Read Angami Naga Korintmiako Kerieu 1 Bible Online

Korintmiako Kerieu 1 - Angami Naga bible

Korintmiako Kerieu 1

¹Paul, Ukepenuopfü medo nu, Khrista Jisu apostel chütuoü kielieketau, mu u siezeu Sosthene unie-e

²Thupie Korint nu Ukepenuopfü kehouu, Jisu Khrista lanu chü kemesalieketa mu kemesako üdi kielieketako, tsiu kehourapuorei hie mu uko Niepuu üdi, Niepuu Jisu Khrista za kielieketa peteko ki keshü;

³Ukepenuopfü u Puou mu Niepuu Jisu Khrista bu ngukemezhie mu noune pie nie tsücie.

⁴A nieko la kethezie pie a Kepenuopfü tsü seiya, kekreilamonyü Jisu Khrista geinu ngukemezhie pie nie tsü,

⁵puo geinu mha peteko nu, nie dieko nu mu mhasi pete nu rei mha nyilieketa la.

⁶Süusü Khrista zhapuu nieko donu ba chüsechüte,

⁷nie u Niepu Jisu Khrista bu mia mhingu chüshüketuo pfhe keba kize mhaphruo kehoupuonurei rükreketa chülie lho.

⁸Puo nie bu u Niepu Jisu Khrista zha nhie jota moketuo la puo thuo nie rüguose vo thela tsoshü zotuo

⁹Ukepenuopfü sü dietho zo; puo nie bu u Niepu Jisu Khrista, puo Nuou ze kekrotho balieketuo la nie kielie.

¹⁰Siro a üpfüko mu siezedzürieko[1], a u Niepuu Jisu Khrista za nu nie bu kenourhe di nie donu kepfükhowa molienu, tsiu nieko bu keze nou puo chü mu nie medo kerhe di keze puo chünu chaya.

¹¹Kekreilamonyü a üpfüko mu siezedzürieko[2], nieko donu keprüli baketa Kloe kinumiako ki nu silie.

¹²A sikelie die süusü, nieko mia puopuocü sie, “A Paul kitsa,” kekreiu “A Apola kitsa” morei kekreiu, “A Kefa kitsa” mu kekrei puoe “A Khrista kitsa” isi bata üsi.

¹³Khrista chü phrowalie vi me? Paul nieko la Krus geinu siashü me? Morei nie Paul za nunu dzülupfülie me?

¹⁴A Krispa mu Gayanie zo kemosie nieko miapuorei dzülu khashü kemo la, Ukepenuopfü thezieya,

¹⁵süla nieko miapuorei a za nunu dzülupfülie ücü pulie kenjü.

¹⁶(A Stefana mu puo kikru dzülu kha sashü ho; derei süsie a kekreimia puorei dzülu khashücü lelie mo.)

¹⁷Khrista a ketsepie a bu mia dzülu khashünu mo derei dieliekeviu punushü, mu Khrista krus geinu siakeshü kekuou bie pejüwa moketuo la themia mhasi rei se pu mo.

¹⁸Kekreilamonyü Krus dieu kataketuoko mhodzünu we kenya die zo, derei kelalieketa úko la we süu Ukepenuopfü kekuou zo.

¹⁹Süu dze thupiekezhü, “A mhakesimiako mhasi pekawatuo, mu mhasimhale kenyithoko mhale chüpie kemethuo chüwatuo.”

²⁰Mhakesimia kirapuo ba ga? Leshükesithoko kirapuo ba ga? Tsie phouu nu keprüli kesiko kirapuo ba ga? Ukepenuopfü kijüu mhasi pie kenya zoüwate.

²¹Kekreilamonyü Ukepenuopfü puo mhasi pie mia kiekeshü ki kijüu u thuo u mhasi se Ukepenuopfü silie moketa la, kenya die üketa puo pupie mia kie di pelekeliemia kelalietuo ükecü Ukepenuopfü medota.

²²Judako zasi ngu nyü mu Grikmiako mhasi pfhü,

²³derei hie zowe, Khrista pie krus geinu goukewau se pethaya, süu Judako nei kemo die puo mu Judakemoko la kenya die puo zo,

²⁴derei kielieketa Judako mu Grikmia la zowe Khristae Ukepenuopfü kekuo mu Ukepenuopfü mhasiu zo.

²⁵Kekreilamonyü Ukepenuopfü tie nunu kepar kenya die kemhie zorei themia mhasiu ki mhasikuo, mu Ukepenuopfü geinu kepar meca kemo kemhieu zorei themia ki mecakuo zo.

²⁶Siro a üpfüko mu siezedzürieko[3], nieko thuo rei nie kiekelie dze rükrashücie: themia kitsa nu leshü ro nieko mia kekra mhakesimia mo, mia kekra kemecamia mo, mia kekra kevimia rei mo.

²⁷Derei Ukepenuopfüe mhakesiko kengashüketuo la kijü hau nunu mhasi kemoko kedaliete; mu Ukepenuopfü kemecako kengashüketuo la kijü hau nunu meca kemoko kedaliete.

²⁸Siro Ukepenuopfü kijü nu mha le pezhayakezhako bie pejüwaketuo la kijüue mhapuorei kemo mhie di mia u le pecü mu u thiyakezhako kedaliete,

²⁹sidi miapuorei[4] bu Ukepenuopfü mhodzünu kemiako molieketuo la.

³⁰Puoe Khrista geinu nie kerheiro se kebau zo, u la Ukepenuopfü kinu mhasi, mu miathokecü mu chü kemesakelie tsiu u rhakelieu chüte,

³¹mu siketuo la, süu dze hakemhie thupie zhü, “Kehoupuorei kemelha nyüyakezhau, Niepuu geinu kemelhaliecie” si.