Read Angami Naga Korintmiako Kerieu 12 Bible Online

Korintmiako Kerieu 12 - Angami Naga bible

Korintmiako Kerieu 12

¹Siro a zenuoko, a nie bu ruopfü mhaphruoko dze si mo ba nyü mo.

²Nieko thiedzü pelekemo ki mha puo bu nie hüse terhuorhi diepulie kemo kro puo rüsuo vorkecü si batuo.

³Süla a nieko bu hau si nyüya, kehoupuorei Ukepenuopfü Ruopfü nunu mha puyakecü ki, “Jisu bu rüsekepfüu chü” icü puya mo, mu süsü tuoi Kemesa Ruopfü nunu zo kemosie miapuorei “Jisu sü Niepuu zo” ikecü puya mo zokecü nie bu si nyüya.

⁴Siro mhaphruoko zowe kekreicü nyi, derei Ruopfüu we puo zo;

⁵tsiu lietho rei kekreicü nyi, derei Niepuu we puo zo;

⁶mu mhatho rei doneiü nyi, derei süko nu mha peteko chüyakezhau we Ukepenuopfü zo.

⁷Derei kehoupuo bu rei se mevi relieketuo la Ruopfüue kekuo pie tsü phreshüwaya.

⁸Sidi Ruopfü süu geinu mhasi se huomia tsü, mu Ruopfü süu geinu mhakesikele die se huomia tsü.

⁹Siro Ruopfü süu geinu kepele se huomia tsü mu Ruopfü süu geinu chü keshürhokelie kekuo se huomia tsü,

¹⁰tsiu Ruopfü süu geinu ungomhatho chülieketuo kekuo se huomia tsü, siro siedzekesi die kepu mhaphruo se huomia tsü, tsiu ruopfüko si kekreilie kevi se huomia tsü, mu pfhe kekrei ca pulie kevi se huomia tsü.

¹¹Derei Ruopfü puo zokecü süu thuo puo kele mhie di keza kekreipie mia tsü reshü di süko peteko nu mhachüya.

¹²Siro umo puo zo derei puo zatho kekreikreicü kekra ba, mu u mo gei puo zatho kekreikreicü kekra ba rei pete kesa mo puo zokecü tuoi Khrista dze rei sü mhie zo.

¹³Sütuoi u pete Judamia rei Grikmia rei, mia diemia rei kemomia rei, keze mo puo chüketuo la Ruopfü puo nunu dzülupfü phreliete, mu u pete bu krieketuo Ruopfü puo khashüwate.

¹⁴Themoe za puo monyü zatho kekreicü kekra ba.

¹⁵Mhanuü uphi-e sie, “A thedzie kemo la, themo gei za puo lho” isi rei themo-u gei zatho puo chü mota mo.

¹⁶Mu unyietoe sie, “A themhi kemo la, a themo-u gei za puo rei mo” isi shierei themo-u gei zatho puo chü mota mo.

¹⁷Mhanuü themo pete u mhitatuo üro kimhie di mhapfhe silie ta? Siro themo pete bu kerünyü chüta üro kimhie di mhare silie ta?

¹⁸Derei sita mo di Ukepenuopfü puo thuo puo medo chü zatho kekreikreicü kheko pie themo chüshüte.

¹⁹Mhanuü pete bu zatho puo chüta ro kedipuo üse themo üta?

²⁰Süla zatho kekra ba rei themoe puo zo.

²¹Umhi-e sie udzie ki, “A n se morei vi” morei utsüe sie uphi ki “A n se morei vi” idi pulie kenjü.

²²Sikecüumonyü u mo gei zatho thachükecü kemhieko se morosuoya,

²³mu we mhathokemo mhie di leyakezha umo gei zathoko thuo rei rhu di rüguose tuoya, tsiu umo gei zatho kethevieko ketso kezivise tuoya,

²⁴mu zatho keziviko we sümhie morei vi. Derei Ukepenuopfü thuo umo-u chüpie kereshü di zatho therhu ketsako bu therhupfükuoya,

²⁵sidi umo-u bu kepfükhokecüu monyü, zatho pete bu huoniehuo la le tuolieketuo la.

²⁶Sidi zatho puo kemezhielie ro, zatho kekrei pete rei süu ze kemezhieya; zatho puo therhupfü ro, zatho kekreiko pete rei süu ze u neilieya.

²⁷Süla niekoe Khrista mo-u zo, mu mia puopuo ha süu gei za puopuo phre zo.

²⁸Sidi Ukepenuopfü huomia bu kehou nu apostel chü rie; kenieu huomia bu siedzekesiko chü, seu huomia bu kepethamia chü, süsie ungomhatho kechü, tsiu chü keshürhokecü mhaphruo, mia khruohikecü, morei krüta kechü, morei pfheneiü kepu khashü.

²⁹Pete apostel phre me? Pete siedzekesimia phre me? Pete kepethamia phre me? Pete ungomhatho chükezhamia phre me?

³⁰Pete chü keshürhokelie mhaphruo nyi me? Pete pfhe kekrei se die pu me? Pete pfhe kekrei ca kela phre me?

³¹Sirei mhaphruo zhakuokecüko mengusieiliecie. Mu a peteko donu rei kevitho-u thapie nieko kieshütuo.