Read Angami Naga Korintmiako Kerieu 2 Bible Online

Korintmiako Kerieu 2 - Angami Naga bible

Korintmiako Kerieu 2

¹Kezeko, a nieko ki kevor ki, a Ukepenuopfü die kesou silie kere morei lelie kere mhasi die nunu nieko ki pu vor mo zo.

²Kekreilamonyü a nieko donu nu Jisu Khrista mu puo pie Krus geinu goukewa dieu sie mha kekrei puorei si nyü tuo mo.

³Süla a nieko ki kevor ki a thachü mu michiepie pe zo di vor zo.

⁴Siro a diepu nu mu mia pethakecü rei themia do themia mhasi[5] nunu nie ki pu mo, derei Ruopfüu mu kekuou nunu tha pekiekeshü zo.

⁵Süusü nie kepeleu bu themia mhasi geinu monyü Ukepenuopfü kekuou gei balieketuo la.

⁶Siüderei hie phichüketako ki we mhasi die puya, süusü tsiedo kelhou teiki mhasiu mo, morei tsiedo kelhou teiki, kekuo keseko mo, thiesie kemethuo chütaketuoko mhasi rei mo.

⁷Derei hie Ukepenuopfü mhasi kesouu mu keviepieketuo se puya, süu se u bu zayie chüketuo la Ukepenuopfü nnhie nnhienu kelhouko mhodzü rhüpie tuota zo.

⁸Mu tsiedo kekuo seyakezha puorei süu silie mote; kekreilamonyü uko süu si liro zapuzayie kechü Niepuu pie Krus geinu goukewa pfü mo.

⁹Derei süu thupie kezhü, “Umhi pie ngulie moketa, mu u nyie pie rünyülie moketa, morei themia melou nu silie moketa, Ukepenuopfü sikecüko puo khrie puo rhuyakezhako la kesepie tuote.”

¹⁰Hie ki zowe Ukepenuopfüe Ruopfüu nunu mha hako tha phreshüte, kekreilamonyü Ruopfüue mha peteko, Ukepenuopfü dze kesouko zorei pfhülieyakezha la.

¹¹Themia zorei puo nu keba ruopfüu zo kemosie themia donu supuonie themia rüli silieya ga? Süsü tuoi Ukepenuopfü Ruopfüu zo kemosie miapuorei Ukepenuopfü rüli silieya mo zo.

¹²Hie kijü hau ruopfüu ngulie monyü Ukepenuopfü kinu kevor Ruopfüu nguliete, süla hie Ukepenuopfüe methuo pie u tsüwaketako silie vite.

¹³Süla hie themia mhasi nunu pethapfükelie dieko monyü Ruopfüe pethakeshü dieko se di ruopfüu nyiketako ki ruopfü dze pu mia pethaya.[6]

¹⁴Kehoupuorei ruopfüu nyikemomia Ukepenuopfü Ruopfüu mhaphruoko ngulie kenjü, kekreilamonyü puo mhodzüki die süko üse kenya die üya, mu uko die süko ca silie kenjü, kekreilamonyü Ruopfüu bu süko leshü puo kie morokesuo la.

¹⁵Sirei ruopfüu puo nou kebamia mha peteko le kekreilieya, mu miapuorei u rüli si di u pejokelie jü zo.

¹⁶“Supuonie Niepuu nou si di, puo pethalie vi ga?” Derei úko we Khrista nouu se tuote.