Read Angami Naga Korintmiako Kerieu 11 Bible Online

Korintmiako Kerieu 11 - Angami Naga bible

Korintmiako Kerieu 11

¹A Khrista Dorielieyakezha Tuoi Nieko rei A Dorie Lieliecie.

²Siro nie mha kehoupuonurei a rükra sei mu a pie nie pethakeshüko chüüzeyakezha la a nieko tsheya.

³Derei Khristae thepfumia kehoupuorei tsüu, mu thepfuu rei thenupfü tsüu zo, siro Ukepenuopfüe Khrista tsüu zocü nieko bu silie nyü.

⁴Thepfumia kehoupuorei puotsü mha kehoupuorei toupfü di cha morei pethaya liro puo thuo puo tsüu rhu mo,

⁵derei thenumia puo tsü dzepfü mo di kechachü morei pethaya liro puo tsü rhu mote, puoe u tsü thiewaketapfü ze kekrei mote.

⁶Kekreilamonyü thenupfü puoe puo tsüdzepfü mo ro, puo bu puo tsü bewa rei vi; derei thenumia puo tsütha thiewa morei bekepfü mha thenga puo zokecü la puo bu puo tsü dzepfülie.

⁷Thepfumia zowe puo tsü dzepfü morei vi; kekreilamonyü puoe Ukepenuopfü rhiu mu puo zayie zokecü la; derei thenupfüe thepfuu zayie zo.

⁸Ketho zo, thepfumia thenumia geinu chülie mo, derei thenumia thepfumia geinu chülie.

⁹Siro thenupfü la thepfuu chüshü mo, derei thepfuu la thenupfü chükeshü zo.

¹⁰Teigeidieliemiae meho keba la thenumia puo tsüu khro keba zasi puo se zhü.

¹¹Sirei, Niepuu nu we thenupfü rei thepfuu ki krei mo morei thepfuu rei thenupfü ki krei mo.

¹²Kekreilamonyü thepfuu la thenupfü lhoukelie tuoi thenumia geinu thepfumia lhoulieya: derei süko pete Ukepenuopfü ki nu vor phre zo.

¹³Nie thuo le phicie: thenumia u tsü dze mo di Ukepenuopfü ki chacü puotou me?

¹⁴Thepfumia u tsütha pesepfü ketuo therhu mokecü lhenuzho nu zorei nie silieya mo me?

¹⁵Derei thenumia u tsütha pesepfü tuo liro, süu puo therhu zo moü me? Kekreilamonyü puo tsütha kha puo tsükeshüe puo tsü whepfüketuo la zo.

¹⁶Derei huomia hau dze la keprülita liro, hie rei mu Ukepenuopfü kehouko rei thezho haikecü tuo mo.

¹⁷Siro a mha huo pu sashütuoükezhü nu nie tshelie lho, kekreilamonyü nieko vor kengukelie ki vilieketuo la monyü suokuotaketuo la zo.

¹⁸Therieu, a nieko dze sikelie nieko vor kehoukelie ki puo rüla kekreikecü nyi ümhie mu a kele ki hau ketho zo thenyüsie.

¹⁹Ketho zo, nie kiu puocüu shicü si kemecie parlieketuo la, nie donu kediekreikecü sier molie lho.

²⁰Siro nieko vo kehoukengukecü Niepuu kerükra ca cüketuo la mota zo.

²¹Kekreilamonyü süu kecü ki huoniehuo pfhe mo di u thuo u vavü cülieta huomia bu merü ba, tsiu kekreiko meze bataya ümhie.

²²Kiüdi ga? Nie thuo nie ki nunu mhacümhakrielie lhote me? Nieko Ukepenuopfü kehouü mhaümo mu kejüko bie kethenga iya me? A bu nieko ki kedipuo pu ta? A bu nieko tshenu me? Hau nu a nieko tshe mo.

²³Kekreilamonyü Niepuu kinu a ngukelie süu pie nieko tsüwate, süusü Niepuu Jisu, mia bu puo tekelie zhü, niekhrüdau pielie,

²⁴sidi Ukepenuopfü tsheshü di bietshielie, sidi sie, “Hauha nieko la khakeshü a mo-u zo. Nieko a rükra tuolieketuo la hau chüchücie” sishü.

²⁵Sütuoi mhacükelie sie, puo tehieu rei chüpielie di sie, “Tehie hau rei a zieu nu dietseidiekhokelie kesau zo; nieko hau kekrie metsei a rükra tuolieketuo la kriekriecie” sishü.

²⁶Kekreilamonyü nieko niekhrüda hau kecü metsei mu tehie hau kekrie metsei Niepuu la vor kemochie puo seu dze thapie mia kie ba zo.

²⁷Süla kehoupuorei puotou chü mo di Niepuu niekhrüdau cü morei puo hieu krie ro, puo Niepuu mo-u mu puo zieu kitsatie jotatuo.

²⁸Süla kehoupuorei puo thuo puo rüli le menuo di niekhrüda süu cü mu tehie süu kriecie.

²⁹Kekreilamonyü themia kehoupuorei Niepuu mo-u dze le menuo mo zo di cü mu krie ro, süu u thuo u kepejo cü mu krietaya.

³⁰Haha la nieko donu mia kekra mhachü mu mezie ba, mu huomia we sia reite.

³¹Derei u thuo u rüli le menuolie ro, u pejolie lho.

³²Sirei kijüu ze u pejowa molieketuo la Niepuu thuo u pethayakezha[19] zo.

³³Süla a üpfüko mu siezedzürieko[20], nieko süu cüketuo la vor kengukelie ki, huoniehuo pfheliecie.

³⁴Nieko kehoukengukelie ki nie pejota molieketuo la, kehoupuorei merütaya üro, kinu nu mhacülietacie. Siro mha kekreiko la zowe a thuo vorkelie zenu pu kemecieshütuo.