Read Angami Naga Korintmiako Kerieu 10 Bible Online

Korintmiako Kerieu 10 - Angami Naga bible

Korintmiako Kerieu 10

¹A tuo a üpfüko mu siezedzürieko[17], thiedzü u pfutsanuoko pete kimhou bu u yapfü di dzükezha cie phrekecü a nie bu si mo tuo nyü mo,

²mu uko pete rei Mosa kitsacü tuoi kimhou mu dzükezha nunu dzülupfü phrelie,

³tsiu u pete rei ruopfü ca kecü puo cü,

⁴mu ruopfü kitsa kekrie puo krie phre. Uko zeketuo ruopfü tsiekrieu geinu krie phrecü la, mu tsiekrie süu Khristau zo.

⁵Sizo ürei Ukepenuopfü themia süko pete khre gei puo nei moketa la uko bu rayha nunu siate.

⁶Siro uko mha kesuo mehoumengukecü tuoi u bu si molieketuo la süko pie thakie chüshü zo.

⁷Morei süko huomia mhie terhuorhi rüsuokezhamia chü rei la hie; süko dze thupie kezhü hamhie, “Themiako ke ba di mhacümhakrielie; siro uko rüzhütuoü sielie.”

⁸Úko zowe uko huomia pieüpiera chüketa tuoi molie khe; süko khunhie vachü mia nyie mepfüese siate.

⁹Uko huomia Niepuu medophikecü tuoi úko we sita molie khe, süko tinyhü bu uko medu khriwate.

¹⁰Uko huomia panyaketa tuoi úko we panya molie khe, sükoe kepekau bu uko pekawate.

¹¹Süko gei mha hako chüketa u bu u kireilieketuo la thakie puo zo, sizomonyü we puotei thelau nu kelhouko tarhoshüketuo la die süko thupie tuote.

¹²Süla no thalieta üdi leya ro, tetsuta kelho la menuoliecie.

¹³Kedokecü nie gei vorkecüko mia gei voryakezhako zo. Derei Ukepenuopfü sü kedietho-u zo, mu puo nieko hielie kevi zie pie nieko kedolie lho! Sikecüumonyü kedokecü kevor ki puo nie bu hielieketuo kekuo khashü nie tsütuo.

¹⁴Süla a zenuoko, ta terhuorhi kerüsuo therhie zoliecie.

¹⁵A niekoü mhakesimia üdi nie rüchüya, nieko thuo a die leliecie.

¹⁶We pie Ukepenuopfü tsheyakezha hieu, süu Khrista zie se vierhe chüketa puo mo üme? We niekhrüda bietshiekecü ki, süu we Khrista mo-u gei keze puo chüketa puo mo üme?

¹⁷Kekreilamonyü niekhrüdau puo zo, we mia kekra shierei keze mo puo zo, u pete keze niekhrüda puo keza cükezha la.

¹⁸Israelko rüli leshücie;[18] uko ruosuo chükeshüko cüyakezhako ruosuobau ze kerhe mo me?

¹⁹A kedipuo pu nyü ba üga? Kecüca pie terhuorhi ruosuokewau mhapuoü me? Morei terhuorhi üse mhapuo üba me?

²⁰Mo zo, a kepuu ro pelekemomia mhapie ruosuo chüyakecü süu pie terhuokesuoko ketsüu moro pie Ukepenuopfü tsü mo zo. A nieko bu terhuokesuoko ze mhapuorei vierhe chü nyü mo zo.

²¹Nie Niepuu hieu mu terhuokesuoko hieu krie kesalie kenjü. Nie Niepuu mu terhuokesuoko mizhü geinu cülie kenjü.

²²Mo úko Niepuu neimo chü di puo bu puo rota nyüya me? We puo ki kuokuo me?

²³“Mha pete puotou zo” derei mha pete nu kemevi ba phreya mo. “Mha pete puotou zo” derei mha pete mha chü pevi phre zoya mo.

²⁴Nie zhazhü rübei leta hie, derei kekreimia zhazhü rei lelie.

²⁵Nie nou nie kerei mo zo di themuo kezechü nu zeyakezha kehoupuorei khrü cücie,

²⁶“kijüu mu sünu ketuo pete Niepuu vie zocü la.”

²⁷Mhanuü pelekemomia puo nie bu vo hienuta ro, nie nou nie kerei mo zo di mha pie nie ketsüko cücie.

²⁸Derei miapuonie, “Hau terhuorhi rüsuokewa vie” isi ro, pupie nie kiekeshüu mu süu noule la nieko mha süu cü hiecie,

²⁹a pukecü n nouleu monyü kekreiu noule la kepu zo. Kiüdi kekreimia puo nouleu pie a kekha batuo ga?

³⁰A mha puo la Ukepenuopfü tshe di cü ba liro, kiüdi mia bu a kethezie khakeshü süu la a thatuo ga?

³¹Süla nie mhacü rei, krie rei, morei mha kehoupuo chü rei, Ukepenuopfü zayie la süko chü phreliecie.

³²Nieko Judamia morei Grikmia morei Ukepenuopfü kehouu bu nie geinu u phi kemesü chüwa hie.

³³Süsü tuoi a a thuo a pra a shü pfhü monyü mia kekra bu kelalieketuo la, mha kehoupuonurei themia kehoupuo nei rei chüya.