? Judakemomia, kemiatho pfhü kenounyü mo zocüko, süu nguliete, süusü kepele la miatholiete;

³¹derei Israelko, thezho-u medzi di kemiatho pfhü meyhumezhie tuo di thezho-u chü tseiütsolie mote.

³²Kedipuo la ga? Kekreilamonyü u kepele sa mo di uko mhathoko geinu ngulie thenyüsieketa la. Uko mia phi kemesü tsieu geinu uko phi mesüwate.

³³Süu dze, “Harie, a mia phi kemesü tsie puo, mu mia perhekhrüwayakezha tsie puo pie Zion geizhü ho, sirei themia kehoupuorei puo pelekelieu[15] thenga chütalie lho” idi thupiezhü.