Read Angami Naga Korintmiako Kerieu 15 Bible Online

Korintmiako Kerieu 15 - Angami Naga bible

Korintmiako Kerieu 15

¹Siro a üpfüko mu siezedzürieko[23], a dieliekeviu pupie nie kieshü mu nie süu zelie, tsiu süu gei metei thakelieu, a tsie nie bu süu dze leshü nyüya,

²a pie nie pethakeshü dieu thezetsa se bakelie geinu nie kela reiliete, si mo liro nie pelelieketau kemethuo chüte.

³Kekreilamonyü a ngukelie mha kezhatho-u pie nie tsüwate, süu ketholeshü nu thupiekezhü tuoi Khrista bu u kephoumako la siawate,

⁴sidi puo khruwa, derei ketholeshü nu kepu tuoi zha se nhie rheilasiete,

⁵mu puo Kefa pengushü, süsie kerekenieko rei pengushü.

⁶Süsie puo va puo chü puo siedziko mia krie pengou kezie rei pengushü, süko kekratsa rhei ba zoluo, huomia we siate.

⁷Süsie puo Jakob pengushü mu süsietsa apostel pete pengushü.

⁸Siro thelau nu puo vor a nuo pemo di penuokelie kemhieu rei pengushü.

⁹A apostelko donu kecütho-u, mia bu a üse apostel puo üdi kielie sü mo, a Ukepenuopfü kehouu pechüpenyücü la.

¹⁰Derei Ukepenuopfü ngukemezhie la a tsie chü tuoketau chülieta zo, mu puo a ngumezhiekeshüu thedo chüta mo. Sikecüumonyü a kekreiko pete kirei a hie chükuo di mhachü, derei süu a monyü Ukepenuopfü ngukemezhie a zeketuou thuo zo.

¹¹Süla a rei morei uko shierei, hie pete hau pupie mia pethaya, süla nieko rei peleliete.

¹²Siro kesia nunu Khrista rheilasieta ücü pupie mia pethaya liro, nieko huomia kiüdi kesiamia rheilakesie jüükecü pu ga?

¹³Kesiamia rheilakesie jü kecüsie Khrista rei rheisielie mo zo;

¹⁴mu Khrista rheilasielie mo üliro hie mia petha tuokecü rei kemethuote mu nie kepele rei kemethuo zo.

¹⁵Sizomonyü hie üse Ukepenuopfü zhapu chükezha ketijümiaütatie, kesiamia rheilakesie jü zo ketho liro Ukepenuopfü Khrista perheilie mo zorei hie puo üse Khrista perheilieta ükecü zhapu chütuokecü la.

¹⁶Kekreilamonyü kesiamia rheilasieya mo üliro, Khrista rei rheilasie mota zotuo.

¹⁷Khrista rheilasielie mota üliro, nieko kepeleu rei kemethuo chüta zo, mu nie tsierei nie kephoumako nu ba zo.

¹⁸Siliro Khrista pele tuo di siaketako rei kate.

¹⁹We u kemerü Khrista gei keba tsiedo u kelhou ki rübei la zo liro, we mia pete kirei u mezhie pie kemethuo chüthocümiata zo.

²⁰Derei siaketako donu puo si kerieu chü di kesiako donunu Khristae rheilasielieta ketho zo.

²¹Kekreilamonyü themia lanu kesia vorketa tuoi, themia lanu rheilakesie rei vorta zo;

²²Adam lanu kesia themia pete gei vorketa tuoi, themia pete rei Khrista la rhei lalie zotuocü la.

²³Derei mia puopuo idi kesieso votuo: Khristae puo si kerieu, süsie puo vorketuo ki Khrista vie chüketakotuo.

²⁴Süsie nu thelau vortuo, sidi puo mia kekhayakezha pete mu kekuo kese pete mu kekuoko pete penyükewa sie, puo kedi khapie Ukepenuopfü, Puou dzie nu shüwatuo.

²⁵Puo puo ngumvüko pete pie puo phi khroshüwa kemochie di ba morokesuo la.

²⁶Penyüwaketuo ngumvü thelatho-u sü kesia zo.

²⁷Kekreilamonyü “Ukepenuopfüe mha pete pie puo phikhroshüwate.” Derei “Mha pete pie puo khroshüwate” idi kepuu nu mha pete pie puo khroshülieketau sa mo.

²⁸Mu mha pete pie puo khroshüwata tse, Nuou thuo puo pie mha pete pie puo khroshüwayakezhau khroshüwatuo; sidi Ukepenuopfü bu mha pete mho tuotatuo.

²⁹Siliro kesiamia za nu dzülupfükecüko la kita ta? Kesiamia rheilakesie jü zo üliro, kiüdi themiako süko zanu dzülupfüya ga?

³⁰Mu kiüdi u thuo u khapie kemichie nu thaya zo ga?

³¹A teisonhie siata nuonuocü mhie zo! A üpfüko mu siezedzürieko,[24] süu ketho zo, a nieko pie kemholie tuoyakezhau sü, we u Niepuu Khrista Jisu ze puo chüketa la kemholie tuoya.

