Read Angami Naga Korintmiako Kerieu 14 Bible Online

Korintmiako Kerieu 14 - Angami Naga bible

Korintmiako Kerieu 14

¹Nieko kekhrieu whuo zo volie mu ruopfü mhaphruoko rei mengu terü zolie, kekrei morei siedze pulieketuo la.

²Mia puo mephra kekrei nu mha puyakezhau themia ki monyü Ukepenuopfü ki puya, miapuorei mephra süko ca si mo, ukoe ruopfü nunu die si kemo u ngo pukezha la.

³Derei siedze puyakezhamia we mia chü pevi mu mia chü kethepfu mu mia nou chü peluoshüketuo la mia kekreiko ki puya.

⁴Si kemo pfheü puyakezhamia puo thuo puo chü pevilieyakezha zo; derei siedzekesi die puyakezhamia kehouu chü pevishüya.

⁵A nie pete bu rei si kemo pfheü nunu mha pukelie a medo, derei nie bu siedze dieu pupie mia kiekecü we a neikuo. Kehouu chü pevilieketuo la si kemo pfheü nu mha puyakezhau ca kelakeshü ba, kemosie, siedze die pupie mia kieyakezhau we si kemo pfheü nu pukelieu ki zhakuo.

⁶Siro a üpfüko mu siezedzürieko[22], mhanuü a nie ki vor di pesikeshü die morei mhakesi die morei siedze die morei kepetha die se nie ki pu mo di si kemo pfheü nunu mha pupie nie kie ro, a la nie kedipuo kepra ngulie ta?

⁷Sütuoi puo kerheiro kejü bazha luoü morei kithar rei, unie pfhe chü kekrei toushü mo ro kimhie di unie si kekreilie ta?

⁸Siro ketsü kekhou-u ketsü khou kemecieshü mo liro, supuonie terhü kegeiketuo la dojülietuo ga?

⁹Sütuoi nieko si kemo pfheü nunu die puyakezhau rei pu kemecieshü mo ro, supuonie süu silie ta? Die süko pupie teikhrie nu shükewa zotaya.

¹⁰Kijü nu die kekreikreicü kekra ba, mu süko puorei puoca kejü jü.

¹¹Mhanuü mia puo die pukeshü ca a silie mota ro, a themia süu la rüsomia puotatuo mu puo rei a la rüsomia puota zo.

¹²Siro nieko rei, Ruopfü mhaphruoko menguyakezhau, kehou chü pevikelie le di mha kezhathoko chü zoliecie.

¹³Süla si kemo pfheü nunu mha puyakezhau bu puoca rei pu salieketuo la kekuo chalie.

¹⁴Kekreilamonyü a pfhe kekrei se di kechachü ro, a ruopfü zowe cha baya ketho, derei a nou zo we süu siya mo.

¹⁵Siro a kituo ga? A a ruopfü ze di ketsheü chütuo, mu a nou mhasiu rei ze di ketsheü chütuo; a a ruopfü ze di tsali chütuo, mu a nou mhasiu rei ze di tsali chütuo.

¹⁶No ruopfü nunu jakeshüu, vor kehou keba miaümiako no kethezie khakeshüu ca si mo ro kimhie di n ze “Amen” pulietuo ga?

¹⁷No zowe kethezie kha pevi phishülie vi, derei kekreiu chü pevishülie mote.

¹⁸A nieko pete kirei si kemo pfheü nunu mha pu pekrakuocü la Ukepenuopfü tsheya;

¹⁹siüderei kehouu nu zowe die kekreikecü nunu die nyie ker kepu kirei, a mia bu silie kevi kepetha die ca pengou pukelieu a neikuo.

²⁰A kezeko, nie mhale bu nhicumia tuoita hie, sirei mha kesuotsa zowe nuoranuomia mhielie, mu mha keletsa we phichümia chülie.

²¹Thezho-u nu thupiekezhü, “Kethekhrükecü si kemomia die nunu mu chazoumia tie nunu a themia hako rüchütuo; siürei uko a die rünyülie lho,” Niepuu siya.

²²Süla si kemo pfheü pukecü we kepeleko la monyü pelekemoko la zasi puo zo; derei siedzekesidie kepu we pelekemoko la monyü kepeleko la zo.

²³Süla kehou peteu vo kengukelie ki si kemo pfheü nu mha pu phre bata di miasamia huo morei pelekemomia huo ler ro, süko nie üse kekhranya bata üsie motuo me?

²⁴Derei pete siedze die puya liro, pelekemomia puo morei miasamia puo ler ro, die süko la puo pethapfülie di u kejo silietaya.

²⁵Sidi pelekemo-u nou pekhrepfü ketuoko hielashüya, sidi puoe zeretsu Ukepenuopfü rüsuo di, “Nieko donu Ukepenuopfü ba ketho zo” idi phratatuo.

²⁶Süla a kezeko kedipuo chü ro puotouthotuo ga? Nieko vor kengukelie ki huomia tsali chü, huomia mia petha, huomia pesikeshü die pu, si kemo pfheü pu, morei huomia süu ca kelayatuo. Mha kehoupuo chü rei mia chü peviketuo la chüliecie.

²⁷Mhanuü huomia si kemo pfheü nu diepu ro kekratho nu rei mia kenie morei se bu kether di pulie mu mia puo bu puoca pushülie.

²⁸Derei puoca pukeshü themia jü ro uko bu kehou nu kemekrie batalie, sidi u thuo u rüchü mu Ukepenuopfü rüchülie.

²⁹Mia keniekese bu siedze pulie, mu kekreimiako bu pukeshüko ca lelie.

³⁰Sirei puo khieki keba puonie pesikeshü die puo ngulie ro, sümhodzü pukebau bu kemekrie batalie.

³¹Nie pete rei puo sie puopuo di siedze die pulie vi zo, sitse kehoupuo bu rei mhasilietuo, tsiu u chü kethepfulietuo.

³²Siro siedzekesiko ruopfükoe siedzekesiko die zeya,

³³Ukepenuopfüe mha keboukecüu monyü menuoikecüu zokecü la. (Kemesako kehou pete nu rei chüyakezha tuoi,

³⁴thenuko bu kehou nu kemekrie baliecie. Kekreilamonyü uko bu diepu mo di thezho-u nu kepu tuoi mia dieze balienuya.

³⁵Uko mha huo si nyü ro, uko bu kitiekinu u nupfunuoko ketsoliecie. Süu kehou nu thenumia diepukecü mha kethenga puo zocü la.

³⁶Ukepenuopfü dieu nieko kinu puo bo chü par me? Morei süu nieko ki rübei kevor zo me?)

³⁷Kehoupuorei siedzekesimiaü, morei ruopfü kekuo kenyimiaü ro, sümia bu a die thupie nieko ki keshüko üse Niepuu diekhakeshüko zo ükecü siliecie.

³⁸Derei si kemvümia bu si mo bacie.

³⁹Süla a kezeko, siedze die kepu mengu beilie, derei si kemo pfheü nu mha kepu rei kha hiecie;

⁴⁰derei mha kehoupuo chü rei puotouu mu kesieso toutou di chüliecie.