³²Themia kele kemhie ro Efesa nu nhachüko ze keperhie kevorko la a kedipuo kepra ngulie ta? Kesiamia rheilasieya mo üro, “Úko keze mhacümhakrie ba khe, kekreilamonyü we sodu siatatie ru.”

³³Mia bu nie sewa hiecie: “Vi kemomia ze krothokecü u zho keviko bie pesuowaya.”

³⁴Mhale kemezhülie di kesuo chü sa hie; kekreilamonyü nieko huomia Ukepenuopfü dzetsa si mo ba zo. A nieko bu mengalieketuo la die hau kepu zo.

³⁵Derei huomia sie, “Kimhie di kesiamia rheilasielietuo mu? Mu uko mo kedipuo mhie di vor ta?”

³⁶Kemelo-u! No prukeshüu siashü kemosie tsü parlieya mo.

³⁷Mu no prukeshüu puo mo chü di sierketuou mo, süu tsia puo zo, thoulha tsia morei tsia kekrei puo zolie vi.

³⁸Derei Ukepenuopfüe thuo puo medo nunu tsia süu bu puo chiebie khashü, mu tsia kehoupuorei puo chiebie bu puorhi puopuo chüketuo khashüya.

³⁹Puo chü kenyi pete kemhie mo, themia chü krei, khunuo la krei, pera chü krei, mu khuo chü rei krei.

⁴⁰Sizomonyü teigei ketuoko mo nyi, mu kijü ketuoko mo rei nyi; derei teigei ketuo moko zivi krei mu kijü ketuo moko zivi rei krei.

⁴¹Niaki puo thuo puo zivi ba, khrü rei puo thuo puo zivi ba mu themvüko zivi rei ba; tsiu themvüko donu zorei puo zivi kekreicü nyi.

⁴²Kesiamia rheilakesie rei sütuoi zo. Cieürietalie kevipfü prushü di cieürietalie kelhopfü chü rheilasietatuo.

⁴³Prukeshü ki therhu kejü nunu prushü, sirei rheilakesie we zayie nunu tuo. Süu kekuo jü di prushü, rei süu rheilakesie ki puo kekuo nyitatuo.

⁴⁴Süu chüümo nunu leishüya, sirei ruopfü mo rhi nunu la sieya. Siro tsiedo kelhou mo rei nyi üro, sütuoi ruopfü mo rei nyi zotuo.

⁴⁵Süu dze thupie kezhü hamhie, “Themia kerieu Adam, kerheiro kenyi puo chülie” derei Adam kenuou we kerhei ruopfü khashü mia tsüyakezhau chüte.

⁴⁶Derei ruopfüu rie mo, chüüzie chükepfüu vor rie, di süsie nu ruopfüu vor.

⁴⁷Themia kerieu kijü nunu vor, nyophe pie chülie; themia kenieu[25] teigei nu vor.

⁴⁸Nyophe nunu kepar-u, nyophe se kechüu mhie zo; mu teigei nu kevor themiako rei, teigei nu kevor mhie zotuo.

⁴⁹Siro we rünyo üse kechü themiau rhi chüpfü keba tuoi, teigei nu ketsur themia rhi kemhie chüpfülie zotuo.

⁵⁰A üpfüko mu siezedzürieko,[26] a kepu sü hau zo: Uchü uzie pfü di Ukepenuopfü kedi welie kenjü, morei siatalie keviu siatalie kelho-u welie kenjü zo.

⁵¹Harie, a u ngokecü die puo pie nieko ki pushütuo “Úko pete rei sia phretalie lho, derei úko pete krei phretatuo,

⁵²zopuonu, mhiphra puo nu, ketsü kekhou thelau nu. Kekreilamonyü ketsü khoushü tse, kesiako rheilasie cieürietalie kelhopfü chütatuo, mu úko pete rei krei phretatuo.

⁵³Kekreilamonyü cieürietalie keviu cieürietalie kelho-u chü dzielie beituo mu siatalie keviu siatalie kelho-u chü dzielie zotuo.

⁵⁴Tsiu cieürietalie keviu cieürietalie kelho-u chü dzielie, mu siatalie keviu siatalie kelho-u chü dzielieta tse: “Kuolie di kesiau mezuliete ho”

⁵⁵“Harie, kesia, no kuokelie kirapuo ba ga? Harie, kesia n tha kirapuo ba ga?” idi thupie kezhü dieu tseilie.

⁵⁶Kephouma la kesia puo tha nyite, mu thezho-u la kephouma puo kekuo nyite.

⁵⁷Derei u Niepuu Jisu Khrista la kuokelie kha u tsükeshüu Ukepenuopfü pezie.

⁵⁸Süla a kekhrieko, metei tha zolie, rüdita hie, Niepuu mhatho nu shürhei di chü ba zolie, Niepuu la kemezhiekeshüko kemethuo chütalie lhocü nie silieketa la.